Jesusan yatichäwinakapa

Chiqa yupaychäwi

¿Diosatakix taqi yupaychäwit askïpacha?

▪ Yupaychäw pʼiqtʼirinakax kʼari yatichäwinak jaqinakar yatichapxäna, uk uñjasax Jesusax walpun chuym ustʼayasïna. Ukatwa amuyasipxam khitinakatix “‘Diosatwa parlta’ sasa kʼarisisa sarnaqapki ukanakatxa. Jupanakasti ovejanakar uñtataw jumanakan ukarux jutapxi, ukampis chuymapanxa ñanqha lunthat qamaqinakawa” sas iwxtʼäna (Mateo 7:15). Chiqas kʼari yupaychäwinakax kunayman jan walinak Diosan sutipxarux lurapxi.

Diosar mayisisax Jesusax akham sänwa: “Arunakamasti chiqawa” sasa (Juan 17:17). Chiqansa, Biblian chiqa yatichäwinakap mayjtʼayir kʼari yupaychäwinakarux Diosax janiw askirjam uñjkiti. Ukatwa Jesusax kʼari chuyman judionakan yupaychäwi pʼiqtʼirinakaparux Diosan aka arunakap säna: “Janiw akchʼas walïkiti jupanakan yupaychaña churatanakapaxa, jupanakan yatichäwipax jaqinakan yatichäwipakïtap layku” sasa (Mateo 15:9).

¿Chiqa yupaychäwix utjiti?

▪ Samaritan warmimp parlkasaxa, Jesusax akham sänwa: “Jumanakax kuntï jan yatipkta ukwa yupaychapxta” sasa. Samariankir jaqinakax kʼari yupaychäwipampi sallqjatäpxatap uñjasaw Jesusax akham qhanañchäna: “Chiqpacha yupaychirinakax Awkirux ajayuna, chiqpachanarakwa yupaychapxani, kunalaykutix Awkix ukhama yupaychirinakarakwa thaqi juparu yupaychayasiñataki” sasa (Juan 4:22, 23, MT). Ukhamasti, chiqpach yupaychirinakax utjchi ukhaxa, chiqa yupaychäwix utjarakiwa.

Jesusax uka chiqa yupachäwit yatichäna. Jupa pachpaw akham säna: “Jan[iw] kuns nayan munañaxat lur[kti]. Nayax arstwa kuntix Awkix yatichkitu uka” sasa (Juan 8:28). Ukatwa akham säna: “Nayätwa thakixa, chiqasa, jakañasa. Naya tuqikiw Awkin ukar puriñax utji” sasa (Juan 14:6). Ukhamax alaxpachankir Awkisar jakʼachasiñatakix mä thakik utjchi ukhaxa, mä chiqa yupaychäwikiw utjañaparaki.

 ¿Kunjamatsa chiqa yupaychäwitap yatsna?

▪ Chiqpach cristianonakax Jesusatwa aka pusi tuqit yatiqasipxi.

1. “Nayasti sutimxa jupanakarux yatiytwa”, sasaw Jesusax Jehová Diosar säna (Juan 17:26, MT). Chiqpach cristianonakax Diosan sutip yatiyapxarakiwa.

2. Jesusax Diosan Apnaqäwipatwa yatiyäna ukat arkirinakaparux utat ut sarasaw Diosan Apnaqäwipat yatiyapxäta sarakïnwa. “Kawkïri jiskʼa markarusa, jan ukax jachʼa markar mantasasa thaqtapxam khititï askïki uka jaqiru” sasaw jupanakarux säna. Qhipatsti akham sarakïnwa: “Taqi akapachankir jaqinakar yatiyir sarapxam, nayar arkir tukuyapxam” sasa (Mateo 10:7, 11; 28:19). Jichhürunakanxa ukham yatiyasipkakitapatwa chiqpach cristianonakarux uñtʼasiraki.

3. Jesusax janipuniw politicar mitiskänti. Arkirinakapax janirakiw politicar mitisipkänti, jupanakatx akham sänwa: “Jupanakax jan[iw] akapachankir[ïpkiti], kunjämtix nayax jan akapachankirïktxa ukhama” sasa (Juan 17:14). Ukhamasti, chiqpach cristianonakax janipuniw politicar mitisipxañapäkiti.

4. Jaqinakar wal munasitap laykuw Jesusax jakäwip luqtañatak jankʼakïna. Ukat arkirinakaparux akham sasaw amtayäna: “Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:35). Mä arunxa, chiqpach cristianonakax maynit maynikamaw munasipxi, ukat janirakiw guerranakans nuwasipkiti.

¿Kunjamsa chiqa yupaychäwix jaqinakar yanaptʼi?

▪ Diosar sum yupaychañatakix Juparuw nayraqat sum uñtʼapxañapa. Ukaw jaqinakarux jakäwipan yanaptʼani, Diosar munasiñapas jukʼampiw jilxattarakini. Ukat Jupar munasipki ukanakarux wiñay jakañ churañ amtaraki. Ukatwa Jesusax akham säna: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3).

Jukʼamp yatxatañatakixa, aka libron 15 jaljap uñxattʼäta, ¿Kunsa Bibliax chiqpachapuni yatichi? ukax Jehová Diosan Qhanañchirinakapan luratawa.

[30 janan fotopa]

“Amuyasipxam khitinakatix: ‘Diosatwa parlta’ sasa kʼarisisa sarnaqapki ukanakatxa. Jupanakasti ovejanakar uñtataw jumanakan ukarux jutapxi, ukampis chuymapanxa ñanqha lunthat qamaqinakawa.” (Mateo 7:15)