Jakäwix kunja askis uk yatiqawayta

2007 MARAN 16 URUNAK ABRIL PHAXSIT SARAQKÄNA UKA URXA JANIPUNIW ARMKÄTI. Norris Hall jachʼa altus utan kimsïr pison imantatäskayätwa (Virginia Tech, Estados Unidos). Uka urux jakäwinx wasitatampwa yatiqañajänxa kunatsa sapa uru jakäwit yuspärañasa ukxa.

Payïri pisot correo aptaniñatakiw niya oficinajat mistsuskayäta ukhaw mä yatichirix computadorajampi yanaptʼita sas jawsawayitu. Kimsïr pison oficinapar janïr mantkapkayäta ukhaw payïr pison pistolamp illaptʼasirinakax istʼasïna. Ukhamax jankʼakiw oficinar mantasax punku jistʼantasinipxta. Janiw kuna pasatapsa yatipkayätti. Kunakis pasani sasaw walpun sustjasipxta. Ukat mä kʼuchur imantasisaw uka jan waltʼäwit mistuñatakix Jehová Diosar taqi chuyma mayista.

Ukhamäkipanxa mä chijit amtasiyäta, auto askichirit irnaqayäta ukat jichhakamax niya tunka phisqan maranakäxiwa. Mä uruxa, irnaqir masijaw gasolinani mä valde apnaqaskäna ukat akatjamat ninax naktatayna. Ukat sustjasisaxa, jan amuyump liwtasaw uka nina nakkir valdempixa ajanur puriyasin niya chika cuerpkam nakhantayitu, ukat niyarakiw axskatta. Ukatxa, helicopterot apapxitu hospitalan ninamp nakharatanakar qullapki ukaru, niya kimsa phaxsi chikaniw jiwirjam ukankawayta. Phisqa phaxsi qullatatxa, walirtawayasin utajaruw kuttʼawayxta jakäwijat Diosar yuspärasa. Uka chijisti, jakäwix wali askit uñjañwa yatichitu. Janir uka chiji paskipansti, nayax Jehová Diosan Qhanañchiripäxayätwa. Uka chiji pasitu ukhatwa wali amuythapisisa jukʼampi Diosar luqtañ amtawayta, kunattix Jupawa jakäwi nayaru churitu (Salmo 90:12; Isaías 43:10).

Ukham ninamp nakharayata usuchjatäsinxa janiw autonak askichirjamäxayätti, ukatwa computadoranak askichañ yatiqawayta. Computadoranak askichañ yatitax laykuw Virginia Tech, Norris Hall sat jachʼa altus utan computadoranak askichañatakix tiempompix jawsapxitäna. Ukatwa uka alwax uka altusankaskayäta.

Ukhamaxa, ¿kunas payïr pisonx pasaskpachänxa? Estados Unidos sat markpachatakiw wali muspharkañapunïnxa. Mä jaqiw payïr pisor makatasin pistolampi kimsa tunka payan jaqinakar jiwarayatayna, ukatxa jupa pachpaw jiwayasirakitayna. Pä tunka minutonakatxa, policianakaw purinipxatayna, jupanakaruw jawsapxta ukat uka jachʼa altus utat apsusin yaqha chiqaruw irpapxitu.

Ukham jan waltʼäwin uñjasisaw jiwañax akchʼankakitapa amuyta (Santiago 4:14). Ukhamasti jakäwi churiri Jehová Diosar atinisiñax wali askipuniwa, ukatwa sapürunjam jakäwis sum uñjañatakix chʼamachasiñasa (Salmo 23:4; 91:2).

[28 janan fotox khitin apsutasa]

AP Photo/The Roanoke Times, Alan Kim