Jesusax kunsa Diosan Apnaqäwipat yatichäna

“Jesusax jachʼa markanakana, ukhamarak jiskʼa markanakanwa sarnaqäna [...] Diosan reinopat parlasa.” (LUCAS 8:1)

JESUSAX akham sänwa: “Arsupxtawa kunatï chuymanakaman phuqhantatäski ukanaka” sasa (Mateo 12:34). Chiqas ukhamäskapuniwa: kunsa wali askirjam uñjtan ukhaxa, uka tuqitpunwa parltʼañ muntanxa. Jesusatakix Diosan Apnaqäwipat yatiyañapuniw nayrankänxa, yatichäwipatxa uk amuyaraksna.

Ukampisa, ¿kunas Diosan Apnaqäwipaxa? Diosan uttʼayat mä apnaqäwiwa, ukat mä reyin apnaqatarakiwa. Mateo, Marcos, Lucas, Juan qillqatanakanxa 110 kutiw uka apnaqäwit aytasi, Jesusax uka apnaqäwitpun jilpach parltʼirïtapwa ukax uñachtʼayistu. ¿Kunjamatsa Diosan Apnaqäwipat ukat kuntï jiwas layku lurkani ukxat jukʼamp yatxatsna? Jesusax kuntï lurkäna ukat arskäna ukar istʼasa.

¿Khitis Diosan Apnaqäwipan uttʼayat reyixa? Janiw jaqin ajllitäkiti; Diosaw juparux ajllisi. Reyïñajatakix Diosaw ajllisitu sasaw Jesusax säna.

Jutaniw sat Mesiasan apnaqäwipax wiñayatakïniwa sasaw Bibliax yatiyäna, Jesusax uk yatirakïnwa (2 Samuel 7:12-14; Daniel 7:13, 14; Mateo 26:63, 64). Ukhamasti, nayaw jutaniw sat Mesiasatxa sasin säna ukhaxa, Diosan ajllit reyipjamaw uñtʼayasxarakïna (Juan 4:25, 26). Ukatwa, ‘Nayan reinoja’ sasax walja kut sarakïna (Juan 18:36).

Apnaqäwijanxa mä qhawqha jaqinakax nayamp chikaw apnaqapxarakini sasaw Jesusax säna (Lucas 22:28-30). Jukʼanikïpxatap laykuw “jiskʼa tama” sasax säna. Ukat akham qhanañchtʼaskakïna: “Alaxpach Awkimax khuyapayasiñapana reinop churaña munapxtam” sasa (Lucas 12:32). Biblian qhip qhipa libropanxa, 144.000 jaqinakaw Diosan Apnaqäwipan apnaqapxañapatakix ajllita sasaw qhanañchasi (Apocalipsis 5:9, 10; 14:1).

¿Kawkitsa apnaqanini? Jesusax Roma markan apnaqir Poncio Pilato sat jaqirux akham sänwa: “Nayan reinoxax janiw akapachankkiti” sasa (Juan 18:36). Ukhamax Diosan apnaqäwipax janiw jaqinakan uttʼayat apnaqäw tuqnämx apnaqkaniti. Diosan Apnaqäwipax alaxpachankir mä apnaqäwiwa, kunattix walja kutiw Jesusax ‘Diosan alaxpachankir apnaqäwipa’ sasax säna (Mateo 4:17; 5:3, 10, 19, 20, NM). *

Aka Uraqin luräwip tukuyxasaxa alaxpachar kuttʼxañätapwa Jesusax yatïna. Ukanwa ajllitanakatakix ‘mä utjäwi wakichaniñapäna’  ukhamat jupamp chikäxapxañapäna (Juan 14:2, 3).

¿Kuna luräwinisa? Arkirinakapar Diosat mayisiñ yatichkasaxa Jesusax akham sänwa: ‘Apnaqäwimax jutpan. Munañamax luraspan, alaxpachansa ukhamaraki aka Uraqinsa’ sasa (Mateo 6:9, 10, NM). Diosan munañapaxa alaxpachan lurasiskiwa, ukat Diosan Apnaqäwip tuqnämaw munañapax aka Uraqin lurasirakini. Ukatakix taqi kunapuniw mayjtʼayatäni.

¿Kunanaksa aka Uraqitakix lurani? Diosan Apnaqäwipax taqi jan walinakwa chhaqtayani. ¿Kunjamatsa? Jan walinak lurapki ukanakaruw aka Uraqit chhaqtayxani (Mateo 25:31-34, 46). Ukhawa jan wali luräwinaksa tʼaqhisiñanaksa wiñayataki tukjani. Kunjamatï Jesusax yatichkänxa ‘llampʼu chuymaninaka’, chiqa chuymaninaka, khuyaptʼayasirinaka, ‘qʼuma chuymaninaka’ ukat sumankayir jaqinakakiw utjxani (Mateo 5:5-9).

Ukhamarusa, taqiniw, suma qʼuma Uraqin jakasxañäni, Diosan Apnaqäwipaw aka Uraqxa mä suma paraisor tukuyxani sasaw Jesusax arsuwayäna. Jiwañatak juchañchat mä jaqix Jesusarux akham sänwa: “Taqi markanak apnaqkäta ukkhax nayat amtʼasitätawa” sasa, Jesusasti akham sarakïnwa: “Chiqpachawa [‘jichhürpacha’, NM] sisma, jumax nayampi chika[w] paraisonkxäta” sasa (Lucas 23:42, 43). Chiqpachansa, Diosan Apnaqäwipaw Edén huertan mä paraisox utjkäna ukhamar aka Uraq tukuyxani.

¿Kunanakamps jaqinakatakix lurani? Jesusax janiw kuntï Diosan Apnaqäwipax lurkani ukak siskänti, jan ukasti luräwinakapampiw uk uñachtʼayäna. Amuytʼañataki, milagronak tuqiw jaqinakarux qulläna, ukax kuntï jutïrin reyjam lurkani uk mä jukʼa uñachtʼayistu. Mateox Diosan amuytʼayataw  akham säna: “[Jesusax] Galilea tuqinakanwa sinagoganakan Diosan qhispiyasiñ arunakap yatiyasa sarnaqäna, ukhamarak jaqinakarus taqi usutanakapat kʼumaraptayasa” sasa (Mateo 4:23).

Jesusax kunayman usunakwa qulläna. Amuytʼañataki, yurïwipatpach mä juykhu jaqiruw uñjayäna (Juan 9:1-7, 32, 33). Mä kutixa, llamktʼasakiw lepra usuni mä jaqirux qulläna (Marcos 1:40-42). Ukat ‘mä uqar amutu chachar irpanipxäna’ ukhaxa, ‘Uqaranakamppacharu kʼumaraptayiri; amutunakarus arsuyirïtapwa’ uñachtʼayäna (Marcos 7:31-37).

Diosan ajllit Reyipax jiwatanakarus jaktayänwa. Kimsaniruw Jesusax jiwatat jaktayäna sasaw Bibliax qhanañchi: mä viuda warmin mä sapa yuqaparu, 12 maran imill wawaru ukat Lázaro sat munat amigoparu (Lucas 7:11-15; 8:41-55; Juan 11:38-44).

Jesusax mä unañchäwi tuqnämwa apóstol Juanarux kunjamsa Diosan Apnaqäwipan apnaqat jaqinakax jakapxani uk yatiyäna, akham sir istʼäna: “¡Akaxay, Diosax jichhax jaqinak taypinwa jaki! Jupanakampiw jakani, jupanakasti markapäniwa. Dios kipkarakiw jupanakampïni, jupanakan Diosaparakïniwa. Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusxiwa” sasa (Apocalipsis 1:1; 21:3, 4). Uka machaq Uraqinxa janiw tʼaqhisiñasa, ayquñasa jiwañas utjxaniti, ukaw wali kusiskañaxa. Ukhawa, Diosan munañap alaxpachansa Uraqins phuqasiñapataki mayktan ukax phuqasini.

¿Kunapachas apnaqxistani? Apnaqäwijan apnaqañ qalltxä ukharakiw ‘akapach tukuskan uka urunakax’ qalltani sasaw Jesusax säna. ¿Kunapachas uka urunakax qalltawayi? Uk amuyañasatakix walja profecianakwa arsuwayäna: Uraqpachanxa, chʼaxwañanaka, manqʼat pistʼañanaka, uraq khatatinaka, kunayman usunakaw utjani sasaw säna; ukat kunayman jan wali luräwinakaw jilxattani sarakïnwa (Mateo 24:3, 7-12; Lucas 21:10, 11). Taqi ukanakasa ukat yaqha profecianakapasa 1914 maratwa qhan amuyasxi, uka maranwa Uraqpachanxa Nayrïr Jachʼa Chʼaxwäwix qalltarakïna. ¿Kunsa ukax amuytʼayistu? Jesusax alaxpachan Reyïxatapwa uñachtʼayistu. Ukhamaxa, niyaw Diosan Apnaqäwipax aka Uraqxar apnaqxani, ukhamatwa Diosan munañapax aka Uraqitakix phuqasini. *

Ukhamasti, ¿Diosan Apnaqäwipax wali jakʼankxatap yatiñax sapa maynirux kunjamtʼayistanisa? Kunjamxay sapa maynix Jesusan yatichäwinakapar istʼchiñäni ukarjamäniwa.

[Qhanañchäwinaka]