‘Jupax jaqin chuymapwa yatiraki’
Diosar jakʼachasipxam
‘Jupax jaqin chuymapwa yatiraki’
KUNTÏ uñjktan ukarjamakiw jaqinakax mayninakar walitsa jan walitsa uñjtanxa. Kunjamtï yatktanxa, janiw khitis jaqin chuymap yatksnati. Ukampis Jehová Diosax jaqin chuymap sum yati. Ukaw 1 Samuel 16:1-12 qillqatanx amuyasi.
Niyas uñjksn ukham amuytʼañäni. Diosax israelitanakan machaq reyip ajlliñampïskiwa. Ukatwa Samuel profetarux akham saraki: “Isaí chachan utapar sarañamwa munta, Belén chiqaru, nayasti mayni wawaparuw ajllista reyïñapataki” sasa (1 jiskʼa tʼaqa). Amuytati, khitirus ajllisïna ukan sutipxa janiw qhanañchkiti, Isaí chachan maynïr wawaparuw ajllista sakïnwa. Samuelux Belén markar sarkasax inas akham jisktʼaschïna: “¿Isaí chachan kawkïr yuqaparus Jehová Diosax ajllpacha uk kunjamatarak yatïsti?” sasa.
Purisinsti, Samuelux sacrificio luqtañatakiw wakichtʼasïna ukat Isaí chacharus wawanakaparus ukankapxañapatakiw mayirakïna. Ukat Eliab sat jilïr yuqap uñjasinxa wal uñkattʼäna ukat “akapunïpachaw kawkïri jaqtix Tatitux reyïñapataki ajlliski ukaxa” sasaw säna (6 jiskʼa tʼaqa).
Ukampis Jehová Diosax janiw Samueljam amuykiti. “Jan jumax uñnaqapataki, ukhamarak jachʼa tansätapataksa ajllimti, nayasti ukanakxa maysaruw apanuktxa” sasaw Samuelurux säna (7 jiskʼa tʼaqa). Diosax janiw Eliab chachan jachʼa tansätapa suma uñnaqtʼanïtapak uñjkänti, jan ukasti kunjam chuymanïkäntix ukaw Jupatakix jukʼamp askïnxa.
¿Kunjamats uk yattanxa? Jupa kikpaw Samuelur akham qhanañchtʼäna: “Janiw kuntix jaqix uñkatki ukhamäkaniti; jaqix uñnaqakwa uñjixa, ukampisa nayax jaqin chuymapwa yatiraktxa, ukwa uñjaraktxa” sasa (7 jiskʼa tʼaqa). Ukhamawa, Diosax chuymwa uñji: Kunjam amtanïtansa, amuyunïtansa, mä arunxa kunjam chuymanïtansa ukwa uñji. Chiqansa, Jupaw kunatï chuymasan utjki uk sum yati (Proverbios 17:3). Janiw Eliab saparukix jan ajllkänti jan ukasti, suxta jilanakaparus janiw ajllkarakïnti.
Ukampis Isaí chachan David sat sullkïr yuqapaw utjaskarakïna, ‘jupasti oveja awatiskäna’ (11 jiskʼa tʼaqa). Ukat irptanim sasaw sarakïna, purin ukspachaw, Jehová Diosax Samuelur akham saraki: “Akapï reyitaki ajllitäñapäki ukaxa. Jichhax sartasim, ukatsti juparux reyïñapataki yaqhachxam” sasa (12 jiskʼa tʼaqa). Davitax ‘wali suma uñnaqtʼanïkchïnsa’ Diosax suma chuymanïtapatwa ajllïna (1 Samuel 13:14).
Jaqinakax suma uñnaqtʼanïñatakwa wal llakisipxi, uka taypinwa jakasipxtanxa. Jehová Diosax janiw jachʼa tansätanti, jiskʼa tansätancha jan ukax suma uñnaqtʼanïtanti janich suma uñnaqtʼanïktan ukak uñjkiti, jan ukasti kunjam chuymanïtansa ukaw Jupatakix jukʼamp askixa. Uk yatiñax wali askipuniwa. ¿Janit ukax Diosan nayraqatapan suma chuymanïñatak chʼamachasiñar wiytkistu?