Kunsa liytʼirinakax yatiñ munapxi

¿Chiqapunit Uma Juiciox uraq chhaqtayäna?

Uma Juiciot jichhakamax niyaw pusi waranqa maranakäxi. Ukampis janiw jichhürunakanxa uka tiempon jakir jaqinakax utjxiti. Ukhamax janiw khitis ukhamänwa, akhamänwa siskaspati. Ukampis mä qillqataw utji, ukanxa jachʼa qullunakas qʼala chhaqtayatänwa sasaw qhanañchi.

Uka qillqatanxa akham siwa: “Jallusti pusi tunka uruw purïna [...]. Umasti sintipuniw makhatxana, jachʼa alto qullunaksa qʼalwa chhaqtayxarakïna, taqi jachʼa qullunak chhaqtayatatsa, umax makhataskakïnwa uka qullunakatxa mä paqallqu metrompjama” sasa (Génesis 7:17-20).

Inas yaqhipatakix janiw chiqäkiti sañjamächi, “jilamp jilampik parlxarakixa, mä säwikïpachawa” sasaw sapxaspa. Ukampis Uma Juiciox ukhamäskapunïnwa, amuytʼañäni, aka Uraqinxa niya chikatatsa chikatampiw umakamakixa. Ukhamatwa Uma Juicion utjatapxa yattanxa. Ukat taqi khunu qullunakas jan ukax chhullunkhanakas chulluraspa ukhaxa, wal qutanakax jilxattaspa ukat Nueva York sat markarus jan ukax Japón markankir Tokiorus qʼal chhaqtayaspa.

Estados Unidos markanxa, inti jalsu tuqinkir alay chiqanxa niya patak kutiw uman qutantata nayratpach uñjaspachäna sasaw yatxattʼat jaqinakax sapxi. Mä kutix niya 600 metro ukha altünwa, ukat walpun umax sararakïna sasaw sapxi. Ukhamax Uma Juiciox utjaskapunpachänwa sasaw yaqhip yatxattʼat jaqinakax sapxaraki.

Ukampisa, khitinakatix Diosan Arupar iyawsapki ukanakaxa, janiw Uma Juiciox utjaskapunpachänwa sakix sapkiti, jan ukasti utjaskapunïnwa sasaw sapxi. Jesusax akham sasaw mä kutix Awkipar säna: “Arunakamasti chiqawa” sasa (Juan 17:17). Ukat apóstol Pablox akham sarakïnwa: “Jupax taqinin qhispiyatäñapwa muni, kunatix chiqäki uk uñtʼapxañaparaki” sasa (1 Timoteo 2:3, 4). Biblian aliq säwinakaki utjaspa ukhaxa, ¿Pablox Jesusan arkirinakapar chiqaw sasa yatichaspänti?

Jesusax janiw Uma Juicion utjatapaki yatkänti, jan ukasti, kunja muspharkañänsa ukxa sum yatïna. Jutañap tuqit mä profecía arskäna ukhaxa, kunjamatix Noé tatan urunakapan paskäna ukhamarakiw aka qhipa urunakan pasañapa sasaw säna (Mateo 24:37-39). Apóstol Pedrox akham sarakiwa: “Ukatsti uka uraqixa uma juiciompi tʼunjatäxarakïnwa” sasa (2 Pedro 3: 6).

Ukampis Noé tatas jan ukax Uma Juicios jan utjkaspäna, mä arunxa säwikïspäna ukhaxa inamayaw Pedros Jesusas aka qhipa urunakat parlapxaspäna. Diosar yupaychañ tuqit amuytʼayañat sipansa, jaqinakarux pantjasiyaspänwa ukat Uma Juiciot sipansa jukʼamp jan waltʼäwi jutkani ukat qhispiñat sipansa maysaruw jaqinakar uñtayapxaspäna (2 Pedro 3:1-7).

Kunjamtï markapar walja kuti qhispiykix uka tuqitxa akham sasaw Diosax säna: “Kunjamtï uma juicio urunakanxa Noé chacharux juramentompi arskayäta, jan mayampsa aka uraqirux uma juicio apayaniñataki, ukhamarakiw jichhax juramentompi arsta jumampi jan mayampsa colerasxañaxataki” sasa (Isaías 54:9). Ukhamasti, chiqapuniw Uma Juiciox aka Uraqpach chhaqtayäna, ukat ukhamarakiw Jehová Diosax jupar atinisirinakarux arxatani, munasirakini.