Jesusan yatichäwinakapa

Kunjamsa jaqi masisar uñjañasa

¿Kunatsa khuyapayasirïñasa?

¿Yaqhan jan walinak luratax jumax kamachirïtasa? Jesusjam sarnaqañ munasaxa taqiniw khuyapayasirïñasa, khitinakatix jan wal lurapkistu jan ukax uñisipkistu ukanakarus khuyaptʼayañasawa. Jesusax akham sänwa: “Jumanakatix munapxsta khitinakatix munapktam ukanakaruki ukaxa, ¿kuna sumsa lurapxta? Juchararanakas ukxa luraskarakiwa. [...] Ukampis jumanakax uñisirinakamarux munapxañanakamawa [...] jumanakasti Alaxpach Dios Awkin wawanakapäpxätawa. Diosax khuyapayasirirakiw, jupar jan yuspagaririnakatsa, juchararanakatsa” sasa (Lucas 6:32-36; 10:25-37).

¿Kunatsa yaqhanakan juchap pampachañasa?

Juchar purtʼastan ukhaxa, Diosan perdonatäñwa muntanxa. Ukat Jesusax uka tuqit mayisiñwa yaticharakïna (Mateo 6:12). Ukampis khitinakatix yaqhanakar juch pampachapki ukanakakiw perdonatäpxani sasaw säna. Akham qhanañchäna: “Jumanakatix jan wali luratanakapat masinakamarux perdonapxäta ukkhaxa, alaxpachankir Awkimax jumanakarux perdonapxarakïtamwa. Masinakamar jan  perdonapkäta ukasti, jumanakan Awkimasti janirakiw kuna juchanakamatsa perdonapkarakïtamti” sasa (Mateo 6:14, 15).

¿Kunjamatsa familian sum jakassna?

Jesusax janis jaqichatäkchïnxa, taqiniw familianxa jupat yatiqsna. Ukhamasti, yatichäwinakapatsa sarnaqäwipatsa kimsa askinakwa jikxatsna:

1. Chachax warmipar wal munasiñapa. Jesusax wal yaqhanakar munasïna, ukwa chachanakax yatiqasipxaspa. Akham sänwa: “Machaq mandamientwa churapxsma: Maynit maynikama munasipxam” sasa. Ukatxa “kunjämtix nayax munasipxsma” ukham munasipxam sasaw sarakïna (Juan 13:34). ¿Jaqichat chachanakax kunjamsa uka arunakarjam sarnaqapxaspa? Bibliax akham siwa: “Chachanaka, munasipxam warminakamaru, kunjämtix Cristox [tamaru, NM] munasi, ukhamarak jakañapsa jupa layku aptʼasiwayi ukhama. Ukhamwa chachax warmiparux munasiñapa, pachpa janchiparjama. Khititix warmiparux munaski ukax jupa pachpaw munasi. Janiw khitis pachpa janchiparux uñiskiti, jan ukasti manqʼayiwa ukhamarak imaraki. Cristox uka pachparakiw iglesiampix luri” sasa (Efesios 5:25, 28, 29).

2. Jaqichatäkasin yaqhampi ikintasiñax janipuniw walïkiti. Khitinakatix jaqichatäkasin wachuq juchan sarnaqapki ukanakax Dios contraw juch lurapxi, ukatxa familiapsa jan waliruw puriyaraki. Ukat Jesusax akham säna: “¿Janit jumanakax Diosan arunakapana leetʼapkta[?] [...]: Ukatwa chachax awkiparu taykaparu jaytanukusin warmipampi mayachasxani, panipasti mayakïxarakiniwa. Ukhamasti janiw paninïkxapxiti jan ukasti mayakïxapxiwa. Ukhamax jaqix janiw jaljtaykaspati kuntix Diosax mayachkis ukxa. [...] Nayasti sapxsmawa, khititix warmiparu jan wachuqa juch lurkipana apanukuxa, ukat yaqhampi casarasirakixa, uka jaqix wachuqa juchwa luri” sasa (Mateo 19:4-9).

3. Wawanakax awk taykar istʼapxañapawa. Jesusax janis pantjasirïkchïnxa, jucharar awk taykapar istʼapunirïnwa. 12 maranïkän ukhaxa, awk taykapamp chikaw “Nazaretarux kuttxäna, ukatsti jupanakar istʼasaw sarnaqäna” sasaw Bibliax qhanañchi (Lucas 2:51; Efesios 6:1-3).

¿Kunatsa uka yatichäwinakarjam sarnaqañasa?

Jesusax arkirinakapar akham sänwa: “Akanaktix amuytʼapxäta, ukat lurapxarakïta ukaxa, kusisitäpxätawa” sasa. Ukhamasti jupan yatichäwinakaparjam sarnaqañasawa (Juan 13:17). Chiqansa, kunjamtï Jesusax yatichkäna ukham jaqi masisar uñjañäni ukhaxa, chiqpach cristianütaswa uñachtʼayañäni, ukatwa jupax akham säna: “Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:35).

Jukʼamp yatxattʼañatakix ¿Kunsa Bibliax chiqpachapuni yatichi? * sat libronwa 14 jalja uñxattʼäta

[Qhanañchäwi]

[14, 15 jananakan fotopa]

Khuyapayasirïñasawa ukat mayninakan juchap pampachañasarakiwa, ukwa herencia tukuntir waynan sarnaqäwipat yatiqtanxa (Lucas 15:11-32)

[15 janan fotopa]

Jaqichatanakax janiw wachuq juchan sarnaqapxañapäkiti