Mä awkix kunjamatsa wawanakapar sum uñjaspa

“Awkinaka, jan wawanakamampix sinti qhurüpxamti jan jupanakan mayjtʼasipxañapataki.” (Colosenses 3:21)

CHIQANSA, janiw khiti awkis wawanakapar mayjtʼayaña jan ukax colerayañ munkiti. Ukampis ¿jan mayjtʼasipxañapatakix kun lurañas wakisispa? Nayraqatxa, awkjamax kunsa lurañama uk sum amuyañamawa. Amuytʼasiñ tuqit parlir mä revistax akham siwa: “Kunjamxay awkix wawanakar uywchi ukarjamaw wawanakax amuytʼasiñsa jan ukax kunjam chuymanïñsa yatiqapxi” sasa.

Ukampis ¿mä awkix kuns lurañapa? Yaqhip familianakanxa awkix wawanakar chiqachirikïkaspas ukham amuyapxi. Ukatwa taykanakax wawanakapan jan walinak lurir uñjasax akham sañ yatipxi: “¡Tatamak purinpan ukhaw yatïta!” sasa. Chiqansa wawanakar sum chiqañchañaxa wali askiwa, ukhamatwa jupanakax wali amuytʼasirïpxani. Ukampis mä awkix janiw ukaki lurañapäkiti.

Maysa tuqitxa, yaqhip awkinakax jan awk taykaniw jilsuwayapxi, ukhamax janiw awkin uywatäñxa yatipkiti. Ukat yaqhipasti wali qhuru awk taykan uywatax ukham qhurüpxarakiwa, jan sinttʼasisaw wawanakapar uñjapxi. Ukampis ¿ukham awkinakax kunjamatsa wawanakapar sum uñjapxaspa?

Biblianxa wali suma iwxanakaw taqi familianakatak utji. Janiw jaqinakan amuyupakïkiti, jan ukasti familia uttʼayiri Jehová Dios Awkin amuytʼayatawa, ukhamax jiwasan askisatakiwa (Efesios 3:14, 15). Chiqansa, taqi awkinakaw wawanakar sum uywañatakix Bibliat yatxatapxañapa. *

Kunapachatï mä awkix wawanakapar sum uñji ukhaxa, janiw wawanakax jañchi tuqitaki ukat amuyasiñ tuqitaki sum jiltapkiti, jan ukasti Diosar yupaychañatakisa suma amuyunïpxarakiwa. Mä wawax tatapampi sum apaski ukhaxa, wali sumarakiw Diosampix apasispa. Kunjamtï Bibliax siskixa, Jehová Diosan luratätanwa, ukhamasti jupaw jiwasan Awkisaxa (Isaías 64:8). Jichhasti kunanaksa awkinakax wawanakapar churapxañapa ukanakwa suxta tuqit yatxatañäni, ukat Bibliax uka tuqinakat kunjamsa yanaptʼistaspa uksa amuytʼarakiñäniwa.

 1 Munasiña

Awkinakax Jehová Diosatwa munasiñ yatiqasipxañapa. Diosax kunjamsa jilïr wawapar uñji uka tuqitxa akham sasaw Bibliax qhanañchi: “Awkix Yuqaparux munasiwa” sasa (Juan 3:35; Colosenses 1:15). Walja kutiw Diosax Yuqapar ukham munasitapsa sum uñjatapsa uñachtʼayäna. Amtañäni, Jesusax bautisaskäna ukhaxa, akham sasaw Jehová Diosax alaxpachat säna: “Jumätaw nayan munat Wawaxaxa, kawkïrirutix nayax ajlliskta ukaxa” sasa (Lucas 3:22). Ukhamasti Jesusax janipuniw Awkipan munasiñapatxa payachaskänti. Jichhaxa, ¿kunsa awkinakax Diosat yatiqasipxaspa?

Maysa tuqitxa, wawanakar wali munatäpxtawa sañxa janipuniw awkinakax armasipxañapäkiti. Kelvin sat mä awkix phisqa wawaniwa, jupax akham siwa: “Sapa maynir munassmaw sañatakisa jan ukax sum uñjañatakisa wal chʼamachastxa. Jiskʼäpkäna ukhaxa, nayaw jupanakar jariqtʼasax yaqha isimpi usktʼirïta” sasa. Ukhamasti awkinakax janiw ak armasipxañapäkiti: wawanakax awkipan wali munatäñwa munapxi. Jïsa, sapa kuti kuna jiskʼanakat chiqañchañat sipansa, jupanakar wali munasiñampi chuymachtʼañaw wakisispa. Donatox pä qʼaxu phuchaniwa, ukat akham sarakiwa: “Wawanakar chuymachañatakix maynix tiempo apstʼasiñapawa” sasa. Chiqasa, kunapachatï wawanakax awkipan wali munatätap amuyasipxi ukhaxa, jupanakpachas munasipxarakiwa, ukhamatwa Diosarus jukʼamp jakʼachasipxaraki.

2 Sum sarnaqaña

“Kuntix Awkix lurki ukarakwa [Yuqax] luri” sasaw Juan 5:19 jiskʼa tʼaqax Jesusat parli. Jïsa, wawanakax awkipar uñjasaw kuns lurapxaraki. Sañäni, chachax warmipar munasiñampi sum uñjani ukat respetarakini ukhaxa, yuqapax ukhamwa jaqichasxani ukhax warmipar munasiñampi uñjarakini. Ukat kunjamxay awkix sarnaqchi ukhamarakiw yuqall wawanakax sarnaqapxani, ukat imill wawanakasti ukarjamaw chachanakarux walsa jan walsa uñjapxarakini.

Jichhax yaqha tuqit amuytʼañäni: ¿wawamax jan perdón mayisirïkaspa ukhax kamachasmasa? Jumaw nayraqat ukxa lurañama, ukhamatwa wawax uk uñjasax yatiqasirakini. Kelvinat parltʼaskakiñäni, mä uruxa pä wawanakapaw wali jila alani mä cámara pʼakjapxatayna. Ukat jupax wal colertʼasisaw may liqʼintasin mesa payar jaljtayäna. Ukham colerampi atipayasisax wal pisayasïna, ukatwa wawanakaparus warmiparus perdón mayisïna. Jichhax janiw wawanakapax perdón mayisiñ axsarayasxapxiti, nayaruw perdón mayisir uñjapxitu ukatwa jupanakax perdón mayisiñ yatipxaraki sasaw jupax säna.

3 Kusisit qamasiña

Jehová Diosax wali ‘kusisir’ Diosawa (1 Timoteo 1:11, NM). Ukatwa Yuqapax wali kusisita Jupamp chika jakasixa. Kunjamas Yuqa Awkix apasipxpacha uka tuqitwa Proverbios 8:30  jiskʼa tʼaqax uñachtʼayistu, “nayawa sapüru jupar kusisiyayäta, sapa horasana jupan nayraqatapan [kusisiyäta, NM]” sasaw säna. Ukhamasti, Diosax wali sumpunwa Yuqapampi apasi.

Jïsa, wawanakax wali munataw jakasipxañapa. Ukatxa awkix jupanakampi anattʼañatakis tiempo apstʼasiñaparakiwa. Chiqansa ukhamatwa yuqa awkix wali sum apasipxaspa. Niya ukhamarakiw qʼaxu yuqani Felipex amuyaraki, akham siwa: “Panpachani kuns lurasaw wawajampix sum apasipxta. Awisax anattʼapxta, munat masinakampis yaqha chiqanak sarapxarakta ukhamawa. Taqi ukanak panpachani lurasaw familiansa mayachtʼat jakasipxta” sasa.

4 Diosat yatiqaña

Kuntï Jesusax yatki ukxa Awkipatwa yatiqatayna. Mä kutix akham sänwa: “Kuntix sisktxa akapacharu ukxa [Awkijat] istʼtxa” sasa (Juan 8:26). Taqi awkinakaw sum sarnaqañsa Diosatakjam sarnaqañsa wawanakapar yatichapxañapa, ukwa Diosax muni. Mä arunxa, Diosan yatichäwinakapatwa wawanakaparux chuymar purtʼkir yatichapxañapa. Ukatakix jiskʼatpach yatichañaw wakisi (2 Timoteo 3:14, 15). Wawapax jiskʼäskäna ukhatpachwa Felipex wawapataki Bibliat Apstʼata sarnaqäwinaka siski uka librot liyirapirïtayna. * Ukat jilsuskäna ukhaxa jupatakjam wakichat yaqha libronakampiw yaticharakïna.

Donatox akham sarakiwa: “Familian Bibliat yatiqkasin taqinitaki chuymar purtʼkir yatichañax chʼamakiwa. Ukampis Dios tuqit yatiqañax wali askiwa, ukwa awkinakax wawanakapar uñachtʼayapxañapa, jan ukhamäkaspa ukhaxa wawanakax jankʼakiw uk amuyapxaspa” sasa. Kimsa yuqall wawani Carlos sat mä awkix akham sarakiwa: “Semanan mä kutiw familiatak kunas wakisispa uka tuqinakat parltʼasiñatakix tantachasipxta. Taqiniw kuna tuqitsa parlasini ukxa amtapxta” sasa. Maysa tuqitsti Kelvinax kawkinsa jan ukax kun lurkasas wawaparux Diosan arunakapat parlapunirïnwa, kunjamtï Moisesax siskäna ukhama. Amtañäni akham sasaw säna: “Juman chuymamaruy katuqam kawkïri mandamiento arunaktï jichhüruna churksma ukanakxa. Ukatsti wawanakamaruw yaticharakita; utamankkasina, thakinjam sarkasina, ukhamarakiw parlarakita ikintañataki, sartañatakisa” sasa (Deuteronomio 6:6, 7).

5 Chiqañchäwi

Wawanakan sum jilsupxañapatakixa wali askirakiw chiqañchäwixa. Yaqhip awk taykanakax wal tuqisasa jan ukax jawqʼasas ukat jan wali arunakampi jiskʼachjasas wawanakar chiqachañäkaspa ukhamwa amuyapxi. Ukampis wawanakataki ukham qhurüñax janiw walïkiti sasaw Bibliax yatichi. Kunjamtï Jehová Diosax wawanakapar munasiñampi chiqañchkixa ukhamarakiw awkinakax wawanakapar chiqañchapxañapa (Hebreos 12:4-11). Diosan Arupax akham siwa: “Awkinaka, jumanakax wawanakamarux jan colerayapxamti, jan ukasti chiqapar yatichasina sum uywapxam, Tatitur iyawsapxañapataki” sasa (Efesios 6:4).

Ukat inas awisax juchaparjam wawanakar chiqañchañax wakischispa. Ukampis kunatsa  chiqañchata uñjasi ukxa, wawax amuyasiñapawa. Janipuniw wawar chuym usuchjañax walïkaspati. Ukat kunjamtï Bibliax siskixa, jawqʼañasa jan ukax qhuru arunakampi chuym usuchjañasa janiw walïkiti (Proverbios 16:32). Kelvinax akham saskakiwa: “Wawanakar chiqañchañax wakisi ukhaxa, munasiñatwa jupanakar chiqañchtxa, uk amuyapxañapatakiw chʼamachasta” sasa.

6 Jan walinakat jarkʼaqaña

Jan wali jaqinakat jan ukax jan suma amtani jaqinakatwa wawanakasar jarkʼaqañasaraki. Aka jan wali urunakanxa “jan wali jaqinakaw” wawanakar jan walinak lurañ yatipxi (2 Timoteo 3:1-5, 13). Ukampis ¿jumax kunjamsa wawanakamar uka qʼañu amtani jaqinakat jarkʼaqasma? Diosan Arupax akham siwa: “Chʼikhi jaqix jan waltʼaña uñjasinxa jaltxiwa, ukampis jan amuytʼasir jaqixa mantaskakiwa, ukatsti ñanqha luräwinak jikxati” sasa (Proverbios 22:3). Ukhamasti uka jan walinakat wawanakar jarkʼaqañ munasaxa wal amuyasiñamawa. Kuna jan walis utjaspa ukxa wal amuyañamawa ukat ukarjamaw kunsa lurañama. Amuytʼañataki: wawamax Internetar mantañ yatchi ukhaxa, kunjamatsa jan walinakat amuyasispa ukxa sum yatichañamawa. Computadora jamasäwjar uchañax janiw wakiskaspati, jan ukasti taqinin uñjkañ chiqar uchañaw wakisispa.

Maysa tuqitxa, jan wali amtani jaqinakaw utjaraki, ukhamasti ukanakat qhispiñsa awkinakax wawanakar yatichapxañaparakiwa. Sañäni, wawamax sapakïskaspa ukat maynix jan wali amtani qʼañunak lurañ munaspa ukhaxa, ¿wawamax kamachaspasa? * Uka jan walinakat amuyasiñatakixa, chhuxurasiñ chiqanakax kunatakisa jan ukax kuna amtampi luratasa ukanakxa sum yatipxañapawa. Kelvinax akham sarakiwa: “Janipuniw yaqhanakampis ni yatichirinakampis uka tuqit wawanakajar yatichaykti. Nayaw wawanakajar uka tuqit yatichañajaxa ukat qʼañu amtani jaqinakatsa amuytʼayañajarakiwa, ukxa sum amuyasta” sasa. Taqi wawanakapaw ukham yatichatax sum jilarawayapxi, janiw maynis jan walinakarux puriwayapkiti, jichhax wali sumaw jaqichata sarnaqasipki.

Diosampi yanaptʼayasiñamawa

Ukat kunapachatï mä awkix wawanakapar Diosampi sum apasiñ yanaptʼi ukhaxa wali askipuniwa. Jïsa, jumaw nayraqatxa Dios chuyma sarnaqañama, ukhamatwa wawanakamax yatiqasipxani. Donatox akham sarakiwa: “Qhawqsa Diosamp sum apasiñ munapxta ukwa wawanakax uñjapxañapa. Ukat jan walinakax utjki ukhawa awkix Jehová Diosar qhawqsa atinisi uk wawanakar uñachtʼayapxañapa. Ukampis kunapachatï familian Diosar mayisktan ukhaxa, Diosar yuspärañax wali askirakiwa, ukat Diosan munasitapäñataki yatichañxa janiw armasiñasäkiti” sasa.

Ukhamasti, ¿kunjamatsa maynix suma awkïspa? Jïsa, Jehová Diosan iwxanakap sum katuqasiñasawa, jupaw taqinit sipansa wali suma Awkixa. Jumatï wawanakamar kunjamtï Diosan arunakapan siski ukarjam sum yatichäta ukhaxa, wali askïniwa. Kunjamtï Proverbios 22:6 jiskʼa tʼaqax siskixa: “Wawaruxa suma sarnaqañapatakixa jiskʼatpach sum yaticham, ukatsti awkïxan ukkhaxa janiw uka yatichäwinakatxa armaskaniti” sasa.

[Qhanañchäwinaka]

[19 janan fotopa]

Wawanakan yatiqaskañwa awkix sum sarnaqañapa

[20 janan fotopa]

Mä suma awkixa janiw Dios tuqit wawanakar yatichañ armaskiti

[21 janan fotopa]

Munasiñampiw awkinakax wawanakapar chiqañchapxañapa