¿Jiwatanakar axsartati?

“¡JANIWA! Jiwatanakax janiw kamachkitaspasa” inas ukham sischisma. Ukampis millón millón jaqinakaw wal axsarayasipxi, ¿uk yattati? Jiwatanakax ajayunakaruw tukupxi ukat kuttʼanipxaspawa sasaw walja chiqanakan amuyapxi, ukhamarakiw español parlapki uka markanakansa uka amuyunakax wali uñtʼata.

Amuytʼañataki, Benín (África occidental) uksanxa akham amuyapxi: mayni jiwxi ukhaxa ajayupax jakaskakiwa ukat kuttʼanisaw familianakaparus jiwayaspa sapxiwa. Uk yatisaxa walja jaqinakaw ajayunakan jan phiñasipxañapatakix yupaychapxi, waxtʼanaksa lurapxi, ukatakixa yänakapsa aljantapxi jan ukax qullqi manunis uñjasipxaraki. Mayninakasti layqasiñanak tuqiw uka ajayunakampix parlañ yantʼapxi. Yaqhip jaqinakaxa sutjaskañanakatwa parlapxi, ukat ajayunakaw uk luri sapxarakiwa.

Agboola chacharux ukaw pasatayna, jupasti Benín markampin Nigeria markampin mujunap jakʼanwa jakasi. Akham siwa: “Aka lugaranxa taqi kunatakisa ajayunakax aytatapuniwa. Mä costumbrex akhamawa, jiwatanakar wali suma jariqtʼaña ukhamat ajayunak jakapki ukar sarxapxañapataki. Jiwatar jariqatat jiltkʼi uka jabonanakampi ukat laphinakampi apthapisaw nayax mä pomada lurirïta. Uka pomadampi riflejaru lluchʼikipkasaw kuna uywti katuñ munktxa uk jachʼat artʼirïta. Ukham costumbrenakaxa wali uñtʼatawa ukat askinakas jikxataskaspa ukhamaw amuyasirakïna. Ukampisa, layqasiñanakax janiw ukakïkiti, wali axsarkañanakaniwa.

”Pä yuqajaw jiwxäna, kunatäpachasa ukxa janiw yatkti, inas maynix layqantasin uk lurchitu sasaw axsarayäta. Uka tuqit jisktʼasiriw wali uñtʼat layqan ukar sarta. Uka layqax ukhamapunïskiw situwa, ukat jukʼamp jan walinakwa yatiyitu: ‘Jiwayiripax jiwxani ukhaxa, yuqanakaman ajayunakapax uka jiwayirin ajayupan esclavonakapäpxaniwa. Ukat kimsïri yuqamasa jiwxarakiniw’ sasa. Jïsa, mä qhawqha urunakatxa wawajax jiwxarakikïnwa.”

Ukhamäkipanwa Agboolax Nigeria markat John sata Jehová Diosan Qhanañchiriparux uñtʼatayna, jupaxa jiwatanakax kunjamäsipkis uka tuqit Bibliampi qhanañchatayna. Ukham wali sum qhanañchataxa Agboolan jakäwipax mayjtʼxänwa, uka kikparakïspawa khitinakatix uka amuyunakamp apnaqatäpki ukanakampixa.

¿Jiwatanakax jan waltʼayistaspati?

Uka jisktʼaruxa Jehová Diosakiw sum qhanañchaspa, jaqix wali yatiñanïtwa siskchisa janiw qhanañchkaspati. ¿Kunatsa? Diosakiw taqi jakirinak Luririxa “alaxpachansa akapachansa utjki ukanakxa, jan uñjatäki uksa, uñjatäki uksa” (Colosenses 1:16). Jupaw angelanak luri alaxpachan jakapxañapataki, ukat animalanakarusa jaqinakarusa aka Uraqin jakapxañapataki luraraki (Salmo 104:4, 23, 24). Jupan munañapatarakwa taqi kunas jakaskaraki (Apocalipsis 4:11). Ukatwa, jiwatanakxat yatxatañatakix Diosan Arupat yatxatañasa.

Jehová Diosaw jiwañ tuqit nayraqat parlatayna siw Qullan Qillqatanakaxa: jan istʼapkitäta ukhaxa jiwapxätawa sataynaw Adanampir Evampiruxa (Génesis 2:17). ¿Kamsañs munpachäna? “Laqʼätawa, laqʼarurakiw kuttäta” sasaw Diosax qhipat qhanañchäna (Génesis 3:19). Ukhamasti, kunapachatï mayni jiwxi ukhaxa jañchipax tukusxiwa ukat laqʼaruw tukxaraki. Ukhamaxa, jakäwipax ukaruw tukusiwayxi.

Adanamp Evampix Diosar jan istʼapxatapatwa jiwañar puripxäna. Ukampisa, janiw jupanakax nayraqat jiwapkänti, jan ukasti Abel wawapaw Caín jilapan jiwayat uñjasïna (Génesis 4:8). ¿Jiwat jilajax ukhamat ukham luritani sasati Cainax axsarayaspachäna? Janiwa. Antisasa, jakasipki uka jaqinakax juchajat jiwayapkitanicha sasaw axsarayaspachäna (Génesis 4:10-16).

Ukjatxa patak patak maranakaw pasawayxi, jichhaxa yaqha sarnaqäwit yatxatarakiñäni. Astrología tuqit yatxatat jaqinakaxa Herodes reyirux akham yatiyapxäna: “Judionakan reyipaxa” apnaqkta uka marka taypinwa yuriwayi sasa. Uk  istʼasaxa Herodes reyix wal colertʼasïna, jupaw naya lantix reyit uttʼayatäxaspa sasaw Belén markankir pä maranit aynacharu, yuqall wawanak taqpach jiwarayanipxañapatak khitäna. Ukampis janiw Jesusar jiwayapkänti, kunattix mä angelaw Joseyaruxa: “Sartasim ukatsti wawampiru María taykapampiru irpxarum Egipto markar sarxam” säna (Mateo 2:1-16).

Herodes reyix jiwxäna ukhaxa, Israel markar kuttʼxam “wawaru jiwayañ munirinakasti jiwxapxiwa” sasaw angelax Joseyar yatiyxäna (Mateo 2:19, 20). Uka angelaxa ajayunak jakapki uka lugarat jutirïnwa, Herodes reyix jiwatatxa janipuniw Jesusarux ñanqhachxaspati uk sum yatïnxa. Ukatwa Joseyax uka reyir jan axsarañapaxänti. Jichhasti Arquelao reyiw apnaqirïxäna, juparuw axsarañapänxa. Ukatwa Joseyax familiapar Galilea markar irpxäna, uka markaxa janiw munañapar apnaqiri qhuru Arquelao chachan apnaqatäkänti (Mateo 2:22).

Aka sarnaqäwinakatxa, ¿kunsa yatiqsna? Jiwatanakaxa janipuniw ñanqhachkistaspati. Ukhamax Agboolar paskäna ukasa, ¿kunjamatarak qhanañchasispasti?

¿Jiwatanakan ajayupati, jan ukax saxranakacha?

Walja maranak qhipatxa, Jesusax walja ñanqha ajayunakampiw jikthaptäna. Uka saxranakaxa Jesusarux uñtʼapxänwa ukatwa “Diosan Yuqapa” sapxänxa. Jupanakax khitinakänsa uk Jesusax yatirakïnwa; jiwatanakan ajayupawa sasax janiw siskänti, jan ukasti ‘ñanqha ajayunaka’ sänwa, jïsa ñanqha ajayunakäpxänwa (Mateo 8:29-31; 10:8; Marcos 5:8).

Biblianxa janiw Diosat jithiqtat ñanqha ajayunakatak parlkiti, jan ukasti Diosat jan jithiqtiri ajayunakatsa parlarakiwa. Génesis libronxa querubines sat angelanakatwa parli, jupanakarux Jehová Diosaw Edén huerta punkur uchatayna, Adanamp Evampi jan mantapxañapataki uka huertat jaqunukutäxapxatap layku (Génesis 3:24). Amuyatarjamaxa, ukhapuniw alaxpachankir ajayunakax jaqinakan uñjkaña uñstapxpachäna.

Tiempompixa, walja angelanakapuniw aka Uraqir saraqanisax jaqinakar tukupxatayna. Ukampis jupanakaxa, janiw Jehová Diosan khitanitäpkänti. Jan ukasti, jupanakpachpaw alaxpachan “utjäwinakapxa jaytanukupxän[a]” (Judas 6). Jan wali amtanïpxänwa: warminakampiw ikintasiñ munapxäna. Ukham lurasaxa, mayja wawanakanïpxänwa, nefilim satäpxarakïnwa. Kutkatasir angelanakasa wawanakapasa jan waltʼäwinakampiw aka Uraqirux phuqantayapxäna (Génesis 6:1-5). Ukatwa Jehová Diosax jan wal lurir jaqinakarus —nefilim satäpkäna ukanakarusa— Uma Juiciompi tukjäna, umasti aka Uraqpacharuw phuqantarakïna. Ukatxa, ¿kutkatasir angelanakarux kunas paspachäna?

Uma Juicio utjipanwa ajayunak jakapki ukar munkir jan munkir kuttʼxapxäna. Ukampis Jehová Diosaxa, nayra ‘utjäwinakaparux’ janiw kuttʼayxänti (Judas 6). Bibliax akham siwa: “Diosatix juchachasiri angelanakaru jan perdonkchixa, ukatsipana ukanakxa manqhapacharu [“Tártaro”, NM] jaquntasina, chʼamaka manqharu jistʼantchixa, taripäwi urutaki imatäpxañapataki” sasa (2 Pedro 2:4, MT).

¿Manqhapacha jan ukax Tártaro ukax kunasa? Ukax janiw mä lugaräkiti, jan ukasti kunjamansa ñanqha angelanakax jiskʼachata jan kuna suytʼäwini uñjasipxi ukawa. Ukhamankasaxa janipuniw jaqir uñtatax tukupkaspati. Ukampisa, jaqinakan amuyuparusa jakäwinakapar mayjtʼayañatakisa chʼamanïsipkakiwa. Ukat uka saxranakaxa jaqinakaru, uywanakaru mantasaxa munañapar  apnaqapxarakispawa (Mateo 12:43-45; Lucas 8:27-33). Ukat jiwatanakan ajayupäpxtwa sasaw sallqjarakistaspa. ¿Kunatakis uk lurapxi? Jiwatakanax jakasipkakispas ukham amuyañaswa munapxi ukhamat jan wali costumbrenakar aptʼasax Jehová Diosat jayarstʼayañ munistu.

¿Kunjamatsa jiwatanakar jan axsarxsna?

Jiwatanak tuqit Bibliamp qhanañchäwinakaxa Agboolatakix wali askipunïnwa. Uka tuqit jukʼamp yatxatañ munäna, ukatwa John jilatan Diosan Arupata ukat Bibliat apstʼat qillqatanakamp yatichäma satax jankʼakiw iyaw sänxa. Jiwapkäna uka wawanakapan jan ajayur tukupxatapa ni jiwayiripan esclavopar tukupxatapa ukat jiwat wawanakapax panteonan ikisipkatapa yatisaxa Agboolax wal kusispachäna (Juan 11:11-13).

Ukatxa, layqasiñanak jan mayampitak jaytxañwa amtxarakïna. Ukatwa taqi kunanakatï layqasiñaru wiytkäna ukanakxa ninaru phichhantxäna (Hechos 19:19). Utap jakʼankirinakat maynïrinakaxa: “¡Ajayunakaruw colerayäta!” sapxänwa. Ukampis janiw axsarayasxänti. Efesios 6:11, 12 tʼaqanakax akham siwa: “[‘Diosan churata phuqat armadurampi’, NM] jarkʼaqasipxam [...], alaxpachanakankiri ñanqha ajayunak [...] contraw nuwastanxa” sasa, uka iwxanakarjamaw Agboolax sarnaqxarakïna. Diosax churkistu uka armaduraxa, ¿kunanakasa? Akanakawa: kunatï chiqäki uk yatxataña, kunatï askïki uk luraña, sumankañ arunak yatiyaña, iyawsäwinïña ukat Diosan Arup mä espadäkaspas ukham sum apnaqaña. Uka armadurawa wali sumpun jarkʼaqistu.

Agboolax layqasiñanak jaytxäna ukhaxa, yaqhip parientenakapas amigonakapasa yaqhachxapxänwa. Ukampisa, Jehová Diosan Qhanañchirinakapan Tantachasiñ Utapanxa yaqha amigonakwa jikxatxäna, jupanakaxa kuntï Bibliax yatichki ukaruw iyawsapxi.

Agboolaxa akanakwa yatiqawayi: Jehová Diosaxa niyaw aka Uraqit jan walinak tukjani ukat jan mayampitakiw saxranakan jan wali luräwinakapsa jarktʼxarakini. Ukatxa, jan mayampitakiw tukjatäxapxarakini (Apocalipsis 20:1, 2, 10). Ukat “taqi jiwatanakasti” aka Uraqin jakapxañapatakiw Diosax jaktayxarakini, uksa yatirakiwa (Juan 5:28, 29). Millón millón jaqinakaw jaktanxapxani, Abel chachasa ukat Herodes reyix jan juchani jiskʼa wawanak jiwaraykäna ukanakasa jaktanxapxarakiniwa. Kimsa wawanakapax jiwapkäna ukanakasa jaktanxapxaniwa uka suytʼäwiniw Agboolaxa. Uka pachparakiw munat familianakasas amigonakasas jiwatat jaktanipxarakispa. Jaktanipkani ukkhaxa kuna waxtʼanaktï lurapkayäta ukanakxa janiw amuyapkayätti, jiwapktxa ukat jichhakamax janipuniw kunsa amtasipkti sapxistaniwa.

Ukhamaxa, jiwatanakarux janipuniw kunatsa axsarañasäkiti. Antisasa, jiwapki uka familianakasasa amigonakasasa jaktanxapxaniwa ukwa suytʼasktanxa. Uka urunak puriniñapkamaxa, Bibliat yatxatañax wali wakiskiripuniwa ukhamat iyawsäwis jilxattayañataki. Diosan Aruparu iyawsapki ukanakampiw chikachasiñasaraki. Ukat taqi kunatï layqasiñanakar wiytkistu ukanak apanukxañasax wali wakiskiriwa ukat ‘Diosan churat phuqat armadurampi’ jarkʼaqasiñasawa (Efesios 6:11, NM). Uka yatichäwinakat yatxatañ munirinakaruxa, ¿Kunsa Bibiax chiqpachapuni yatichi? sat librompiw Jehová Diosan Qhanañchirinakapax jan qullqi mayisa Bibliat yatichapxi. *

Jichhaxa, Agboolax janiw jiwatanakarux axsarxiti ukat saxranakat jarkʼaqasiñsa yatirakiwa. Jupapachpaw akham arsu: “Kunatsa wawanakajax kimsanpach jiwarpacha ukxa janiw yatkti. Ukampis Jehová Diosar luqtañ qalltawayxta ukhatxa, paqallqu wawanakanïxtwa ukat janiw kuna ajayus ñanqhachir jutkiti” sasa.

[Qhanañchäwi]

[13 janan qhanañchäwipa]

Agboolax janiw jiwatanakarux axsarxiti ukat saxranakat jarkʼaqasiñsa yatirakiwa

[12 janan fotopa]

Cainax janiw jiwat jilajax ukhamat ukham luritani sasax axsarayaskänti