Wawanakar yatichañataki

Timoteo: Diosar luqtañatakix wakichtʼatapunïnwa

AWISAX “¿niyäxtati?” sasaw jisktʼapxirïpachätamxa. Ukampis wakichatäxtati janicha uk yatiñatakiw ukham jisktʼapxirïpachätamxa. Inas “¿libronak escuelar apasktati? ¿Yatiqawaytati?” sañ munapxstma. Timoteox ukham wakichtʼatarakïnwa Diosar luqtañatakixa, uka tuqitwa jichhax uñjañäni.

Ukatxa, janiw pä chuymaki luqtkänti. ¿Kunjamsa luqtpachäna uk yattati?... Kunapachatï Timoteorux Diosar luqtir sarañäni sapxäna ukhaxa, Diosan mayni luqtiripjamarakiwa: “Akankasktwa nayax, nayar khitasita” sänxa (Isaías 6:8). Niyakixay Diosar luqtañatakix wakichtʼatächïnxa, ukhamax wali sumanakwa jakäwipanxa jikxatäna. ¿Kunanaksa jikxatpachäna uk yatiñ munasmati?...

Timoteox Listra markanwa yurïna, uka markax Jerusalenatxa wali jayapunïnwa. Loida awichapampi ukat Eunice mamapampixa wali sumwa Bibliat yatiqapxäna, ukhamatwa Timoteor jiskʼatpach Diosan arunakapatxa yatichapxarakïna (2 Timoteo 1:5; 3:15).

Kunapachatï apóstol Pablompi Bernabeyampix nayrïr saräwin Listra markar Diosan arunakap yatichir sarapkäna ukhaxa, Timoteox qʼaxu waynitüskpachänwa. Inas ukharaki mamapampi awichapampix cristiano tamar mantxapxchïna. ¿Kuna jan walinsa Pablompi Bernabeyampix uñjasipxpachäna uk yatiñ munasmati?... Cristianonakar uñisir jaqinakaw Pablor qalampi kʼupjapxatayna, liwnuqasinwa jiwatäxpachaw sasa markat qatatsunipxatayna.

Ukampis arunakap istʼir jaqinakaw jupar uñjir sarapxarakïna, ukatwa Pablox sarthapxäna. Qhipüruw Pablompi Bernabeyampix sarxapxäna, ukampis mä qhawqha tiempotwa uka pachpa markar kuttʼapxäna. Ukatsti akham sasaw arstʼäna: “Diosan markapar mantañatakixa, tʼaqhisiñax wakisipuniwa” sasa (Hechos 14:8-22). ¿Kamsañs Pablox munäna uk yattati?... Yaqhanakaw Diosan luqtirinakaparux jan walinak lurapxani, uk sañ munäna. Ukatxa, khitinakatix Diosan munañaparjam sarnaqañ munapki ukanakaxa arknaqataw uñjasipxani sasaw Pablox Timoteor qillqarakitayna (2 Timoteo 3:12; Juan 15:20).

 Listrat sarxasaxa Pablompi Bernabeyampixa utaparuw kuttʼxapxäna. Mä qhawqha phaxsitxa, Pablox Silasamp chikaw kawkintï nayrax Diosan arunakap yatichkäna uka chiqanakar kuttʼapxäna machaqanakar yanaptʼañataki. Ukat Listra markar sarapxäna ukhaxa, ¡wal Timoteox jupanakar uñjasax kusispachäna! Ukat Pablompi Silasampix nanakamp chika sarañäni sasaw jupar sapxarakïna, uk istʼasax jukʼamp kusispachäna, ukatwa iyaw satayna. Ukhamasti sarañatakix wakichtʼatänwa, taqi chuymarakiw sarxarüna (Hechos 15:40–16:5).

Kimsanpachaw wali jaya sarapxäna, ukat botet sarapxarakïna, botet saraqasasti Tesalónica (Grecia) markar puriñkamaw kayuki jaya sarapxarakïna. Ukanxa waljaniw cristianor tukupxäna, ukat yaqhipasti jan istʼañ munasarakiw nuwasiñ munapxäna. Ukhamasti kimsanpachaw jan walin uñjasisax Berea markar sarxapxäna (Hechos 17:1-10).

Ukampis Tesalónica markankir machaq jilat kullakanakatwa Pablox llakisïna, ukatwa Timoteor mayampi khitäna. ¿Kunatakis khitpachäna uk yattati?... Iyawsäwin chʼamachtʼañataki, chuymachtʼañataki ukat jan aynachtʼapxañapatakiw khitanta sasaw Pablox mä jukʼampir uka jilat kullakanakar säna. ¿Kunatsa Pablox jan walinak utjkipansa Timoteo waynar khitpachäna uk yattati?... Uka jan wali jaqinakax janiw Timoteor sum uñtʼapkänti, ukat jupax sarañatakix wakichtʼatänwa. Ukham sarañatakix jan axsartʼirïñaw wakispachäna. ¿Kunjamakis uka jilat kullakanakar tumptʼpachäna? Timoteox Pablon ukar kuttʼäna ukhaxa, wali sum Tesalonikankirinakax sarantasipki sasaw yatiyäna, ukatwa Pablox akham sasa jupanaka qillqat apayäna: “Chuymachäwi katuqapxtxa” sasa (1 Tesalonicenses 3:2-7).

Ukat uksaruxa niya tunka maranakaw Timoteox Pablor yanaptʼäna. Ukatsti Pablox carcelan katuntataw uñjasirakïna, ukat Timoteox niya mistuñampïxchïnsa, janiw Pablor sapaki jaytjkänti. Ukhamasti carcelankkasaw Pablox Filipos markankir jilat kullakanakataki qillqpachäna, inas amuyunakap Timoteompi qillqaychïna. Timoteo khitaniñ munaskayäta, jupax wali chiqa chuymaniwa, janiw jupjamax khitis luqtkaspati sasaw uka qillqatanxa jupanakar säna (Filipenses 2:19-22; Hebreos 13:23).

¡Uka arunak istʼasax wal Timoteox kusispachäna! Pablox wal Timoteor munasïna, kunattix Diosar taqi chuyma luqtañatakix wali wakichtʼatänwa. Jumax ukham wakichtʼasirakisma ukhaxa wali askipunïspawa.

Jisktʼanaka:

○ ¿Kawkinsa Timoteox jilsüna, ukat Pablox uka chiqar saräna ukhax kunas kamachäna?

○ ¿Pablompi Silasampi chika sarañat yatisax Timoteox kamachänsa?

○ ¿Kunjamsa Timoteox jan axsartʼirïtap uñachtʼayäna, ukat kunatsa Pablox jupar wal munasïna?

[12 janan fotopa]

¿Kunas akan kamachaski?