Jesusan yatichäwinakapa

Jiwatanakataki mä suytʼäwi

Jesusax kimsa jiwatanakaruw aka Uraqinkkasax jaktayäna, ukhamatwa jiwatanakataki mä suytʼäwi utjatapxa uñachtʼayäna (Lucas 7:11-17; 8:49-56; Juan 11:1-45). Ukampis kunjamatsa jiwatanakax jaktanipxani uk sum amuytʼañatakixa, kunatsa jiwañax utji uk nayraqat amuytʼañäni.

¿Kunatsa usuntañas jiwañas utji?

Kunapachatï Jesusax usutanakan juchanakap pampachäna ukhaxa kʼumaraptapxänwa. Mä kutix jan sartkir mä jaqi jupan ukar apapxatayna, ukat akham sänwa: “¿Kunas jukʼamp jasakixa: ‘Juchanakamax perdonatawa’ sañati, jan ukax: ‘Sartam ukatsti sarnaqarakim’ sañacha? Walikiwa, jichhasti uñachtʼayapxämawa Jaqin Yuqapax munañanïtapa akapachan juchanak perdonañatakixa” sasa. “Uka suchu jaqirusti sarakïnwa: ‘Sartasim, ikiñam apthapisisinsti utamar sarxam’ sasa” (Mateo 9:2-6). Ukhamasti juchanïtas laykuw usuntañarus jiwañarus purtanxa. Ukatxa taqinirakiw juchanïtanxa, kunattix Adán sat nayrïr chachaw juchar aptʼawayistu (Lucas 3:38; Romanos 5:12).

¿Kunatsa Jesusax jiwäna?

Jesusax janipuniw juchanïkänti, ukhamax janiw jiwañapax wakiskänti. ¿Ukhamax kunatsa jiwäna? Jiwas laykuw jakañap luqtasiwayi, mä arunxa, juchasat kutsuyañatakiw jiwawayi. “Walja jaqinakar juchanakapata qhispiyañataki[w]” wil wartasïxa sasaw säna (Mateo 26:28).

Ukat mä kutix akham sarakïnwa: “Jaqin Yuqapax janiw serviyasiñatak jutkiti jan ukasti serviriw juti, ukhamarak jakañap churiri walja jaqinakar qhispiyañataki” sasa (Mateo 20:28). Diosar jakañap luqtasaw Jesusax walja jaqinakar jiwañat kutsuyañampïskäna, ukatwa ‘qhispiyasiñ’ tuqit parläna. Ukatxa, “nayax juttwa jakañanïpxañamataki, ukhamarak jilarkir jakañanïpxañamatakiraki” sasaw sum qhanañchäna (Juan 10:10). Ukampis jiwatanakax kunjamsa jaktanipxani uk sum amuytʼañatakixa, jichhax kunjamas jikxatasipxi uk sum yatxatañasawa.

 ¿Jiwatanakax kunjamäsipkisa?

Kunapachatï Jesusan Lázaro amigopax jiwxäna ukhaw kunjamas jiwatanakax jikxatasisipki uka tuqitxa sum qhanañchäna. Akham sasaw arkirinakapar säna: “‘Lázaro amigosax ikiskiwa, ukampis nayax sartayanïwa’ sasa. [...] Discipulonakapasti amuyapxänwa chiqpach ikiskatapa. Ukatwa Jesusax jupanakarux qhan sarakïna: ‘Lazarox jiwatäxiwa’ sasa”. Ukhamasti jiwatanakax ikisipkaspas ukhamaw jikxatasipxi, mä arunxa, janiw kunsa amuyasipkiti, ukwa Jesusax sum qhanañchaskäna (Juan 11:1-14).

Lazarox niyaw pusi uru jiwatäxäna ukhaw Jesusax jaktayaskäna. Ukampis Lazarox janiw kunjamas jiwatanakax jikxatasisipki uka tuqinakat parlkänti, Bibliax janiw uka tuqit kamskisa. Kuna laykutix jan amuyuniw jaqusiskäna, janiw kuns uñjkänti ni istʼkarakïnsa (Eclesiastés 9:5, 10; Juan 11:17-44).

¿Jiwatanakatakix kuna suytʼäwis utji?

Jiwatanakax jaktanipxaniwa, ukatxa aka Uraqin wiñay jakasxapxani. Jesusax akham sänwa: “Horasax purininiwa taqi jiwatanakasti [aruj] istʼapxaniwa. Ukatsti uka jiwatanakax jaktapxaniwa” sasa (Juan 5:28, 29).

Jïsa, uka suma suytʼäwi churasaw Diosax wali jachʼa munasiñapxa uñachtʼayistu. Kunjamtï Jesusax siskänxa: “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” (Juan 3:16; Apocalipsis 21:4, 5).

Jukʼamp yatxatañatakixa ¿Kunsa Bibliax chiqpachapuni yatichi?, uka libronwa suxtïr jalja uñxattʼäta. *

[Qhanañchäwi]