Familianakataki

Kunjamatsa suegronakamp sum apassna

Jenny * sat mä warmix akham siwa: “Ryan chachajan taykapax qhanapuniw nayar jan munatapax amuyasïna. Ukat awk taykajax janiw chachajarux sum uñjkarakïnti. Janipuniw khitirus ukham jan wal uñjirx uñjirïkti. Ukat khitin awk taykaparusay visitir sarapkchiyätxa: nayas jan ukax jupas janiw sum jikxatasipxirïkti” sasa.

Ryan chachax akham sarakiwa: “Janipunis khitis wawanakapatakjamäkasp ukham taykajax amuyäna; ukatwa qalltatpach Jenny warmijarux jiskʼachäna. Ukhamarakiw Jenny warmijan awk taykapax nayar jan sum uñjkitänti: kuna luratanakajas jupanakatakix janipuniw askïkänti. Ukhamïpänwa sapa maynix awk taykanakajat arxatasxapxirïta ukat maynin awk taykaparus jiskʼachxapxarakirïta” sasa.

NAYRATPACHAW jaqinakar laruyapki ukanakax suegronakampi jan waltʼayasiñanakatx kunayman laruñanak apsuñ yatipxi. Ukampis chiqpach jakäwinxa uka jan waltʼayasiñanakatx janiw akchʼas larusiñjamäkiti. Indiankir Reena sat mä warmixa akham siwa: “Suegrajax matrimoniojarux walja maranakaw jan waltʼaykänti. Uka jan waltʼäwinakat suegrajar jan kamsirjamäsax chachajampikiw ukanakat tuqisxayäta. Ukhamipänxa chachajax suma esposoniti jan ukax suma yuqänicha ukx janiw kamachtʼirjamäkänsa”.

Ukhamasti, ¿kunatsa awk taykanakax wawanakapan matrimoniopar mitisipxi? Qalltan Jenny sat warmit parlaniwaykayätan uka warmix akham sasinwa qhanañchi: “Inas akham sapxchi: wawäskiwa janiw kuns yatkiti kunjamarak wawajarust sum uñjaspasti”sasa. Reena sat warmin Dilip chachapax uka tuqit akham sasaw jukʼamp qhanañchtʼaskaki: “Inas wawanakap wali chʼam tukus uywarasax jichhax jupanakarux janis yäqxapxaspa ukham amuyasipxchi. Jan ukax janiw yuqajan jan ukax phuchajan matrimoniopax nayrar sartkaniti sasin inas pächasipxarakchi” sasa.

Ukhamäkchi ukhasa suegronakakis jan waltʼayasiñatak juchanïpkasp ukham janiw amuyañasäkiti. Yaqhippachax jupanak kikpaw awk taykanakapax matrimoniopan mitisipxañapatak juchanïpxi. Uk amuytʼañatakix  Australiankir Michael ukat Leanne sat chacha warmit parltʼañäni. “Leannex wali mayachtʼat familiankiriwa, taqi kunsa jupanakkamax wali sum parltʼasipxi. Ukatwa, casadoxapxayäta ukhaxa, kuntï panijak amtapxañajäkayät ukx awkiparuk jisktʼasirïna. Awkipax wali yatiñanïkchïnsa, nayar jan jisktʼatapaw chuym ustʼayitäna” sasaw Michael chachapax qhanañchi.

Chiqansa, suegronakamp jan waltʼayasiñax mä matrimoniorux janiw waltʼaykaspati. ¿Ukhamant jumax jikxatasirakta? ¿Kunjamsa suegronakamamp apasipxta? Kuna pä tuqitsa jan waltʼayasiñanakax utjaspa ukat kuna iwxtʼanakas yanaptʼistaspa uk jichhax uñjañäni.

NAYRÏRI: Awk taykapampikïñ chachajax jan ukax warmijax munaski sasaw jupanakax amuyasipxaspa. Españankir Luis sat chachax akham saraki: “Warmijax familiap jakʼan jakasipxañaj munäna, jan ukham lurkirist ukhax janis jupanakar munaskirist ukhamäspaw sasaw warmijax amuyäna. Chiqas kunapachatï wawajax yurkäna ukhaxa, awk taykajax niya sapürjamaw utajar jutapxirïna, ukaw warmijarux mayjtʼasiyäna. Ukhamïpanwa panijax walja kut tuqisxapxirïta” sasa.

Akanak amtañamawa: Chacha warmjam jakasiñat parlkasaxa, Bibliax akham siwa: “Chachax awkipsa, taykapsa jaytxani[wa], warmipampi mayachasxañataki, panpachanisti mä sapa jaqikïpkaspasa [‘mä sapa jañchikïpkaspas’, NM] ukhamäpxaniwa” sasa (Génesis 2:24). Ukhamasti, ¿‘mä sapa jañchiki’ siski ukax kun sañs muni? Janiw aliqak chik jakasiñ sañ munkiti, jan ukasti chacha warmjam yaqha familia uttʼayxañ sañ muni, ukaw familianakapat sipans nayrankxañapa (1 Corintios 11:3). Chiqansa, awk taykanakaparux respetasipkakiñapawa ukat yanaptʼasipkakiñaparakiwa (Efesios 6:2). Ukampis awk taykapar yanaptʼañ laykux chachaman jan ukax warmiman armtʼat jan yäqatjam uñjasisma ukhaxa, ¿kunas pasaspa?

Mä qhawqha iwxtʼanaka: Sum amuytʼirïñataki ukat kuns yäparjam uñjañatakiw chʼamachasipxañama. ¿Chiqapunit chachamas jan ukax warmimas familiapampikïñ munaski? ¿Jan ukax awk taykanakamamp mayj mayj apasiñ yatitapkta ukakicha? Ukhamächi ukhaxa, ¿kunjam uywatäktatï ukakich mayj amuyaytamxa? ¿Jan ukax awk taykapampikïñ munaski sasinakch amuyta? (Proverbios 14:30; 1 Corintios 13:4; Gálatas 5:26.)

Chiqansa uka jisktʼanakar jaysañax chʼamakïspawa, ukatakix kunatï chuymasan utjki uk janiw imtʼañasäkiti. Ukampis, ukham jisktʼasiñamax wali wakiskiripuniwa. Suegronak tuqitak sapakut tuqisisipkstaxa, inas jan waltʼayasiñanakamax yaqha tuqitäskchi, uk amuyasipxañamawa.

Chachatsa jan ukax warmitsa amuyuparjamakiw kuns lurañ munapxi, janiw kuntï maynix amuyki ukhamarjam uñjañ yatipkiti, ukatwa matrimonionx jan waltʼayasiñanakax utji. Ukampis chacha warmjamax janiw taqi kunan mä amtanikïñax utjkarakispati (Filipenses 2:4; 4:5). Mexiconkir Adrián sat chachax ukhaman uñjasïna. Jupax akham siwa: “Kunjam familiantï warmijax jilsuwaykatayna ukax janipuniw jupar waltʼaykänti. Ukatwa suegronakajampix jan sint chikachaskayätti. Walja maranakaw jupanakamp jan chikäñ munkayätti. Ukhamïpänwa warmijampix jan waltʼayaskayätti, kunattix jupax wal familiapat llakisïna ukat mamapampis wal jikisiñ munarakïna” sasa.

Tiempompixa, ukham amuyañax jan askïtapwa Adrián chachax amuyasxäna. Jupax akham siwa: “Walja tiempo awk taykapampïsax warmijarux janiw waltʼaykiti, ukampis jupanakamp jan jikisisax llakisxakirakiwa. Ukatwa, suegronakajampis sumankthapipxta,  ukat jupanakamp sum apasiñatakiw chʼamachasirakta” sasa. *

¿JANIT AKHAM LURAPKASMA? Kunas suegronakamamp jan sum apasipxatamatx sint llakisiyapxtam uk sapa mayni qillqtʼasipxam. Ak janiw armasipxañamäkiti, kuntï amuyapkta uk qillqtʼasipktaxa, ukatwa sum amuytʼasis qillqtʼasipxañama. Ukat qillqtʼasitanakamxa warmimaru jan ukax chachamaruw churañama, ukat panpachaniw kunjamats maynit maynikam yanaptʼasipxasm uk amuytʼapxañama.

PAYÏRI: Suegronakax jan yanaptʼ maykatpachaw sapakut iwxtʼasiñ yatipxi. Kazajistán markankir Nelya sat warmix akham saraki: “Casarasisax paqallq maraw chachajan familiapampi jakasiyäta. Phayatajatsa, qʼumachatajatsa, wawa uywatajatsa wal jiskʼachapxitäna. Chachajampi suegrajamp parlañax inamayakïnwa. Antisas jukʼampikiw jan waltʼayasxapxayäta” sasa.

Akanak amtañamawa: Maynix jaqichasxi ukhaxa, janiw awk taykapan apnaqatäxiti. Bibliax akham siwa: “Cristowa taqi chachan pʼiqipaxa, chachasti warmin pʼiqiparakiwa” sasa (1 Corintios 11:3). Ukhamäkchi ukasa awk taykaparux respetasipkakiñapawa, kunjamtï qhanañchtʼaniwayktan ukhama. Proverbios 23:22 qillqatax akham amtayistu: “Istʼam jumar jathasir awkimaru; taykamax chuymanïxani ukkhaxa jan jiskʼachamti” sasa. Ukhamasti, ¿awk taykamasa jan ukax warmiman jan ukasti chachaman awk taykapasa amtanakaparjamak kuns lurayañ muniristam ukhax kamachasmasa?

Mä qhawqha iwxtʼanaka: Jumas suegronakamäkasm ukham amuytʼasiñamawa. “Yaqhippachax awk taykax wawanakapatakix askikïsipkatapwa yatiñ munapxi” sasaw qalltan aytkayätan uka Ryan sat chachax qhanañchi. Jumatï suegronakaman matrimoniomar jan wali amtampi mitisipxatap amuysta ukhaxa, uka jan waltʼäwix inas Colosenses 3:13 qillqatarjam askichañax wakischispa, ukanxa akham siwa: “Jumanak purax llampʼu chuymampi sarnaqapxam, maynit maynirus perdonasipxarakim jan wali lurasipxsta ukapachaxa” sasa. Ukampisa, yaqhippachax suegronakan sapa kut mitisitapax chacha warm tuqisiyaspa. Ukhaman uñjasipxasp ukhaxa, ¿kuns lurapxaspa?

Yaqhip chacha warminakax suegronakapan jan sint mitisipxañapatakix jupanakampiw parltʼapxi. Ukatakix janiw qhuru arump kuns jan lurapxañapäki uk sapxañamäkiti. * Jumatakix chachamaw jan ukax warmimaw nayranki, ukwa luräwinakamampix  amuytʼayañama. Japón markankir Masayuki sat mä chachaxa, akham amuytʼayaraki: “Kunapachatï awk taykamax kuns sapxani ukhaxa, janiw ukspach uka amuyumax walikipuniw sañamäkiti. Jumaw mä machaq familia uttʼayasktaxa uk janiw armasiñamäkiti. Ukhamax kun lurañatakisa chachamaruw jan ukax warmimaruw nayraqat jisktʼañama” sasa.

¿JANIT AKHAM LURAPKASMA? Kunanakansa suegronakamax matrimoniomarux jan waltʼayapktam ukwa chacha warmjam parltʼasis amuytʼapxañamaxa. Ukxarusti, awk taykanakamax jan jumanakar mayjtʼayañapatakix kuns lurapxäta uk qillqtʼasipxañama, ukat jupanakar respetomp uñjasaw uk phuqayapxañamaraki.

Jila partix kunatsa suegronakax amtaparjam kuns lurañ yatipxi uk amuytʼaña, ukat jupanakamp jan waltʼayasiñanakax utjki ukanakax chacha warmir jan aynachtʼayañapatak chʼamachasisakiw jan waltʼayasiñanakax askichasispa. Jenny sat warmix akham sasaw amuytʼasiraki: “Awk taykanakajat chaxwkasaxa chuymanakajanx kunayman sentimientonakaw utjapxarakitäna. Ukampis juman awk taykamapuniw jan wal lurix sañaxa janiw jan waltʼayasiñanak askichañatakix yanaptʼkänti. Jan ukasti, jukʼampikiw chuym ustʼayxäna. Qhiparuxa, jan jukʼamp chuym ustʼayasiskakiñat sipansa uka jan waltʼäwi askichañatakiw amtawayapxta. Uk amtapxatajax askipunïnwa. Jichhax Ryan chachajampix jukʼamp mayachtʼataw jakasxapxtxa” sasa.

[Qhanañchäwinaka]

AMUYTʼAÑATAKI JISKTʼANAKA

▪ ¿Suegronakajan suma chuymanïpxatapx amuyti?

▪ ¿Kunjamatsa chachajat jan ukax warmijat jan armtʼasisax awk taykajar respetomp uñjiristxa?