Jan walinak utjipansa, ¿kunjamatsa kusisitaki sarnaqassna?

TAQINIW awisax chuym ustʼayastanxa. Alaxpachankir Jehová Dios Awkirus ukhamarakiw chuym ustʼayapxäna. Sañäni, Egipto markatwa israelitanakar qhispiyäna, ukatxa walja bendicionanakwa churäna, ukampis “[wasitat] wasitatsa, yantʼasipkakïnwa; Israelan Qullanaparuw llakisiyapxana” sasaw Bibliax saraki (Salmo 78:41). Ukampis Jehová Diosax ‘kusisitakipuniw’ jikxatsïna (1 Timoteo 1:11, NM).

Chiqpachansa, kunayman jan walinakaw chuym ustʼayistaspa. Ukampis ¿jan sinti llakisiñatakix kun lurañas wakisispa? ¿Jehová Diosax kunsa chuyma ustʼayatax lurpacha, ukat kunjamsa jupat yatiqassna?

Kunanakas chuym wal ustʼayistaspa

“Jan waltʼañax taqiniruw puri” sasaw Diosan Arupax qhanañchi (Eclesiastés 9:11). Mä akatjamatwa lunthatas jalxatistaspa, kuna chijirus pursna, jan ukax usuntsnasa ukanakaw wal llakisiyistaspa, jan ukax wal chuym usuyassna. Ukat ‘kuna suytʼäwinakatix jan phuqhaski ukax chuyma usuyarakiwa’ sasaw Bibliax saraki (Proverbios 13:12). Awisax wali kusisitaw kuns suytanxa, ukat jan phuqasxi ukhaxa wal llakix apxattasi. Duncan * sat tatat amuytʼañäni. Jupax Diosan arunakapat yaqha markan yatichañwa wal munirïna, ukampis yaqha markan ukham irnaqkasaw chacha warmpach markapar kuttʼxapxañapäna. Ukat akham siwa: “Janis kuna suytʼäwis utjxaspa ukhamwa wal llakista, janipuniw nayrax ukham llakit uñjasirïkti. Janis kunas askïxaspa ukham amuyirïta” sasa. Ukat awisax janiw uka llakinakax mäki apaqtkaspati, kunjamtï Clairex walja tiempo llakit sarnaqäna ukhama. Uka warmix akham siwa: “Usuri jaqïyätwa, paqallq phaxsi usurïxayäta ukhaw wawajax jiwi. Ukhat jichhakamax walja maranakäxchisa, llakisiskaktwa. Awisax wawanakaw nayraqatat arstʼanipxi, ‘wawajax ukchʼarakïspänwa’ sasaw wali llakit jikxatasta” sasa

Awisax yaqhanakaw jan walinak lurapxarakistaspa. Sañäni, inas casarasiñataki uñtʼaskasin ukhar suytʼañax wakischispa, chacha warmi jan waltʼayasiñax utjchispa, wawanakas jan wal sarnaqapxchispa, jan ukax mä munat masis jan walinak lurchistaspa. Chiqansa, taqiniw  pantjasirïtanxa ukat urunakas mayjäxarakiwa, ukhamasti jan walinakan uñjasikipunsnawa.

Ukampis jiwaspach pantjasisarakiw chuym usuyassna. Sañäni, inas examenan jan waltʼayxasax janis kunatakïksna ukham amuyassna, ukat mä irnaqäw jan jikxatasasa jan ukax maynin jan munatas ukhamarakiw jikxatassna. Maysa tuqitsti, mä familiaraw jan ukax mä munat masiw Diosar jan sum yupaychxaspati, ukanakat llakisiñaw utjarakispa. Mariyax akham siwa: “Amuyatax waljamakiw phuchajax sarnaqaskäna. ‘Wali sumsa yatichtxä’ sasaw sayäta. Ukampis Jehová Diosar jan istʼxänti ukat familiansa janirak wal sarnaqxänti ukhaxa, nayas pantjaskirista ukhamwa amuyasta. Inas yaqha tuqinakat suma luratanakax utjaskchi, ukampis inamayäkaspas ukhamawa. ¡Wali llakitapuniw uñjasta!” sasa.

Ukampis ¿kunjamsa ukham llakinakansa nayrar sartsna? Uka jisktʼar qhanañchañatakix kunsa Jehová Diosax jan walinak luratax luri uk uñjañäni.

Jan waltʼäwi askichañataki chʼamachasiñasawa

Jehová Diosax wali sumwa nayrïr chacha warmir uñjäna, ukampis jupanakax jan walinaka lurapxäna, juparuw kutkatapxäna (Génesis, 2 ukat 3 jaljanaka). Tiempompix Cainaw jan walinak lurarakïna, Diosar jan istʼasax sullkapar jiwayäna (Génesis 4:1-8). ¿Jehová Diosax kunjamakis jikxataspachäna?

Ukampis Janiw Jehová Diosax llakimpi atipayaskänti. ¿Kunatsa? Kunattix aka Uraqir jan juchani jaqinakampi phuqantayañatakiw taqi kun luräna (Juan 5:17). Uka amtaniw Yuqapsa khitanïna ukat mä Apnaqäwi uttʼayäna (Mateo 6:9, 10; Romanos 5:18, 19). Jehová Diosax janiw uka jan wali tuqitaki lupʼkänti, jan ukasti kunjamsa askichaspa ukwa lupʼïna.

Kunatix askïki ukanakat lupʼiñasatakiw Diosan Arupax chʼamañchistu, janiw “uk lurasäna” jan ukax “kunatsa ukhamäpacha” sasa aynachtʼañasäkiti. Bibliax akham siwa: “Lupʼipxam kunatix chiqäki, kunatix maynïr aski uñjañäki, kunatix wali sumäki, kunatix qʼumäki, kunatix munkañäki, kunatix aytat luräwinakäki. Lupʼipxam, taqi kunatix sumäki yupaychañatakïki ukanakata” sasa (Filipenses 4:8).

¿Kunjamsa jan walinak uñjañasa?

Kunayman jan walinakaw mä akatjamat sarnaqäwis mayjtʼayaspa. Sañäni, mä akatjamatwa chachas jan ukax warmis chhaqtawayaspa, ukatxa irnaqäwsa jan ukax tama taypin kuna lurañanaksa aptʼasiraksnawa, jan ukax usuntañas utjakirakispawa, ukat inas munat masinak tuqisa jan ukax uta tuqi llakinakas utjarakchispa. Ukampis ukhamankasaxa, ¿kun lurañas wakisispa?

Kunas nayrankañapa ukwa yaqhipax amtapxi, ukhamatwa nayrar sartasipkaki. Duncanatwa parlaskayätanxa, jupax akham saskakiwa: “Diosan arunakapat yaqha markanakar yatiyirix sarañax nanakatakix tukusxänwa, ukax sinti llakipunïnwa. Ukhamasti kunas nayrankañapa ukwa amtapxta: Nayraqatxa mamajar uñjañaw wakisïna, ukatsti Diosatak sapürjam irnaqaskakiñatakiw chʼamachasipxta. Ukampis yaqha lurañanakax utji ukhaxa, kunjamsa uka pä amtarux yanaptʼani jan ukax aynachtʼayani sasaw amuytʼasipxta. Ukhamasti, taqi kunas janiw sinti chʼamäkiti” sasa.

Maysa tuqitxa, niya taqiniw jan walinakan uñjasisax sinti llakisiñ yattanxa. Inas wawanakar sum uywañataki jumax chʼamachasisksta, jan ukax mä irnaqäwi jikxatañatakisa jan ukax yaqha markanakan Diosan arunakap yatiyañatakis chʼamachasiskaraksta, ukat inas amtamarjam jan sum phuqaskchiti. Ukat inas “inamayätwa” sasa amuyasisksta. Ukampis kunjamatï yatktanxa, Diosax janiw jaqinakan qalltatpach jan walinak luratap uñjasax “inamayaw lurpachäta” sasa llakimpi aynachtʼkänati, ukhamasti jiwasax janirakiw qalltan pantjasisax llakimpi atipayasiñasäkiti (Deuteronomio 32:4, 5).

 Ukat yaqhanakan jan wal luratax inas wal chuym usuyasiraksna. Ukampis Jehová Diosax janiw ukhamäkiti. Kunapachatï Davitax mä warmimpi juch luräna ukat uka warmin chachapar jiwayäna ukhaxa, Diosar wal chuym ustʼayäna. Ukampis taqi chuyma arrepintisitapwa Jehová Diosax uñjäna ukat luqtiripakïskänwa. Ukhamarakiw Josafatax Diosan uñisirinakapampi mayachasisax jan wal luräna. Ukatwa Jehová Diosan profetapax jupar akham säna: “Uka laykuwa Tatitux jumampixa colerasixa. Ukampis yaqha suma luratanakamawa jumanxa utji” sasa (2 Crónicas 19:2, 3). Josafat chachax mä kuti pantjasïna ukhaxa, janiw Jehová Diosatakix sinti jan walïkänti. Ukhamasti yaqhanakax pantjasipxani ukhaxa janiw sinti jan walïkaspas ukham amuyañasäkiti, ukham amuyasax janiw munat masinakampis sum apasxsnati. Inas maynix jan walinak awisax lurchistaspa, ukampis askinakax uka munat masin utjaskakiwa (Efesios 4:32).

Chiqpachansa, jan walinakax aka jakäwin utjakipuniniwa. Inas awisax juchachasisin jiwaspachas chuym ustʼayasiraksna. Ukampis jan qarjtasa askinak lurañ amtasaxa nayrar sartaskaksnawa. Kunapachatï Davitax juchachasisin wali llakitäskäna ukhaxa, Jehová Diosaruw  akham sasa mayisïna: “Janchixax kʼachhat kʼachhat aynachtʼaskäna, jaypʼuntañkam ayqutax layku. [...] Jucha lurataxaw utjana, uk amuyasta, ukat jucha luratanakax jan imtʼksmati [...]. Tatay, jumasti juchanakaxat pampachista” sasa (Salmo 32:3-5). Kuntï Diosa maykistu ukanak jan luratas amuyasisax Jupar juchanak pampachita sasa mayisiñasawa, ukatxa kunatix askïki ukanak lurañataki chʼamachasiñasawa, ukat Diosan kamachinakaparjam sarnaqxañataki amtañasawa (1 Juan 2:1, 2).

Jan walinakar saykatañataki jichhatpach wakichasiñäni

Chiqpachansa taqiniw kunayman jan walinakan uñjastanxa. ¿Kunjamsa uka jan walinakar saykatañatakix wakichassna? Ukatakix Bruno tatax kamsis uk amuytʼañäni, jupax chuymankipstatäxiwa, cristianükchisa mä sinti jan walin uñjasisaw nayrjam jan jakxiti. Jupax akham siwa: “Uka llakimpi jan atipayasiñatakix kuntï lurirïkayäta ukxa luraskaktwa, ukaw Diosar yupaychañ tuqit jan aynachtʼañajatakix yanaptʼitu. Ukatxa kunatsa Diosax aka jan wali pachxa jan tukjkpacha akwa yatiraktxa, ukampis walja maranakaw Jehová Diosamp wali sum apasiñatakix chʼamachastxa. Ukatwa wal yuspärtxa, Jehová Diosaw yanaptʼaskitani sasaw atinisiyätxa, ukanakaw llakir atipañ yanaptʼitu” sasa.

Ukampis ak amtañasapuniwa, inas jan walinak lurasin jiwaspachas chuym ustʼayaschiñäni, jan ukax yaqhanakas jan walinak lurapxchistani, ukampis Jehová Diosax janipuniw antutkistaniti. Chiqasa, sutijax “Kunäñtix nayax munkäxa ukaruw nayax tuküxa” sañ muni sasaw qhanañchistu (Éxodo 3:14, NM). Ukhamasti kunatï amtap phuqañatakix munaskanixa ukaruw tukuni. Apnaqäwi tuqiw ‘munañajxa akapachansa, alaxpachansa luräxa’ sasaw arsuwayi. Ukatwa apóstol Pablox akham qillqatayna: “Janiwa kunas Diosan munasiñapatxa apaqkistaspati, janiw jiwañasa, ni jakañasa, ni angelanakasa [...] Diosan munañapatxa apaqkistaspati, uka munasiñsti Cristo Jesús Tatitus tuqwa uñachtʼayistu” sasa (Mateo 6:10; Romanos 8:38, 39).

Ukhamasti, kuntï Isaías profet tuqi arsuwayki uka arunakarux taqi chuymaw atinissna, akham sänwa: “Nayax mä machaq alaxpachampi mä machaq uraqimpi uskü. Kunatix utjkän ukax armatäxaniwa” sasa (Isaías 65:17). ¡Wali askïniwa, akat mä jukʼampirux janiw kuna jan walinaktï tʼaqhisktan ukanakxa amtxañäniti!

[Qhanañchäwi]

[28 janan qhanañchäwipa]

Inas qalltanxa kunas amtasarjam jan phuqaskchi, ukampis janiw inamayäktanti

[29 janan qhanañchäwipa]

Kunatï askïki uk lupʼiñatakiw Diosan Arupax chʼamañchistu, janiw jan walinakat lupʼisax llakisiñasäkiti

[30 janan fotonakapa]

Jaqinakan pantjasipxipansa Diosax kusisitakiwa, kunattix amtapxa phuqapuniniwa

[31 janan fotopa]

Kunatix Diosamp sum apasiñ yanaptʼkistu ukaw nayrankañapa, ukhamatwa llakinakar atipsna