Bibliat yatxatasaw nayra jakäwinakapxa jaytawayapxi

Motocicleta apnaqañaru, deportenakaru ukat droganakampi qulljasir yatinuqtat mä chachaxa, ¿kunjamatsa Diosan arunakapat taqi chuyma yatiyañ amtawaypachäna? ¿Kunasa qullqit anatir jaqirux qullqit anatañ jaytañataki, ukhamat familiapar mä aski irnaqäwimpi uywañatak yanaptʼpachäna? Jehová Diosar luqtir awk taykani mä tawaquruxa, ¿kunasa Biblian yatichäwinakap apanukutapat amuytatasiñapatakix yanaptʼawayäna? Uka jisktʼanakaruxa jupanakpachpaw qhanañchistani.

KHITISA

SUTI: TERRENCE J. OʼBRIEN

MARA: 57

MARKA: AUSTRALIA

NAYRA JAKÄWIPA: DROGAMP QULLJASIRÏNWA UKAT MOTOCICLETA APNAQAÑAR WALI YATINUQTATÄNWA

NAYRA JAKÄWIJA: Brisbane sat markana, Queensland (Australia) capitalapänwa jilsuwayta. Familiajax católica iglesiankiripxänwa, ukampis janïr kimsaqallq mara phuqkayät ukhaw iglesiar jan sarxapxayätti. 10 maranïxayäta ukhaxa, Gold Coast uksaruw sarxapxayäta. Jachʼa lamar quta thiyan jakasitaj laykuxa, qʼaxu waynäkasax nadañaru ukat surf sat anatañarukiw saraskiriyäta.

Ukampis janiw kusisit jakaskayätti. 8 maranïkayät ukhaw tatajax jaytanukuwayxapxitäna. Mamajax wasitatwa jaqichasxäna, ukampis alcoholampi machjasiñanaka ukat nuwasiñanakakiw utajan sapa kutis utjaskäna. Mä arumax mamajampi, padrastrojampix walpun tuqtasipxäna. Ukat ikiñajar quntʼasisaxa, nayatï mä urux casarasïxa janipuniw warmijampix tuqiskäti sasaw arsuwayta. Ukham jan waltʼäwinakas utjchïnxa, phisqa jila kullakanakajampi, mamajampi, padrastrojampi ukat nämpix mayachtʼataw jakasipxayäta.

Waynäkayat ukhaxa, amigonakajatxa waljaniw munañaparuk sarnaqapxirïna. Cigarro pitirinaka (fumirinaka), machirinaka, droganakamp qulljasirinaka ukat jan kunarus yäqiri ukhamäpxänwa. Nayas jupanakjamarakiw sarnaqañ qalltxayäta, ukaw wali llakkañänxa. Ukhamarusa, motocicleta apnaqañxa walpun munayäta, walja kutis chijinakar purtʼasiwaykstxa apnaqaskakirïyätwa. Chiqansa, Australiapacha motocicletat muytanïñ amtayäta.

 Uka maranakanx jan kuna llakinikiw sarnaqasiyäta. Ukampis akapachan jan waltʼäwinakapat lupʼirïta ukat jaqinakax uka jan waltʼäwinakar jan yäqapxatap uñjasax wal llakisirïta. Diosatsa, religionatsa ukat jaqinakax kunjamsa jutïrin jakasipxani uka tuqinakat kunatï chiqäki uk wal yatiñ munayäta. Uka tuqit pä tatakuranakar jisktʼkayäta ukhaxa, arusxattʼatanakapax janiw chuymar purtʼkitänti. Ukatxa walja pastoranakampiw parltʼarakiyäta, ukat kuntï sapkitän ukax janirakiw chuymajar purtʼkitänti. Ukhaw mä amigojax Eddie sat Jehová Diosan mä Qhanañchiripar uñtʼayitäna. Pusi kutiw jupampix parltʼapxta, ukat jisktʼanakajarux Bibliampipuniw qhanañchtʼitäna. Qalltan parltʼkayät ukhatpachaw chiqa yatichäwinak yatiqataj amuyasiyäta. Ukampis uka tiemponxa, kunatsa uka yatichäwirjam sarnaqañajax wali wakiskirïnxa uk janiw amuykäyätti.

KUNJAMSA BIBLIAX NAYRA JAKÄWIJ JAYTXAÑ YANAPTʼAWAYITU: Australiapacha viajesaxa, Jehová Diosan yaqha Qhanañchiripampiw parltʼarakiyäta, ukampis Queensland sat markar kuttʼasaxa, suxta phaxsiw jupanakampix jan jikisxayätti.

Mä urux irnaqäwijat utajar kuttʼxasaxa, maletinas waytʼata wali suma isthaptʼat pä chachanakar callen sarnaqaskir uñjasax Jehová Diosan Qhanañchirinakapäpxpachaw sasin amuyayäta. Jupanakar jakʼachasisinsti Jehová Diosan Qhanañchirinakapäpxtati sasaw jisktʼta, ukat jïsa sataxa, Bibliat yatiqañ muntxa sasaw sista. Ukat jankʼakirakiw tantachäwinakapar sarañ qalltawayta, ukat 1973 maranxa, Sydney sat markan apaskän uka jachʼa tantachäwir kunaw sarta. Ukampis familiajax janiw Bibliat yatiqañaj munkänti, yamas mamajax janipuniw munkänti. Ukatwa Jehová Diosan Qhanañchirinakapampi tantachasiñsa, Bibliat yatiqañsa jaytxayäta. Ukat uksarux mä mara phuqatpachaw críquet sat anatañarukiw sarxayäta.

Tiempompixa, Bibliat yatiqaskayät ukhax kunja kusisitakis jikxatasiyäta ukwa amuyasiyäta. Ukatwa, Jehová Diosan Qhanañchirinakapar thaqtasaxa, wasitampiw tantachäwinakar sarañ qalltxayäta ukat janirakiw jan wali amigonakajampis chikachasxäyätti.

Wali munasiri Bill sat mä jilïr jilatampiw Bibliat wasitat yatiqañ qalltxayäta. Jupampix may yatiqayäta ukaw nayra jakäwix jaytxañ yanapitäna. Job tatan sarnaqäwipat yatxatasax akham sasaw uka jilatax situ: “Chiqpachansa, Job tatax janiw Diosar luqtañ munkiti sasaw Supayax saskäna. ¿Khitinakampitsa ukham parlpacha?” sasa (Job 2:3-5). Ukxarusti Diosan nayra luqtirinakapan sutinakapwa aytañ qalltayäta, ukampis Bill jilatax wali pacienciampiwa: “Jïsa, jïsa, ¿ukat khitinakampirusa?” sasaw jisktʼitäna. Jisktʼapar jan sum qhanañchataj amuyasinsti akham sasaw uñkatasax situ: “Jumarus ukhamwa Supayax saraktamxa” sasa. Uka arunakapax chuymarupuniw purtʼitäna. Chiqa yatichäwinaka yatiqatajxa sum yatiskayäta, ukampis kunatsa uka yatichäwinakarjam sarnaqañajax wali askïnxa, ukhaw ukxa qhan amuytʼasiyäta. Ukat pusi phaxsirux bautisasxäyätwa.

WALJA ASKINAKWA KATUQAWAYTA: Biblian yatichäwinakap jan uñtʼkiriskayät ukhax kunjamakïkasapän jakäwijax uk amuykiptʼasisinxa wal llakthapista. Inas uñtʼkayäta uka jaqinakjam jan walinakar purtʼasiriskayäta, yaqhipanakax drogamp qulljasipxatapata jan ukax alcoholamp machjasipxatapatxa jiwatäxäpxiwa, ukat yaqhanakasti matrimoniopanx jan waltʼäwinakarupuniw purtʼasiwayapxi.

Ukampis nayax wali kusisitaw jakastxa. Jaqichasitajatxa pä tunka phisqani maranakaw pasawayxi, ukat Margaret warmijamp chikax Australian utjki Jehová Diosan Qhanañchirinakapan sucursalapan luqtasipkta.  Jichhakamax waljaniruw Bibliat yatichasax nayra jakäwinakap jaytxapxañapatak yanaptʼawayapxta, kamisatix Bibliat yatiqasax nayax nayra jakäwij jaytawaykayäta ukhama. Ukhamatwa walja amigonak jikxatawayapxta, niyakixay familiajax Diosar jan luqtapkchixa, jupanakar uñtʼañaw wal chuymachtʼitu. Margaret warmijax Diosar luqtir familianwa jilsuwayäna. Janipuniw warmijampix tuqiskäti sasin arsutajatxa niyaw pusi tunka maranakäxi, warmijan yanaptʼapampix uka arsutajar phuqawaytwa, chiqansa janisay mä amtanikïpstxa, Biblian yanaptʼapampix janipuniw chʼaxwawayäpkti.

KHITISA

SUTI: MASAHIRO OKABAYASHI

MARA: 39

MARKA: JAPÓN

NAYRA JAKÄWIPA: QULLQIT ANATIRÏNWA

NAYRA JAKÄWIJA: Iwakura uksankirïtwa, ukax Nagoya markatxa trenat kimsa tunka minutonak sarañankiwa. Awk taykajax wali suma jaqïpkaspas ukham amuyayäta. Ukampis tiempompix tatajax Japón markankir yakuza sat sutini ñanqha jaqinakamp chikätap yatiyäta, ukat familiajarus sallqa luratanakapampi uywaskirïtap yatiyäta. Ukat sapürurakiw machirïna. Pä tunka maranïkayät ukhaw tatajax cirrosis sat usumpi jiwawayxäna.

Awkijax Corea markankirïtap laykuw jaqinakan jiskʼachat uñjasipxirïyäta. Taqi ukanakaw qʼaxu waynaskayät ukhax wal tʼaqhisiyitäna. Ukat escuelar qillqayasisax janikiw sumpach sarirïkti, mä mara pasatatxa janiw sarawayxti. Ukhakamax jan wali sarnaqirit uñtʼatäxayätwa. Ukat Corea markankirïtaj laykux irnaqäw jikxatañax wali chʼamänwa. Ukampis irnaqäw jikxatkayät ukhax qunqur usuchjasisinxa janiw irnaqirjamäxayätti.

Jakañatakix pachinko sat anataña anatañ qalltayäta. Uka maranakanxa, mä tawaqumpiw jakaskayäta, suma irnaqäw jikxatam ukat jaqichasxañäni sasaw sitäna. Ukampis pachinko anatasax walja qullqwa ganiriyäta, janirakiw jan wali sarnaqäwij jaytañ munkäyätti.

KUNJAMSA BIBLIAX NAYRA JAKÄWIJ JAYTXAÑ YANAPTʼAWAYITU: Mä uruxa, Jehová Diosan mä Qhanañchiripaw utajar purinïna ukat La vida... ¿cómo se presentó aquí? ¿Por evolución, o por creación? sat librwa churawayitu. Chiqpachansa, janipuniw kunapachas ukham jisktʼasirïkti. Ukampis uka libro liytʼasaxa, Bibliat yatxatañ munayäta. Jiwatatxa jakañax utjaskakpachati sasax jisktʼasipunirïyätwa. Uka jisktʼanakajaru ukat yaqha jisktʼanakajar Bibliamp qhanañchtʼapxitäna ukhaxa, chʼamakats qhanar uñatatkirïstsa ukham jikxatasiyäta.

Ukatxa Biblian yatichäwinakaparjam sarnaqañajaw wakisxäna, ukwa amuyasiyäta.  Ukatwa, uñtʼatajampis jaqichasxayäta, janiw cigarrsa pitxayätti, ñikʼutsa chuchit tiñiyaskayäta uksa mururayäsxayätwa ukat sumarak isthaptʼasxayäta. Ukat janirakiw qullqits anatxayätti.

Ukanak jaytxañax wali chʼamänwa. Sañäni, chʼamajampikix janiw cigarro pitañ jaytirjamäkayätti, ukampis Jehová Diosar atinisisa taqi chuyma mayisitajaw cigarro jaytxañ yanaptʼitäna. Maysa tuqitxa, pachinko anatañ jaytxasaxa yaqha irnaqäwinwa irnaqxayäta, ukampis uka irnaqäwix nätakix wali chʼamänwa. Qhawqtï anatasax gankayät ukan chikatapak ganxayäta. Ukhamarus, uka irnaqäwix wali qariña ukat chʼama tukuñarakïnwa. Filipenses 4:6, 7 uka qillqataw yanaptʼawayitu, ukanxa akham siwa: “Jan jumanakax kunats llakisipxamti, taqi kunsa Diosar sapxam oracionana, mayipxam yuspagarapxarakim. Diosax jumanakarux churapxarakïtamwa samarañapa, ukasti taqi kuntix jaqix amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpxatam layku” sasa. ¡Uka arunak phuqasirja walja kutipuniw uñjawayta!

WALJA ASKINAKWA KATUQAWAYTA: Qalltanxa, warmijax janiw Jehová Diosan Qhanañchirinakapampi Bibliat yatxatañaj munkänti. Ukampis Biblian yatichäwinakaparjam sum sarnaqataj uñjasaxa, jupax Bibliat yatxatxänwa ukat nämp chikaw tantachäwinakarus sarxarakïna. Jichhax panpachaniw Jehová Diosan Qhanañchiripäpxta. Paninpacha Diosar luqtañax mä bendicionapuniwa.

Bibliat janïr yatxatkäyat ukhax wali kusisitjamakiw amuyasïyäta. Ukampis kunas chiqpach kusisiñax ukwa jichhax sum amuyxtxa. Chiqpachansa, Biblian yatichäwinakaparjam sarnaqañax janiw faciläkiti, ukampis ukhamarjam jakañax wali askipuniwa.

KHITISA

SUTI: ELIZABETH JANE SCHOFIELD

MARA: 35

MARKA: REINO UNIDO

NAYRA JAKÄWIPA: SEMAN TUKUY URUNAKAX FIESTANAKARUKIW SARASKIRÏNA

NAYRA JAKÄWIJA: Hardgate sat markanwa jilsuwayta, uka markax Glasgow (Escocia) sat markat anqäx tuqinkiwa. Paqallq maranïkayät ukhaxa, mamajax Jehová Diosan Qhanañchiripäxänwa, ukatwa Bibliat yatichañ qalltitäna. Ukampis 17 maranïxayät ukhaxa, escuelankir amigonakajampïña, thuquñ utanakar saraña, heavy metal sat musicanak ischʼukiña, alcoholamp machjasiña, seman tukuy urunakax fiestar saraña, ukanakak lurañ munirïyäta. Janipuniw Diosatsa, Bibliatsa yatiñ munirïkti. Ukampis 21 maranïxayät ukhax janiw ukhamäxayätti.

 Irlanda del Norte uksa tuqiruw familiaranakajar tumptʼir sarawayta. Ukankkasaxa, protestantenakaru desfilaskir uñjayäta. Kunjamsa protestantenakampi, catoliconakamp uñisisipxäna uk uñjasax wal llakthapisiyäta. Ukat kunsa jakäwijamp luraskpachätxa sasaw amuytatasiwayta. Mamajax Bibliat kuntï yatichkitäna uk amthapisiyäta ukat Diosan kamachinakap pʼakintirinakar Diosax jan katuqatapsa amthapisirakïyätwa. Ukapachaw Diosan amtaparjam sarnaqañat sipansa munañajaruki sarnaqaskataj amuyastxa. Escocia markar kuttʼxasax Biblian yatichäwinakap taqi chuymapuniw yatxatä sasaw amtayäta.

KUNJAMSA BIBLIAX NAYRA JAKÄWIJ JAYTXAÑ YANAPTʼAWAYITU: Jilskäyät uka markan Jehová Diosan Qhanañchirinakapan tantachäwinakapar wasitat sarañ qalltxasaxa, wal axsarayasiyäta. Ukampis taqiniw wali sum katuqtʼapxitäna. Biblian yatichäwinakaparjam sarnaqataj uñjasaxa, wali munasiri mä kullakaw yanaptʼitäna, ukaw taman wali sum jikxatasiñajatakix yanaptʼawayitu. Khitinakampitix discotecanakar sarirïyät ukanakax walpun jupanakamp chika irpañ munapxitäna, ukampis janiw nayrjam sarnaqañ munkti jan ukasti Biblian yatichäwinakaparjam sarnaqañ munxta sasaw sirïta. Tiempompix janiw jawsxapxitänti.

Bibliax kamachinakani librokïkaspas ukham nayrax amuyirïyäta, ukampis qhipatxa janiw ukham amuyxayätti. Biblian qillqatäki Diosan uka luqtirinakapax nayjam sentimientonïpxatapa ukat pantjasirïpxatap yatiqawayta. Kunjamtï nayax Jehová Diosat jithiqtawayäyätxa, ukhamarakiw jupanakax pantjasiwayapxäna. Ukampis taqi chuyma arrepentisipxäna ukhax Jehová Diosax juchanakap pampachänwa. Ukaw ak yatichawayitu, Jehová Diosampi juchanakaj pampachayasiñ munasax taqi chuymaw Jupar kusisiyki uk lurañatak chʼamachasiñajax wakisïna.

Mamajan Diosar luqtatapax ukhamarakiw chuymar purtʼitäna. Nayax Diosat jithiqtawaykchiyätsa, mamajax Diosarux taqi chuyma luqtäskakïnwa. Kunatsa Jehová Diosar luqtañax wali askixa ukwa mamajat yatiqasïyäta. Jiskʼaskäyät ukhaxa, janipuniw utat uta yatiyañ munirïkti, janirakiw walja horanak yatiyirjam amuyasirïkti. Ukampis bautisasxäyäta uka qhipatxa, irnaqäwij jaytxayätwa, chika uru irnaqañaki yaqha irnaqäwi jikxattʼasisinxa Diosatak sapür irnaqañ qalltawayta. Kuntï Jesusax Mateo 6:31-33 qillqatan siski uka arunakax chiqaskapunit janich uk yatiñ munayäta, ukanxa Jesusax akham sänwa: “Jumanakax jan llakisipxamti akham sasa: ‘¿Kunsa manqʼañäni? ¿Kunsa umañäni, kunampirakis isisiñäni?’ sasa. [...] Alaxpachankir Awkimax yatiwa kuntix jumanakaru wakisipktam ukxa. Ukhamasti, nayraqatax Diosan reinopa munapxam, ukhamarak kunatix chiqäki jupan nayraqatapanxa ukanaka, ukatsti taqi aka yänakaxa jumanakarux churatakïpxätawa” sasa.

WALJA ASKINAKWA KATUQAWAYTA: Seman tukuy urunak fiestar sarasax janiw kusisitäkayätti janirakiw chuymajas chuymäkänti. Ukampis Diosar luqtxatajatxa, mä suytʼäwinïxtwa ukat wali kusisitarakiw jakasxta. Jichhax jaqichatäxtwa, ukat sapa semanarakiw chachajampix Jehová Diosan Qhanañchirinakapan tamanakapar chʼamañchtʼañataki tumptʼir sarapxta. Uka luräwix wali jachʼa bendicionapuniw nayatakixa. Wasitat nayar katuqtʼatapatxa taqi chuymapuniw Jehová Diosar yuspärtxa.

[22 janan qhanañchäwipa]

“Qalltan parltʼkayät ukhatpachaw chiqa yatichäwinak yatiqataj amuyasiyäta. Ukampis uka tiemponxa, kunatsa uka yatichäwirjam sarnaqañajax wali wakiskirïnxa uk janiw amuykäyätti”

[24 janan qhanañchäwipa]

“Chʼamajampikix janiw cigarro pitañ jaytirjamäkayätti, ukampis Jehová Diosar atinisisa taqi chuyma mayisitajaw cigarro jaytxañ yanaptʼitäna”

[25 janan qhanañchäwipa]

“Bibliax kamachinakani librokïkaspas ukham nayrax amuyirïyäta, ukampis qhipatxa janiw ukham amuyxayätti. Biblian qillqatäki Diosan uka luqtirinakapax nayjam sentimientonïpxatapa ukat pantjasirïpxatap yatiqawayta”