Munat liytʼirinaka

JICHHAT uksaruxa aka revistax mayjtʼayatäniwa, uk yatiyaniñ munapxsma. Ukampis kunas pachpakïskani ukwa nayraqat qhanañchtʼaniñ munapxaraksma.

Yatiyañataki. Jehová Diosan Apnaqäwipat yatiyaski satakïskaniwa. Ukhamasti, Jehová Diosaruw chiqpach Diosarjam jachʼañchaskakini, ukatxa Apnaqäwipat yatiyasarakiw liytʼirinakar chuymachani. Kunjamatï aka qillqatanxa 18 ukat 19 jananakan Diosan Apnaqäwipat sum qhanañchkixa ukhama. Ukatxa janiw ukakïkaniti, kunjamtix nayratpach Jesucristor iyawsañataki chʼamañchkixa ukhamarakiw chʼamañchaskani, Diosan chiqa yatichäwinakapsa arxataskarakiniwa, ukat profecianakax kunjamsa jichhürunakan phuqasiski uksa sum qhanañchaskarakini.

Ukhamasti, sapa kimsa phaxsin mistunkani uka aymar revistanxa kunanakas mayjtʼayatäni ukanak jichhax uñjañäni. *

Awisaxa mä tuqitaki qhanañchtʼir wakichäwinakaw utjarakini. “¿Yatiyätati?” siski ukaxa Bibliat sum amuytʼañasatakiw yanaptʼistani. “Diosar jakʼachasipxam” siski ukasti Jehová Diosat parlir chiqanakwa Bibliat sum qhanañcharakini. Ukat “Kunsa liytʼirinakax yatiñ munapxi” siski uka wakichäwisti, kuntï wal yatiñ munktanxa uka tuqinakatwa Bibliampi qhanañcharakini.

Awisaxa, “Familianakataki” siski ukarakiw utjani; ukanxa kuna jan walinakansa familianakax uñjasi ukat kunjamsa Bibliax uka jan walinak askichañ yanaptʼistaspa ukanakatwa qhanañcharakini. Ukat “Wawanakar yatichañataki” siski uksti awk taykanakaw wawanakapamp chika liytʼapxarakispa. Maysa tuqitsti, “Wayn tawaqunakataki” siski uka wakichäwix wali askirakïniwa, ukhamasti jupanakatakjam wakichatäniwa, ukhamata jupanakas Bibliat yatxattʼapxarakispa.

Ukat yaqha wakichäwinakarakiw awisax utjani. “Jupjam iyawsäwinïpxañäni” siski ukaxa, Biblian qillqatäki uka jaqinakat yatiqasiñatakiw chʼamañchistani. Kunjamatï aka pachpa qillqatan Elías profetat wali muspharkañ parlixa ukhama, ukax 14-17 jananakankiwa. Kunajamtsa jupanakjam iyawsäwinïsna ukawa sum uñachtʼayistani. Ukat “... qillqata” siski ukansti misioneronakan jan ukax yaqha chiqanakar khitat jilat kullakanakan qillqanitanakapaw uñstarakini. Ukampis Biblian qallta yatichäwinakap sum qhanañchtʼañatakix “Jesusan yatichäwinakapa” siski ukaw utjarakini.

Chiqansa, Yatiyañataki sat aka revistax Bibliar respetirinakatakisa jan ukax kunsa Bibliax chiqpachapuni yatichpach uk yatxatañ munirinakatakisa wali wakisirikïskaniwa. Bibliat yatxatañ munirinakar aka qillqatax wal yanaptʼaspa ukwa wal munapxta.

QILLQIRINAKA

[Qhanañchäwi]