Taqi chiqanwa yatichasi

“Infiernow utji sataxa wal axsarirïta. Nina taypirus jaquntapkitaspa ukham samkasirïta, ukat wali mulljataw ikitat sarthapirïta. Jan juchar puriñatakix wal chʼamachasirïta.” (Arline)

¿JUCHAN jaqinakas infiernon wal tʼaqhisipkaspa ukhamti jumax amuyta? Chiqansa, waljaniw ukham amuyapxi. Khä 2005 maranxa uka tuqitwa Saint Andrews sat jachʼa yatiqañ utan irnaqir mä jaqix Escocia markankir jaqinakarux jisktʼatayna, ukat yupaychäwinak sarayirinakatxa sapa kimsanitwa maynix akham säna: “Khitinakatix Diosat jithiqtapki ukanakaxa wiñayaw infiernon wali llakita jikxatasipxani” sasa. Ukatxa walpun tʼaqhisipxani sasaw sapa phisqanit maynix sarakïna.

Jïsa, infiernon tʼaqhisiñaw utji sasax taqi chiqanwa yatichapxi. Estados Unidos markanxa 2007 mara tukuykasaw uka tuqit waljanir jisktʼasïna, ukat sapa tunkanitxa paqallquniw infiernow utji sasa axsarapxäna. 2000 maranxa akham sasaw mä yatxatäwix qhanañcharaki: México markanxa, sapa patakat niya paqallq tunka mayaniw ukham amuyapxarakïna. Infiernox utjaskapuniwa sasaw yupaychañ tuqit jan yatiñ munir markanakansa sapxaraki. Uka yatxatäwix akham saskakiwa: Argentina markanxa sapa patakat pusi tunkaniw ukham amuyapxi, España markansti sapa patakatxa kimsa tunkaniw ukham amuyapxaraki sasa. Canadá markanxa sapa patakat pusi tunk payani ukat Gran Bretaña markansti sapa patakat kimsa tunka payanirakiw infiernor axsarapxi sasaw 2004 maranxa yaqha yatxatäwix saraki.

Kunsa iglesianakan yatichapxi

Ukampis jichhax yupaychäwi sarayirinakatxa waljaniw mayj amuyxapxi. Kuna laykutix 1993 maran apsuta Catecismo de la Iglesia Católica siski uka qillqatanxa akham siwa: “Kunapachatï maynix Diosat wiñayatak jithiqtxi ukawa infierno tʼaqhisiñaxa” sasa. Ukhamasti, janis chiqpachapuni ninamp aqantat infiernon tʼaqhisiñax utjkaspa ukham yatichxapxi.

Ukampirusa, walja jaqinakaw chiqapunis ninan aqantata infiernon tʼaqhisiñax utjkaspa ukham amuyapxi. Bibliaw ukham yatichi sasaw sapxi. Albert Mohler sat jaqix akham siwa: “Bibliaw ukham yatichi” sasa, jupaxa Southern Baptist Theological Seminary siski ukan mayni pʼiqtʼiripawa.

¿Kunatsa sum yatxatañamax wakisi?

Chiqapuni infiernon wiñay tʼaqhisiñax utjaskchi ukhaxa, axsarañ ukkhawa. Ukampis jan chiqäkchi ukhaxa, ina chʼusatakwa yupaychäwi pʼiqtʼirinakax jaqinakar llakisiyapxi ukat qʼal pantjasiyapxi. Ukatxa janiw ukakïkiti: Diosatwa kʼarinak yatichapxi.

¿Bibliax uka tuqit kamspachasa? Uk jichhax jutïr yatichäwinakan kunayman Biblianakampi amuytʼañäni, ukat aka jisktʼanakaruw qhanañchtʼañäni: 1) jiwxtan ukhaxa kawkirus sartanxa, 2) Jesusax infierno tuqit kunsa yatichäna ukat 3) infiernot chiqa yatiñax kunjamsa Diosar jakʼachasiñ yanaptʼistu, uka tuqinakat yatxatañäni.