2 Diosar sum uñtʼañamawa

“Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru.” (Juan 17:3.)

¿KUNATSA CHʼAMÄSPA? Jaqinakax Diosat may may amuyapxi. Diosax janiw utjkiti sasax waljaniw sapxi. Jan uñjkaña jachʼa chʼamakïkaspas ukhamwa yaqhipax amuyapxi. Wali amuytʼir Diosawa sasaw yaqhipanakax sapxaraki, ukampisa khitisa ukat kunjamasa janiw uk yatxatasas mä amtar puripkiti.

¿KUNJAMATSA DIOSAR SUM UÑTʼSNA? Apóstol Pablox akham sänwa: “Diosan jan uñjkay yänakapax jupan luratanakap tuqiw uñachtʼayasi. [...] Kunapachatix aka uraqix luratäkäns ukürutpacha jupax Diosätapa, chʼamapax jan tukuskirirakïtapa” sasa (Romanos 1:20). Ukhamax luratanakap uñjasaw Diosar jukʼamp uñtʼsnaxa ukat wali amuyump uñjtan ukhaxa, Jehová Diosax wali yatiñanïtapa, jachʼa chʼamanïtapsa sum amuytanxa (Salmo 104:24; Isaías 40:26).

Ukhamax maynitï Diosar sum uñtʼañ munchixa, jupapachpaw Biblia liyisax kunjam Diosas uk  yatxatañapa. Janipuniw mayninakan amuyunakaparjamaki Diosat amuyañasäkiti. Jiwaspachpaw sum yatxatañasa. Uk lurañasatakiw Bibliax akham iwxtʼistu: “Janiy jumanakax akapacha saräwinakarjamaxa jakxapxamti, jan ukasti amtañanakamanxa machaqat amtasxapxam, ukhamat jumanakan jakañanakamax sumäxañapataki. Ukhamatwa jumanakax Diosan munañapxa yatipxäta, kunatix askïki, kunatix Diosarux kusisiyki, qʼumäkaraki ukanaksa” sasa (Romanos 12:2). Ukhamaxa, kunsa Bibliax Diosat yatichi uk jiwaspachpa yatxatañax wali wakiskiriwa. Uka tuqit mä qhawqha uñachtʼäwinak uñjañäni.

Diosax sutiniwa. Biblia qillqaskäna ukhaxa, Diosan sutipax waranq waranq kutiw uñstäna. Salmo 83:18 jiskʼa tʼaqan akham siwa: “Jaqinakan yatipxañapataki, jumaxa Jehová sutinïtama, juma sapakiw uraqpachxaruxa taqi Munañanïtaxa, NM” sasa.

Jan walinak lurasax Jehová Diosan chuymap ustʼaysna. Israelitanakax Egiptot qhispiyatäsinsa, walja kutiw Jehová Diosar jan istʼapkänti. ¿Sarnaqäwinakapampix chuym ustʼayapxänti? Jïsa, “Israelan Qullan [Diosaparuw] llakisiyapxäna” ukat “chuym usuyapxäna” sasaw Bibliax yatiyistu (Salmo 78:40, 41).

¿Jehová Diosax sapa maynirut munaspachïstu? Jïsa, Jesusax uk yatiyäna ukatwa arkirinakapar akham säna: “¿Janit pä jamachʼis jukʼa qullqir aljaskixa? Ukampis janiw maynisa aka uraqirux liwiqtkiti jan Diosan munañapatxa. Ukampis jumanakatxa taqi ñikʼutanakamasa mayat mayat suma jaktʼatawa. Ukhamasti jan axsarapxamti, jumanakax uka jiskʼa jamachʼinakat sipanxa wali jila alanïpxtawa” sasa (Mateo 10:29-31).

Diosax janiw jaqinakar yaqhachkiti. Jupatakixa taqinis igualakïtanwa, uka tuqit parlkasax apóstol Pablox Atenas markankirinakarux akham sänwa: “Jupasti mä sapa jaqitakrakwa taqi casta jaqinaksa mirtayi taqi akapachan utjañapataki” sasa. Diosax “janiw jayankkiti sapaqat jiwasanakatxa”, ukhamax taqiniw Jupar jakʼachassna (Hechos 17:26, 27). Apóstol Pedrox akham sänwa: “Diosatakix taqi casta jaqis mayak[iwa]. Jupasti kuna cast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” sasa (Hechos 10:34, 35).

¿KUNA ASKINAKSA JIKXATSNA? ‘Chiqpach amuytʼañanïñaw’ ‘Diosatak munañ chuymampi’ sarnaqañatakix yanaptʼistani (Romanos 10:2). Kuntï Bibliax Jehová Diosat chiqpachapun yatichki uk uñtʼañäni ukhaxa, janiw khitis sallqjkistaniti. Ukham lurasakiw ‘Diosar jakʼachasiñäni’ (Santiago 4:8).

Jukʼamp yatxatañatakixa, ¿Kunsa Bibliax chiqpachapuni yatichi?, * sat libron nayrïr jaljap uñxattʼäta, “¿Kawkïrisa Diosat chiqa yatichäwixa?” siski uka pʼiqinchäwi”.

[Qhanañchäwi]

[6 janan fotopa]

Luratanakap wali amuyump uñjasaw Diosar sum uñtʼsna