Diosar jakʼachasipxam

Jehová Diosan chuymaparuw purtʼäna

“JANIW Diosampi perdonatäñajatakix askïkti” sasaw mä jaqix Diosan kamachinakap pʼakintasax säna. Jupax jiskʼatpachaw Bibliat yatiqatayna. Qhipat janis jan walinak lurxchïnxa, Diosax janipunis perdonkaspa ukhamwa amuyasïna. Ukampis Manasesan sarnaqäwipat liytʼasaw chuymachtʼäwi jikxatäna. Uka sarnaqäwixa, 2 Crónicas 33:1-17 qillqatan jikxatasi. Jumatï nayra juchanakamat ukham llakita jikxatasirakstaxa, uka sarnaqäwit yatxatañamax wali askïspawa.

Jehová Diosax “tunka phisqan marampwa jakañ churäma” sasin Ezequiasar säna ukhat kimsa maraw pasxäna, ukhaw Manasesax yuritayna, Ezequiasax Judá marka apnaqiri mä suma reyïnwa (2 Reyes 20:1-11). Chiqas, Diosan khuyapayasiñapatwa Manasesax yuriwayi ukat Diosan regalopawa sasaw Ezequiasax amuyäna. Ukatwa wawaparux jiskʼatpach Jehová Diosan kamachinakap yatichpachäna. Ukampis wawanakax janiw awk taykanakapjamapuni sarnaqapkiti. Ukhamwa Manasesampix pasäna.

Kunapachatï Manasesax 12 maranïkan ukhaw Ezequiasax jiwxäna. Ukhat uksaruxa Manasesan “luräwinakapaxa jan walïnwa [Jehová] Tatitun nayraqatapan[xa]” (1 ukat 2 jiskʼa tʼaqanaka). ¿Diosan kamachinakapar jan yäqiri yanapirinakapan amuyunakapampit apayaspachäna? Ukxa Bibliax janiw qhanañchkiti. Ukampis jupax jaqi jiwayiri ukat kʼari diosanakar yupaychirïtap sum yattanxa. Uka kʼari diosanakatakiw altaranak lurayäna ukanwa wawanakaparux sacrificiot luqtäna, layqasiñanak luräna ukat axtaskañ idolonak apantasaw Jerusalenan Jehová Diosan templopa qʼañuchäna. Diosax juparux iwxtʼkchïnsa janipuniw istʼkänti (3-10 jiskʼa tʼaqanaka).

Jehová Diosax babilonionakampiw cadenamp ñachʼantata Babilonia jaya markar apayäna. Uka markankxasaxa, kunanaksa jakäwipan luräna ukanakwa amtaspachäna. Ukat diosanakapax jupar jarkʼaqañapataki jan kun lurapxatapatxa, inamay diosanakätapwa amuypachäna. Ukat inas kuntï awkipax yatichkäna ukanak amtarakchïna. Taqi ukanakaw kunjamäkäntix jupax uk mayjtʼayäna. Manasés reyix “Diosaparuwa artʼasïna”, “Diosap nayraqatanxa walipuniwa jiskʼaru tuktʼäna” ukat “Diosat oracionan mayisïna” sasaw Bibliax qhanañchi (12 ukat 13 jiskʼa tʼaqanaka). Biblian nayra qillqatarjamaxa, “artʼasïna” siski uka aruxa, “chuymaparuw purtʼäna” sañ muni. Ukampis ¿Diosax ukham jachʼa juchachasir jaqirux perdonpachänti?

Taqi chuyma arrepentisitapatxa, Jehová Diosax achiktʼasitap istʼänwa, ukat “Jerusalenaruwa kuttʼayanxäna, reinopata wastat apnaqxañapataki” (13 jiskʼa tʼaqa). Ukat Manasesax chiqpacha arrepentisitap uñachtʼayañatakixa, markpachatwa idolonaksa altaranaksa qʼal chhaqtayäna, ukat markpacharurakiw Jehová Diosar yupaychapxañapataki chʼamañchäna (15-17 jiskʼa tʼaqanaka).

Diosax janipuniw perdonkitaspati sas amuysta ukhaxa, Manasesan sarnaqäwipatwa amtasiñama. Jehová Diosaw uka sarnaqäwxa jiwasar chʼuymachtʼañataki ukat Jupax “juch pampachi[rïtap]” yatichañatak Bibliar qillqayatayna (Salmo 86:5; Romanos 15:4). Jupax juchanakassa uñjkchixa, kunjam chuymanïtansa ukaw jukʼampi wakiskirixa. Ukhamasti, jumatï taqi chuyma arrepentisïta, Diosar perdón mayisïta ukat jan walinaka jan lurañatak chʼamachasïta ukhaxa, kunjamtï Manasesax Jehová Diosan chuymapar purtʼäna ukhamarakiw chuymapar purtʼasma (Isaías 1:18; 55:6, 7).