Kunsa liytʼirinakax yatiñ munapxi

¿Jehová Diosan Qhanañchirinakapax milagro tuqi qullapxiti?

▪ Janiwa. Jan ukasti, taqi kunat sipansa Diosan Apnaqäwipat suma yatiyäwinak yatiyañaw jupanakatakix nayranki, kunjamtï Jesusax lurkäna ukhama. Ukhamarusa, chiqpach cristianonakax janiw milagro tuqnam qullapxatapat uñtʼatäpkiti, jan ukasti jukʼamp aski luräwitwa uñtʼatäpxi.

Jesusax khuyaptʼayasiñapatwa usutanakar qullawayäna. Ukax wali wakiskiripuniw taqinitakixa, kunattix jupax Diosan Apnaqäwipan Reyjam apnaqkäni ukhaxa, “janiw khitis siska[ni]ti: ‘Usutätwa’” sasaxa (Isaías 33:24).

Ukampis jichhürunakan qullapki ukanakatxa, ¿kamsnasa? Cristianüpxtwa sirinakas ukat jan cristianüpki uka yupaychäwinkirinakas milagro tuqiw qullapxta sasaw sapxi. Ukampisa, Jesusax uka tuqitx akham sasaw qhanañchäna: sutijxar walja milagronak lurir jaqinakaw uñstani, “ukapachasti nayax jupanakarux sarakïwa: ‘Janipuniw jumanakarux uñtʼapksmati, nayat jithiqtapxit jan wali luririnaka’” sasa (Mateo 7:22, 23). Ukhamasti, ¿milagro tuqi qullapxta sirinakarux Diosax askirjamti uñjpacha?

Kunjamsa Jesusax qulläna uka tuqit kamsis Bibliaxa, ukat kunjamsa jichhürunakan qullapxi uk Qullan Qillqatanakarjam amuytʼañäni. Ukhamatwa jichhürunakan lurapki uka milagronakax Dios tuqitti juti janicha uk yatiñäni.

Jesusax qullañatak chʼamapxa, janipuniw walja arkirinakanïñataki ni walja jaqinakamp arkayasiñatakis apnaqkänti. Jan ukasti, milagronakapxa janiw taqinin uñjkat lurkänti. Ukat khitinakarutï qullkäna ukanakarux janiw khitirus ukx yatiyätati sasaw säna (Lucas 5:13, 14).

Jesusax milagronak lurasaxa janipuniw qullq maykänti (Mateo 10:8). Ukhamarusa, khitinakatï jupan ukar sarapkäna ukanakarux taqiniruw qulläna. Sumwa qullarakïna ukat khitirutï qullkäna ukax janiw iyawsäwiniñapapunïkänti (Lucas 6:19; Juan 5:5-9, 13). Yaqhiparus jaktayarakïnwa (Lucas 7:11-17; 8:40-56; Juan 11:38-44).

Jesusax uka milagronaks lurkchïnxa, janiw jaqir muspharayañataki ukat jupar arkapxañapatakik lurkänti, jan ukasti suma yatiyäwinak yatiyañaw taqi kunat sipansa nayrankäna. Ukatwa arkirinakaparux ukham yatiyaskakiñataki ukat Diosan Apnaqäwipanxa taqiniw kʼumar jakasipxani sasin yatichapxañapatakiw khitäna (Mateo 28:19, 20).

Nayra patak maranakanxa, yaqhip cristianonakax kunayman luräwi katuqapxäna, ukanakatxa yaqhipax usutanakar qullañatak chʼam katuqapxäna, ukampis ukax janiw utjxiti (1 Corintios 12:29, 30; 13:8, 13). Jichhürunakanxa, chiqpach cristianonakax janiw usutanakar qullirit uñtʼatäpkiti, jan ukasti taqi chuyma munasirïpxatapatwa uñtʼatäpxi (Juan 13:35). Uka munasiñakipuniw kunayman markanakata ukat kunayman jañchin chiqpach cristianonakarux mä familiäkaspas ukham mayachtʼi, janipuniw usutanakar qullañatak kuna chʼamas uk lurkaspati.

Markachirinakax chʼaxwapki ukhasa, munasitapatwa Jehová Diosan Qhanañchirinakapax jilat kullakanakapar janipun usuchtʼañ munapkiti. Cristjam munasirïpxatapatwa uraqpachan uñtʼatäpxi. Diosan qullan ajayupakiwa ukham taqi markanakata, kunayman sarnaqäwini, kunayman kasta jaqinakar mayachtʼaspa. ¿Janit jumax Jehová Diosan Qhanañchirinakapan mä tantachäwipar visittʼir sarkasma?

[31 janan fotopa]

¿Milagro tuqi qullapxta sirinakarux Diosax askirjamti uñjpacha?