Jesusan yatichäwinakapa

Kunjamatsa wali kusisitässna

¿Kunas kusisitäñatakix wakisi?

▪ Jesusax Wali Uñtʼat Arstʼäwipanxa, kusisiñ tuqit parlkasax akham sänwa: “Kusisiñanïpxiw khitinakatix ajay tuqin aynachtʼatäpxatap amuyasipxi ukanakaxa” sasa (Mateo 5:3). ¿Kamsañs uka arunakampix munpachäna?

Jakañatakix taqiniw samsuñasa, manqʼañasa ukat ums umtʼañasaraki. Uywanakas uka pachparakiwa. Ukampis jiwasax janiw ukanakampik kusisit jakasksnati, jan ukasti kunjamsa kusisit jakassna ukwa amuyañasa. Ukat Jehová Diosakiw chiqpach kusisiñ churistaspa. Ukatwa Jesusax akham sispachäna: “Janiw jaqix tʼantʼa sapampikiti jakkani, jan ukasti taqi kuntix Diosax siski uka arunakampiw jakarakini” sasa (Mateo 4:4). Ukhamasti, Diosar jakʼachasiñax wali askïtap amuyasiñäni ukat “kusisir” Diosar jakʼachasiñäni ukhakiw chiqpach kusisiñ jikxatañäni (1 Timoteo 1:11, NM). Ukat jiwasan kusisit jakasiñasatakix Jehová Diosax mä suytʼäw churarakistu.

¿Kunjamsa Jesusax uka suytʼäw churawayistu?

▪ “Kusisiñanïpxiw llampʼu chuymaninakaxa, jupanakarakiw Diosan arsutaparjama uraqi katuqapxani” sasaw Jesusax säna (Mateo 5:5). Usutanakar qullasa ukat jiwatanakar jaktayasaw Jesusax mä suma suytʼäwi churawayistu. Yatichäwinakapasa ukhamarakïnwa. Ukatwa akham säna: “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” sasa (Juan 3:16). Ukhamasti, Diosan kamachinakaparjam sarnaqirinakakiw Uraqin wiñay jakañ katuqapxani. Jan chuymankipstasa suma chuyman jaqinakampi jakasiñax wali kusiskañapunïniwa. Ukatwa Bibliax “suytʼañanxa kusisitakïpxam” sasin sispacha (Romanos 12:12). Kunjamsa jichhürunakan kusisit jakassna uksa Jesusax qhanañcharakïnwa.

 Kusisit jakasiñatakixa, ¿kuna tuqinakatsa Jesusax iwxtʼäna?

▪ Jaqi masisampi sum apasiñ tuqita, chacha warmi jakasiñ tuqita, yänak tuqita, llampʼu chuymanïñ tuqita ukat yaqha tuqinakats Jesusax iwxtʼarakïnwa (Mateo 5:21-32; 6:1-5, 19-34). Uka iwxtʼanakaparjam sarnaqañaw kusisit jakasiñatakix yanaptʼistaspa.

Khuyaptʼayasirïñaw kusisiñ apani sasaw Jesusax säna (Hechos 20:35). “Mä fiesta lurkät ukkhaxa: pobrenakaru, manconakaru, cojonakaru, juykhunakaru jawsayam; jumax kusisitäyätawa. Jupanakasti janiw jumarux kuttayapkiristamti” sasaw mä kutix Jesusax säna (Lucas 14:13, 14). Ukhamasti, mayninakar yanaptʼasax kusisitarakïsnawa.

¿Kunas jukʼamp kusisiyistaspa?

▪ Mayninakar yanaptʼasax kusisitäsnawa, ukampis Jehová Diosar luqtasaw jukʼamp kusissna. Awk taykanakax wawanakapan wali askinak jikxatir uñjasax wals kusisipkchixa, uka kusisiñat sipans Diosar luqtañaw jukʼamp kusiskañaxa. Ukxa walja jaqinakar yatichkasaw Jesusax qhanstayäna. Mä kutixa, “jaqinak taypit mä warmix jachʼat artʼäna: ‘¡Kusisiñaniwa jumar wawachasin uywktam uka warmixa!’ sasa. Jupasti sänwa: ‘¡Jukʼamp kusisiñanïpxiwa khitinakatix Diosan arunakap istʼapki, ukhamarak jaysapxi ukanakaxa!’” sasa (Lucas 11:27, 28).

Ukhamawa, Jesusax Awkipan munañap phuqasa ukat wiñay jakañ suytʼäwit yatiyasaw wali kusisit jikxatasïna. Mä kutixa, uka suytʼäwit mä warmir parlkasax akham sasaw Jesusax säna: “Nayan manqʼaxax khititix khitankitu ukan munañapa, ukhamarak lurañapa phuqhañaxawa” sasa (Juan 4:13, 14, 34). Jiwasax Diosan arunakapat jaqi masisar yatichasax ukham kusisitarakïñäniwa.

Jukʼamp yatxatañatakixa, aka libron 1 jaljap uñxattʼäta, ¿Kunsa Bibliax chiqpachapuni Yatichi? ukax Jehová Diosan Qhanañchirinakapan luratawa.

[16 janan fotopa]

Chiqpach kusisitäñatakixa, Diosar jakʼachasiñax jiwasatak wali askïtapa ukat kunjamsa kusisit jakassna ukwa amuyañasa