Wawanakar yatichañataki

¿Joseyan envidiasir jilanakapat kuns yatiqsna?

¿KUNAS envidiasiñaxa uk yattati? Amuytʼañäni: maynirux wali khusätawa, janiw khitis jumjamäkiti sapxaspa ukhaxa, ¿jumax uk uñjasin colerasismati? *... Jïsa ukaw envidiasiñaxa, mä arunxa yaqhanakar munapayañawa.

Ukat mä familian awk taykax mä wawaruk wali sum uñjapxaspa ukhaxa mayninakax colerasipxaspawa. Mä familiaw ukham jan walin uñjasitayna sasaw Bibliax parli. Ukhamasti kunas kamachatayna uk uñjañäni, ukatxa kunsa yatiqsna uksa amuytʼarakiñäniwa.

Jacob tatax walja yuqanakanïnwa, ukat Joseyax niya sullkänwa, ukampis jilanakapax wal jupar uñisipxäna. ¿Kunatsa uñisipxpachäna uk yattati?... Joseyax tatapan wali munatänwa. Ukatwa jupatakix mä suma isi lurayarapitayna. Chiqansa Jacobux niya “chuymanïxän” ukhaw wali munat Raquel warmipampix uka wawanïpxäna, ukatwa Joseyar wal munaspachänxa.

Kunapachatï Joseyax tatapan wali ‘munatätap’ amuyapxäna ukhaw jilanakapax jupar wal uñisiñ qallantapxäna sasaw Bibliax uñachtʼayi. Ukat mä kutixa kunjamas jilanakapasa awkipasa jupa nayraqatan qunqurtʼasipxani uka tuqitwa samkasitayna, ukwa jupanakar mä urux yatiyäna. Uk istʼasax “jilanakapasti walipuniw envidiasipxäna”, ukat Jacob tatapax kunatsa ukham parlta sasaw phiñasirakïna (Génesis 37:1-11).

Ukat mä kutixa jayanwa Joseyan jilanakapax uwijanak ukat cabritonak awatisipkäna, uka tiempotakix niyaw Joseyax 17 maranïxäna. Ukatsti jilanakamar uñjanim sasaw tatapax Joseyar khitarakïna. Ukat ¿jilanakapax purinir uñjasax kunsa amtapxäna uk yattati?... ¡Jïsa, jiwayañ amtapxäna! Ukampis Rubén ukat Judá jilanakapaw jan jiwayapxañapatakix jarkʼapxäna.

 Ukäñkamasti Egipto markar sarir alakipanakaw uka chiq sarasipkarakïna, ukhamasti uk uñjasax ‘aljapxañäni’ sasaw Judá jilapax säna. Ukatwa Joseyar aljantapxäna. Ukxarusti mä cabrito jiwayasinwa Joseyan suma isipa wilar chillsupxäna ukat awkipar uñachtʼayapxäna, uk uñjasasti akham sasaw tatapax artʼasïna: “Kuna monte animalay wawaxarux jiskʼa jiskʼa wikanuqasin manqʼantchi” sasa (Génesis 37:12-36).

Joseyax wali suma jaqitwa Egipton faraonampix uñtʼayasxäna. ¿Kunjamatsa wali askit uñtʼayaspachäna? Kunattix uka apnaqirin pä samkapwa Diosan yanaptʼatax sum qhanañchatayna. Nayrïr samkanxa paqallq suma likʼi wakanakampita, jan wali tʼukha wakanakampitwa samkasitayna. Ukat payïr samkansti paqallq suma puqurat puyanakampi ukat paqallq wali chʼusu puyanakampi uñjarakitayna. Uka pä samkanakax paqallq maranakaw manqʼax wali sum achuni ukat paqallq maranakarakiw machʼax utjani sasaw Joseyax qhanañchäna. Ukhamasti uk yatisaxa, Joseyaruw uka suma paqallq maranakan manqʼa apthapiñapataki faraonax uttʼayäna.

Ukhamaw maranakax saraskäna, machʼa maranakax qalltxänwa, ukäñkamasti niyaw Joseyan familiapax manqʼat pistʼasipkarakïna. Ukatwa Jacob tatax Egipto markat manqʼa alanipxam sasin jilïr yuqanakapar khitänxa. Ukat Joseyan ukar puripxäna ukaxa janiw sullkapar uñtʼxapxänti. Ukhamasti uka jan wali luratanakapat arrepentisitäpxiti janicha uk yatiñatakiw Joseyax jilanakapar yantʼäna. Ukat suma chuymanïxapxatap amuyasaxa, nayax Joseyätwa sasaw jilanakapar säna, ukat wal jupanakar qhumantäna. ¡Taqinis wal kusisipxäna! (Génesis 40 jaljata 45 jaljakama.)

Ukampis ¿invidiasiñ tuqitxa kunsa aka sarnaqäwix yatichistu?... Jïsa, kunapachatï envidiasiñampi apayastan ukat uñisiraktan ukhaxa jan walinakwa lursna. Kunjamtï uñjktanxa, ¡maynix pachpa jilaparus ukham jan walinakwa luraspa! Jichhax Hechos 5:17, 18 ukat Hechos 7:54-59 qillqatanak liytʼañäni. ¿Kunsa uka jaqinakax Jesusan arkirinakapar envidiasiñat lurapxatayna?... ¿Kunatsa jan envidiasiñasäki uk amuytati?...

Joseyax 110 maranakaw jakäna, ukhamasti wawanakani allchhinakani ukhamaw jakasïna, allchhinakan wawanakapsa uñtʼawayarakïnwa. Chiqansa Joseyax jupanakkam wali sum apasiñwa wawanakaparux yatichpachäna, janiw maynit maynikamax uñchʼukisipxañamäkiti sasas yaticharakpachänwa (Génesis 50:22, 23, 26).

[Qhanañchäwi]

Jisktʼanaka:

○ ¿Envidiasiña siski ukax kamsañsa muni?

○ ¿Kunsa Joseyan jilanakapax uñisiñat lurapxatayna?

○ ¿Kunatsa Joseyax jupanakarux pampachäna?

○ ¿Kuns aka sarnaqäwit yatiqawayta?