Taqi kunsa chiqaparuw luri
Diosar jakʼachasipxam
Taqi kunsa chiqaparuw luri
¿INA chʼusat tʼaqhisiyapxirïtamti? Chiqas ukham jan walinakan uñjasiñax janiw kuna askïkisa, ukat juchanix ukhamaki munañapampi mistsu ukhaxa, wali colerañjamawa. Ukat kunapachatï mayni munat masis jan ukax atinisiñjam masis yatkasin jan walinak luristu ukhaxa jukʼamp colerañjamawa. Ukham jan walinakan uñjasisax inas akham jisktʼassna: “¿Kunatsa Diosax ukhamak uñchʼukpacha?” sasa. * Chiqasa Jehová Diosax ukham yatkasin yaqhanakar jan wal lurañxa uñisiwa. Ukat khitinakatix juchanakapat jan arrepentisipki ukanakarux Diosaw juch uñtʼasiyani sasaw Bibliax qhanañchi. Uka tuqit jichhax amuytʼañäni, kunjamtï apóstol Pablox Hebreos 10:26-31 qillqatan siski ukarjama.
Hebreos 10:26 tʼaqanxa akham sasaw Pablox qallti: “Kunatix chiqäki uka aru yatkasina juchachasiskakiñäni ukaxa, janiw jukʼamp sacrificiox utjkxiti juchanakasa[takixa]” sasa. ¿Kunatsa yatkasin juchachasiñax sinti jan walïkpacha? Nayraqataxa, Diosar kutkatañ amtanïsawa, mä arunxa amanutwa lurapxi. Ukxarusti, janiw aliq pantjasiñ tuqitak parlkiti, chiqas kuna pantjasiñas utjapuniwa, ukampis yaqhipax ukham jan walinak lurir yatitäxapxiwa. Ukhamasti chuymanakapaw juchamp atipatäxi. Ukatsti, yatkasaw juch lurapxi. “Kunatix chiqäki uka aru [yatxapxiwa]” sasaw apóstol Pablox qhanañchi. Ukhamasti kuntï Diosax luqtirinakapat suyki ukxa sum yatxapxi, ukampis jan wali amtanïpxiwa.
Ukat ¿Diosax ukham ñanqha jaqinakat kamspachasa? “Janiw jukʼamp sacrificiox utjkxiti juchanakasa[takixa]” sasaw Pablox saraki. Jïsa, kuna juchanaktix pantjasirïtas layku lurktanxa uka juchanakatakikiw Jesucriston luqtasitapaxa (1 Juan 2:1, 2). Ukhamasti, khititix juchachaski ukat jan arrepentiskiti ukaxa janis Diosan churäwipar munkaspa ukhamawa. ‘Yuqaparusa, ukhamarak wilaparus jiskʼachapkaspa’ ukhamwa Jehová Diosax uka jan wali jaqinakar uñji (29 jiskʼa tʼaqa). Luratanakapampix ukhamwa Jesusarusa wilaparusa jiskʼachapxi, mä arunxa aliq jiwasjam jaqin wilapakïkaspasa, janis kuna askïkaspa ukhamwa ‘takichapxi’ (Machaka Testamento). Chiqansa, khitinakatix ukham jan wali chuymanïpki ukanakax janiw mä qhispiyäwi jikxatapkaspati.
Ukhamaxa, ¿kunarus uka ñanqha jaqinakax puripxani? Chiqapar taqi kuns lurir Jehová Diosax akham siwa: “Nayaruw waktʼitu mutuyañaxa, nayaw jupanakaru kuttʼayaskäxa” sasa (30 jiskʼa tʼaqa). Khitinakatix juchar sarapxapuni ukat janirak jaqi masipatsa amtasipkiti ukanakaxa, ak amtapxañapawa: janiw khitis Diosan kamachinakapat sawkasisax ukhamaki munañapar mistsupkaspati. Chiqasa, jichhürunakpachaw yaqhipax jan walinak lurasax tʼaqhisipxi (Gálatas 6:7). Ukat inas yaqhipax janis kuna juchanïpkaspa ukham sarnaqasipchi, ukampis kunapachatï Diosax aka Uraqit jan walinak tukjxani ukhaw yatipxani (Proverbios 2:21, 22). Ukhamasti Pablon aka arunakapxa janipun armapxañäniti, “¡wali axsarkañawa jakkir Diosan amparaparu jaltʼañaxa!” sasaw 31 jiskʼa tʼaqanxa saraki.
Inas maynix jumar jan walinak lurasin tʼaqhisiyiristma, ukampis ak amtañamawa: Jehová Diosax janiw uka jan wali jaqinakarux ukhamaki uñchʼukkaniti. Ukhamasti Jehová Diosar atinisiñasawa, ¡Jupaw uka jan wali jaqinakarux tiempopar juch uñtʼasiyaskani! Chiqaparupuniw Jupax taqi kuns lurani.
[Qhanañchäwi]
^ Diosax kunatsa jan walinak jan tukjkpacha, uka tuqit jukʼamp yatxatañatakixa, ¿Kunsa Bibliax chiqpachapuni yatichi?, libron 106 ukat 114 jananakap uñxattʼäta, ukax Jehová Diosan Qhanañchirinakapan luratawa.