Infiernot sum yatxatasax Diosaruw jakʼachastanxa

DIOSAX chiqapätap laykuw jan wali jaqinakar tukjani, ukampis janiw khitirus nina aqkir infiernon tʼaqhisiykiti sasaw Bibliax yatichi, ukhamasti khitinakatix nina aqkir infiernow utji sasin yatichapki ukanakaxa, jan walitwa Jehová Diosar uñtʼayapxi, wali qhurükaspas ukhama (2 Tesalonicenses 1:6-9). Ukatxa janirakiw Diosax chiqapätap laykukix kunsa lurkarakiti.

Diosax janiw jan sinttʼasiri wali qhurükiti. Arupanxa akham sistuwa: “Janiw nayax ñanqha jaqin jiwañapxa munkti” sasa (Ezequiel 18:23). Chiqansa Diosax ñanqha jaqinakan jiwañapxa janiw munkiti. Ukhamasti, ¿kunjamaraki infiernon wiñay tʼaqhisiyañ munaspasti?

Diosax wali munasiriwa sasaw Bibliax qhanañchi (1 Juan 4:8). Jïsa, “Tatitux taqinir munasiriwa, taqpach luratanakaparux munasiñampiw uñji” (Salmo 145:9). Ukat jiwasax jupar taqi chuyma munasiraksna ukakwa mayirakistu (Mateo 22:35-38).

¿Infiernor axsarañasati jan ukax Diosar munasach sarnaqta?

Infiernonsa almanakax tʼaqhisisipkaspa ukham amuyirinakaxa, Diosax wali qhurükaspas ukham axsarapxi. Ukampis ukax janiw walïkiti, Diosaruch chuym ustʼaykä sasin axsarayasiñax mayjawa. Kunapachatï maynix Diosar chuym jan ustʼayañ munki ukhaxa, jan walinakatxa wal amuyasi, ukhamatwa Diosar respeto uñachtʼayi, janiw wali axsartʼas sarnaqkiti. Chiqansa, khitinakatix Diosar sum uñtʼapki ukat munapxaraki ukanakaxa Diosaruch jan walinak lurasin chuym ustʼaykä sasaw axsarayasipxi. Kunjamtï Salmo 111:10 jiskʼa tʼaqax siskixa: “Yatiñ kankañan qalltapax, Tatitur axsartañawa” ukarjam sarnaqirinakaw yatiñkankañ uñachtʼayapxi.

Kathleen sat 32 marani warmit parltʼañäni, jupax droganakampiw nayrax qulljasiritayna, ukampis infiernot chiqa yatxatañaw jupar wal yanaptʼatayna. Jupax sinti jan walinakpunwa nayrax luriritayna, nuwasiri, jan walinak parliri, qʼañu luräwinakan sarnaqiri ukhamänwa, ukat jupa pachas wal uñisisirakïna. Ukat mä marani jiskʼa imill wawap uñjasax akham sasaw sirïna: “Ak luratajastï. Infiernon tʼaqhisïxa” sasa. Ukampis walja kutiw uka jan wali qullanak jaytxañ amtatayna, ukampis janiw jaytirjamäkänti. Ukat akham saskakiwa: “Aski jaqïñ munirïtxa, ukampis jakäwijasa taqi kunasa inamayäkaspas ukham amuyasirïta. Janiw kuna yanapas utjirïkiti” sasa.

Ukatxa Jehová Diosan Qhanañchirinakaparuw uñtʼarakitayna. Ukat akham siwa: “Infiernox janiw utjkiti sasaw Bibliat yatichapxitu. Wali sum amuytʼayapxitu. Ukat ¡janirakis infiernon tʼaqhiskätixä sasaw wal kusisirïta!” sasa. Ukatxa kunjamas jaqinakax aka Uraqin wiñaya mä paraison sum jakasipxaspa uka tuqitwa yatichapxarakitayna (Salmo 37:10, 11, 29; Lucas 23:43). “Akaxay mä suytʼäwixa: mä paraison suma jakasiñarakis utjaskataynaxä” sasaw sarakïna.

Ukhamasti janiw infiernon tʼaqhisiñax utjkiti, ukampis ¿uk yatiñax Kathleenar droganak jaytañ yanaptʼänti? Jïsa, ukat akham siwa: “Uka droganak munirjamäxta ukhaxa Diosaruw yanapa maytʼasta, sapa kutiw ukham lurtxa. Ukat Dios nayraqatan kunja jan walis ukham qulljasiñaxa uk amthapisirïta, ukat janirakiw chuym ustʼayañ munkayätti. Jupax mayisitanakajarjamax yanaptʼapunituwa” sasa (2 Corintios 7:1). Jïsa, Diosar jan chuym ustʼayañ laykuw Kathleenax uka jan wali qullanak jaytxäna.

Ukhamasti, Diosar wal munasitas laykuwa, mä arunxa, jupar jan chuym ustʼayañ laykuw munañapxa taqi chuym lurtanxa, janiw infiernoncha tʼaqhiskä sasakix axsarayasisa luqtktanti. Jïsa wiñayaw wali kusisita jakasxañäni. Kunjamtï Salmo 128:1 jiskʼa tʼaqax siskixa, ‘Tatitur axsartʼir jaqix kusisiñaniwa, Tatitur jaysir jaqisa kusisiñanirakiwa’.