Kunsa liytʼirinakax yatiñ munapxi

¿Diosax chiqapuniti wawanakar angeläñapatak apaspacha?

Kunapachatï mä wawax jiwxi ukhaxa, awisax familiaranakax chuymachtʼañ laykuxa akham sasaw sapxi: “Diosaw angelitüñapatak apasxi” sasa. Ukampis ¿ukhamapunïpachati?

Mä jan sinttʼasir qhuru diosakiwa, mä ángel munasin mä wawar jiwayaspaxa. Ukampisa, Jehová Diosax janiw ukham Diosäkaspati sistuw Bibliaxa (Job 34:10). Antisasa, Diosax wali munasiriw siwa (1 Juan 4:8). Mä jaqix jan sinttʼasirïkchisa, jan khuyaptʼayasirïkchisa, janiw familiap jachʼaptayañatakix yaqha familian wawap aparkaspati, ukhamaxa, ¿kamisaraki Jehová Diosax aparaspasti? Jaqinakar munasitap laykuxa janiw kunäkipansa ukham lurkaspati.

Ukampis amuytʼañäni: ¿Diosax chiqapuniti jukʼamp walja angelanak munpacha? Diosax taqi kuns chiqaparuw lurawayi, janirakiw pantjasiwaykiti sasaw Bibliax qhanañchi (Deuteronomio 32:4). Ukhamaxa, millón millón angelanak lurasax janiw Diosax pistʼir lurkpachänti (Daniel 7:10). Janiw taqi chʼaman Diosax ukham pantjaskaspati. Ukampis inas akham amuychisma, Jehová Diosaw mä qhawqhanir ajllitayna, alaxpach Apnaqäwir sarapxañapataki ukat jiwxasin ajayunakjam jakapxi sarakis Bibliaxä sasa. Ukampis Bibliax janiw wawanak tuqit parlkiti, janiw wawanakaw jiwasin sarapxani siskiti (Apocalipsis 5:9, 10).

¿Kunatsa Diosax janiw ukham lurkaspati sasax saraksna? Diosax janiw wawanakarux angelanakar tukupxañapatakix lurkänti, kunattix ukax janiw Diosan amtaparjamäxaspati. Edén huertanxa, Diosax Adanampiru Evampirux akham sasaw säna: “Wal mirantapxam, aka uraqirusti phuqhantapxarakim, apnaqapxarakim” sasa (Génesis 1:28). Taqi chuym istʼasir jaqinakax aka Uraqpachar phuqantapxaspa ukaw Diosan amtapaxa, janitï wawanakax utjkaspaxa janiw Diosan amtapax phuqaskaspati. Ukhamax janiw wawanakat jakäw apaqasa angelanakar tukuyañ Diosax amtkänti. Wawanakax “[Jehová] Tatitun aski churäwipawa” siw Bibliaxa (Salmo 127:3). ¿Munasir Jehová Diosax awk taykanakat aski churäwip aparaspati? ¡Janiwa!

Chiqpachansa, mä akatjamat wawax jiwawayxi ukhaxa awk taykapax wali jachʼa llakinwa uñjasipxi. Ukampis ¿wasitamp jikisipxaspati? Millón millón jaqinakaruw paraíso uraqin jakapxañapataki Diosax jaktayani siw Biblianxa. Kunapachatï uka wawanakax jaktanxani ukhax wali kusiskañapunïniwa, janiw usutäxapxaniti, wasitampiw awkipampisa taykapampis jikisxapxarakini (Juan 5:28, 29). Kunjamtï uñjawayktanxa, wawanakax jilsupxaspa, ukat kusisit sarnaqapxaspa, ukat Jupar uñtʼapxaspa ukwa Diosax munäna. Ukhamax jiwapki uka wawanakax janiw angelitor tukupkiti, jan ukasti paraíso uraqin jaktayatäpxaniwa. Ukapach purinin ukhaxa ukat Lurir Diosasan sum uñjata sarnaqxañäni ukhaxa, wawanakampach taqiniwa Jehová Diosar wiñayatak wali kusisit yupaychapxañäni.