Uraqpachan Jilïr Irpirinakaxa, ¿kunjam uttʼayatäpxisa?

JEHOVÁ DIOSAN Qhañanchirinakapan Jilïr Irpirinakapaxa Diosar katuyata, ajllit cristiano chachanakäpxiwa. Jupanakaxa uywatan arstʼiripäpkaspas ukham irnaqtʼasin yanaptʼapxaraki, uka uywatawa Diosan Arupat yatichasiñapatakisa ukhamarak Uraqpachan Diosan Apnaqäwipat yatiyasiski uk uñjañatak uttʼayatawa (Mat. 24:14, 45-47).

Jilïr Irpirinakaxa sapa semanaw tantachasipxi —miércoles uruw tantachasipxi—, ukham tantachasisax mayachtʼat irnaqtʼapxaraki (Sal. 133:1). Jilïr Irpirinakaxa yaqha luräwinakansa irnaqtʼapxarakiwa. Diosan Apnaqäwip nayrar sartayañatakixa, uñjirinakjam uttʼayatäpki ukanakax mä luräwi katuqapxaraki uka tuqit jichhax mä jukʼa qhanañchasini.

◼ UÑJIRINAKAN PʼIQTʼIRINAKAPA. Uñjirinakjam uttʼayatäpki ukat mä secretariompiw ukan irnaqtʼapxaraki, taqiniw jupanakatxa Jilïr Irpirinakäpxi. Taqi uñjirinakan sum irnaqtʼapxañapataki ukat kuna jan waltʼäwis jan utjañapatakiw uñjapxi. Jehová Diosan Qhanañchirinakapax akatjamat kuna jan waltʼäwinakan jikxatasipxchispa, arknaqatas uñjasipxchispa, ukat kuna jan waltʼäwis utjki ukanak jankʼak askichasiñapatakiw yanaptʼaskaraki.

◼ BETELANKIRINAKAR UÑJIRINAKA. Diosar yupaychañ tuqitsa ukat sum sarnaqasipxañapatakisa aka jilatanakaw uraqpachan Betelankir jilat kullakanakarux uñjapxaraki. Aka uñjirinakawa Betelan irnaqapkani uka jilat kullakanakarus ajllipxi ukat jawstʼapxaraki, ukat Betelan irnaqkasina kuna jisktʼanakas utjkaspa ukanakxa jupanakarakiw qhañanchapxi.

◼ QILLQATANAK TUQIT UÑJIRINAKA. Uraqpachan Bibliat apstʼat qillqatanak lurasiñapataki, qillqasiñapataki ukat uka qillqatanak apayasiñapatakiw uñjapxaraki. Ukhamarak imprentanaka ukat kuna yänakatï utjki Jehová Diosan Qhanañchirinakapanxa uks uñjapxarakiwa. Uraqpachan Diosan Apnaqäwipat yatiyasiski ukar yanaptʼañ munirinakan churäwinakap sum apnaqasiñapatakiw jupanakax uñjapxaraki.

◼ YATIYAÑ TUQIT UÑJIRINAKA. Aka jilatanakaxa kunjamsa yatiyañatakix irnaqtʼasini uk uñjapxaraki, ukat tamanakarusa precursoranakarusa, irpir chuymaninakarusa ukat tamanak tumptʼir jilatanakarusa kunjamsa uñjasini uksa wakichtʼapxarakiwa. Ukat Diosan Apnaqäwipat Yatiyañataki sat qillqat lurasiñapatakiw wakichtʼapxaraki, khitinakas Escuela de Galaad ukat Escuela de Entrenamiento Ministerial sat yatiqañ utanakarux sarapxani ukanakarus jawstʼarakiwa, yatiqañ tukuyxapxi ukhaxa taqi chiqanakaruw yatiyapxañapatak khitapxaraki.

◼ YATICHAÑ TUQIT UÑJIRINAKA. Jachʼa tantachäwinakansa ukat tamanakan tantachäwinakapansa kunas yatichasini uk wakichapxaraki. Betelankir jilat kullakanakar Bibliat jukʼampi yatichasiñapataki ukat Bibliat yatiqañatak utanaksa, sañäni Galaad ukat Servicio de Precursor satäkis ukanak uñjapxi, ukhamaraki ischʼukiñatakisa ukat videonak uñjañatakisa wakichapxaraki.

◼ QILLQIRINAKAN UÑJIRINAKAPA. Diosan arupat yatichasiñapatakix qillqatanak wakichapxi ukat lurasiñapatakiw uñjapxaraki ukhamat jilat kullakanakarusa ukat jaqinakarusa churasiñapataki. Bibliat jisktʼanak utjki uka jisktʼanakarus qhanañchapxiwa ukat kuna dramas mistuni ukhamaraki kuna bosquejonakas utjani ukanakxa jupanakaw yatiyapxi. Ukhamaraki, Uraqpachan yaqha arunakar jaqukipaski uka luräwsa uñjapxarakiwa.

Ajllit cristianonakax mä cuerpopkaspas ukhamawa sasaw apóstol Pablox satayna, ukat kunjamtï uka janchin sapa chiqax jupanakkam yanaptʼasipxixa uka kikparakiw ajllit cristianonakaxa maynit maynikam yanaptʼasisa munasisa ukat kuna luräwtï Diosax jupanakar churki uks mayachtʼat lurapxaraki, sasaw satayna (Rom. 12:4, 5; 1 Cor. 12:12-31). Pʼiqjamaxa, Jesucristow ajllit cristianonakarux Diosan yatichäwinakapsa ukat kunatï wakisirjamächi uks churaraki ukhamat mayachtʼat irnaqtʼapxañapataki (Efe. 4:15, 16; Col. 2:19). Ukhamatwa, Jilïr Irpirinakax Jehová Diosan qullan ajayupampi irpayasisax Uraqpachan yatiyasiñapatakisa sum uñjasiñapatakisa waktʼayatäpxixa.