Wawanakar yatichañataki

Rebecax Diosan chuymap kusisiyañ munäna

¿REBECA sat sutin khiti tawaqurus uñtʼtati? *... Ukham satänwa Diosat jan jithiqtiri mä suma luqtiripaxa, uka sutix Biblian taqinins wali uñtʼat libron qillqatawa. ¿Jupat mä jukʼs amtastati?... Rebecan sarnaqäwipat mä jukʼa yatxatañäni, ukhamatwa kuns jupat yatiqassna uk uñjarakiñäni.

Diosat jan jithiqtir walja warminakatwa Bibliax parli, ukanakatxa Rebecaruw sutipat pay kutinx aytasi. ¿Khitirus nayraqat aytaspacha uk yattati?... Abrahaman Sara sat warmiparuw aytasi. Kunapachatï Sara warmix chuymanïxäna ukhaw mä yuqall wawanïna, Isaac satänwa ukat tiempompix Rebecampiw jaqichasxarakïna. Ukampis ¿kunjamatsa jupanakax uñtʼasipxäna? Ukat ¿kunjamatsa Rebecax Diosan chuymap kusisiyañ munatap uñachtʼayäna?

Suxta tunka maranak nayraxa, Harán markat mistxapxam ukat Canaán uraqir sarxapxam sasaw Diosax Abrahamampir Sarampirux säna. Mä qhawqha tiempotxa, chuymanïpkstasa mä wawanïpxataw sasaw Diosax säna, uka wawasti Isaac satänwa. ¡Kunjak uka wawar munasipkäna! Ukatwa, mamapax 127 marani jiwxän ukhax Isaacax wali llakit qhiparpachäna. Abrahamax janiw yuqapan Canaán uraqinkir Jehová Diosar jan yupaychir warminakamp jaqichasiñap munkänti. Ukatwa jupan mä sirviripar —inas uka sirvirix Eliezer satächïna— Harán sat markar sarañapatak khitäna, ukar puriñatakix 800 kilometronak viajeñapänwa. ¿Kunarus uka markar sarañapäna? Abrahaman familiaranakap taypit Isaacatak mä warmi ajlliniñataki (Génesis 12:4, 5; 15:2; 17:17, 19; 23:1).

Eliezerampi ukat Abrahaman yaqha sirvirinakapampix tunka camellonakatwa noviataki regalonaka ukat manqʼañanak khumtʼat sarapxäna.  Harán uraqir purisaxa, mä phuju jakʼaruw samartʼapxäna, ukaruw jaqinakax jaypthapir familianakapataki ukat uywanakapatak um apsur jutapxirïna. Ukapachaw Eliezerax Isaacatak mä warm jikxatañ yanaptʼita sas Diosar mayisïna. Ukampis ¿khitis ajllitäni uk kunjamatsa yatisapäna? Kunapachatï um waxtʼita sani ukhaxa: “Umtʼam ukhamarak camellonakamarus umtʼayarakï” siskani ukaw ajllitäñapäna, ukhamatwa yatisapäna.

Niya ukspachaw wali suma uñnaqtʼani Rebeca sat tawaqux phujur um waysur purinïna. Ukat Eliezerax um maykäna ukhax uka tawaqux kamspachänsa, ¿uk amuytʼasmati? Kunjamtï amuytʼktax ukhampunïskiwa: janiw juparuk um waxtʼkänti, jan ukasti camellonakatakis umxa waysurakïnwa. Kutin kutin phujur um waysuñatak tʼijnaqtʼir uñjasax Abrahaman sirviripax wal muspharäna. Chiqans muspharañjamapunïskiwa: ¿qhawqxsa umat pharjat tunka camellonakax umtʼapxasp uk yattati? Niya 1.000 litronakwa umtʼapxi.

Rebecar suma regalonak churkasaw Eliezerax Betuel chachan phuchapätap amuyäna, uka chachax Abrahaman parientepänwa. Uka arumax awkipan utapar qhiparañapatakiw invittʼäna. Ukatxa Canaán uraqit Abrahaman sirvirinakapaw purinipxatayna sasaw familiapar yatiyañatak Rebecax nayrstʼawayäna.

Kunapachatï Labán sat Rebecan jilapax khitinakäpkäntix uk yatïna ukat kuna regalonaktï kullakapar churapkatayna uk uñjäna ukhaxa, jankʼakiw manqtʼasiñataki invittʼäna. Ukampis Eliezerax akham sänwa: “Janiw nayax manqʼkiristti kunatix sañaxäki uka janïra arskasaxa” sasa. Ukatxa Betuel tatarusa warmiparus ukat Labán sat yuqaparus kunarutï jutkäna uk qhanañchtʼarakïna. Rebecax Isaacamp jaqichasxañapx taqiniw munapxäna, ukat jankʼakiw iyaw sapxarakïna.

Eliezerampi ukat jupamp chik jutapkäna ukanakaxa, uka arumax ukan qhiparapxäna manqtʼasipxarakïna, ukat qhipärmantixa Abrahaman utapar Rebecamp kuttʼañatakiw amtapxarakïna. Ukampis jilapampi taykapampix tunka urunakamp qhiparayañ munapxäna. Ukat Rebecar jumax sarañ muntati sasin jisktʼapxän ukhaxa, jankʼakiw jupax “jïsa” sasax säna. Ukhamatwa Eliezeramp chik sarxäna, Néguev sat tuqinakar purisinsti Isaacampiw casarasxarakïna (Génesis 24:1-58, 67).

Jumas Rebecäkasm ukham amuytʼam. Jupax wali jaya chiqaruw sarxäna, ukat janiw familiaparusa amigonakaparus wasitamp uñjañap yatiskänti. ¿Jupatakix ukham lurañax facilakïpachänti?... Janiwa. Ukhamäkipansa, Rebecax Jehová Diosar kusisiyañatakiw uk luräna, ukham luratapatwa mä aski churäwi katuqarakïna: jupan familiapatwa jaqinakar Qhispiyir Jesucristox yurïna. ¿Ukat kunas jukʼamp askixa uk yattati? Jiwasatï Rebecat yatiqasiñäni ukat Jehová Diosan chuymap kusisiyañatak kuns lurañäni ukhaxa, walja bendicionanakwa katuqarakiñäni (Romanos 9:7-10).

[Qhanañchäwi]

JISKTʼANAKA:

▪ ¿Khitïns Rebecaxa? ¿Kunjamats Eliezerarux uñtʼpachäna, uk yattati?

▪ ¿Kunatsa Abrahamax Isaac yuqapan Canaán uraqinkir warmimp jan casarasiñap munkäna?

▪ ¿Kunjamsa Rebecax suma warmïñapxa uñachtʼayäna?

▪ ¿Jumax kunanaksa Diosan chuymap kusisiyañatakix lurasma?