Kunsa liytʼirinakax yatiñ munapxi

Milagromp qullañanakaxa, ¿Diosatapunit jutpacha?

Chiqpachansa, Jehová Diosax usutanakar qullañatakix wali chʼamaniwa ukat luqtirinakaparux milagromp qullapxañapatakix chʼam churarakispawa. Amtañäni, apostolanak tiemponxa, milagronak lurapxañapatakiw Diosax qullan ajayu churäna. Ukat apóstol Pablox akham qhanañchi: “Diosax sapa mayniruw Ajayupxa churi, taqinin askipataki. Uka Ajayu tuqirakiw yaqhiparu kunsa sum parltʼañapataki, [...] yaqhipanakasti chʼam katuqapxaraki usutanakar waliptayañataki, [...] yaqhipanakasti Diosan arunakap parltʼañatakirakiw chʼam katuqapxi, [...] yaqhipasti jan uñtʼat laxranak parlañ churäwi katuqapxi” sasa (1 Corintios 12:4-11.)

Ukampis kunapachatï Pablox corintonkir cristianonakaru carta qillqkäna ukanxa muspharkañ luräwinakax tukusiniwa sasaw akham säna: “Ukat sipana Diosan arup yatiyañanakax tukusiniwa, parlanakas tukusiniwa, uñtʼäwisa apaqatarakïniwa” sasa (1 Corintios 13:8, MT).

Nayrïri patak maranakanxa (siglo I), Jesucristompi ukat mä qhawqha arkirinakapampix usutanakaruw milagronakampi qullapxirïna. Chiqpachansa khä tiemponakanxa, qullan ajayun luräwinakapa mä arunsti, usutanakar milagronakamp waliptayañatakiw chʼam katuqapxäna ukax Diosar jachʼañchañataki ukat jichhak uttʼayatäkana uka tamax Diosan yanaptʼapa katuqaskatap amuyapxañapatakïnwa. Ukampis kunapachatï uka tamax sum uttʼayatäxäna ukhaxa, milagronakax janiw lurasxänti iyawsäwimpi, suytʼäwimpi ukat munasiñampi ukanakakiw qhanäxäna, Diosax jupanakampïskatapasa amuyasiskakïnwa (Juan 13:35; 1 Corintios 13:13). Ukhamax niya patak maräkipanxa, Diosax milagronak lurapxañapatakix janiw chʼam churxänti. *

Ukampis inas jumax akham jisktʼasirïsta, “¿Kunatarak milagronakampiw usutanakar qullasipki sasin yatiyäwinakax istʼasiskakisti?” sasa. Mä kutixa, mä chachax cáncer usuniw sasaw mä periodicon yatiyapxäna. Amuyataxa, uka chachax pʼiqipana, maymurupana ukat chʼakhanakapansa tumor sat usunïnwa, ukat janiw waliptirjamäkänti... ukampisa, Diosaw nayarux “parlitu” sasaw säna. Ukat yatiyäwinakanxa, uka chachan cáncer sat usupax chhaqtxataynaw sasaw yatiyapxäna.

Chiqans ukham yatiyäwinak istʼasaxa, akham jisktʼasiñaw wakisispa: ¿Uka yatiyäwinakax chiqapunïskpachati, kunjamatsa uk chiqätap uñachtʼayapxi? ¿Uka usutan qullatäxatap doctoranakax uñachtʼayapxaspati? Usutäkäna uka jaqix chiqpachapunis qullatäkaspa ukhamas amuyaskchixa, ¿Diosaw uka milagronak luri sasat Bibliax yatichpacha?

Chiqas uka qhipa jisktʼat yatxatañax wali wakiskiriwa, kunattix Jesusax akham sänwa: “Amuyasipxam khitinakatix: ‘Diosatwa parlta’ sasa kʼarisisa sarnaqapki ukanakatxa  [...]. Kunapachatix uka urux purinkani ukapachaxa, waljanirakiw sapxarakitani: ‘Tatay, Tatay, nanakax sutimaruwa parlapxäyäta, sutimarurakiw ñanqha ajayunakarus jaqsupxäyäta’ sasa. Ukapachasti nayax jupanakarux sarakïwa: ‘Janipuniw jumanakarux uñtʼapksmati, nayat jithiqtapxit jan wali luririnaka’” sasa (Mateo 7:15, 21-23).

Jïsa, uka qillqatarjamaxa Diosan sutipxaruw milagronak lurasipkta sirinakax utjañapapunïnwa, ukampis uka jaqinakax Diosamp jan walit uñjatäpxarakiwa. Ukhamax uka sipitar jan jalantañatakixa, Jehová Diosar sum uñtʼañasawa, amuytʼasirïñasawa ukat khitinakas Diosan munañap lurapki jupanakarusa uñtʼañasarakiwa. Chiqas Diosaw ukham wali sum amuytʼasiri lurawayistu (Mateo 7:16-19; Juan 17:3; Romanos 12:1, 2).

[Qhanañchäwi]