Kunsa liytʼirinakax yatiñ munapxi

¿Kunatsa Supayax mä katari tuqi Evar parlpachäna?

▪ Kunjamtï 8 janan yatiqaniwayktanxa, Supayaw Edén jardinan katari tuqi parlatayna sasax qhanwa Bibliax qhanañchi. Ukampis ¿kunatsa katari tuqi Evar parlpachäna?

Supayax sallqjañatakixa, kunayman “kʼari arunak[wa]” apnaqi sasaw Bibliax qhanañchistu, kunatï Edenan paskäna ukaw qhana uñachtʼäwixa (Efesios 6:11). Ukax janiw mä siw säwikïkänti, jan ukasti chiqänwa, ukat kunjamanakatsa Supayax Jehová Diosat jithiqtayañ munistu uk qhan amuysnaxa. Kunatsa ukham lurpacha uk jukʼamp yatxataskakiñäni.

Khitirus sallqjaspäna uk Supayax sum amuyäna. Diosan taqi luratanakapatxa Evaw qhip qhipa luratänxa, ukatwa jupar sallqjañatak amtäna. Mä kataris parlkaspa ukhamwa amuyayäna, katariw taqi animalat chʼikhïnxa. Ukhamatwa Supayax khitinsa jupaxa ukat kuna amtanïnsa uk imtʼäna (Génesis 3:1). Ukat jukʼampinakwa luräna.

Qalltañatakixa, Supayax Evaruw musphayäna, kunattix katarix jan parlirïtapxa sumwa Evax yatïna. Ak amtapuniñäni, chachapaw taqi animalanakat sum yatxatäna ukat sutinaks usküna, ukhamasti jupax sumwa uka katarirux uñtʼpachänxa (Génesis 2:19). Uka katarir uñchʼukisax kuntï jan llamktʼañapäkäna ukwa uñchʼukxäna. Maysa tuqitsti, inas katarix uka quqa taypinkchïna. Ukhamaspäna ukhaxa, katarix uka quqan achupwa manqʼantpacha ukatwa ukham parlaski sasin inas Evax amuychïna, ukat inas akham sarakchïna: “Uka achuttï katarirux parlaychixa, ¿nayax manqʼantirista ukhax kamachitaspasa?” sasa. Evax ukham amuychïna janisa, janiw yatktanti, ukat katarix uka achut manqʼantchïna janisa uk janirakiw yatktanti. Ukampis akaw chiqaxa: uka quqan achup manqʼäta ukhax “Diosjamä[yätawa]” sasin säna ukhaxa, jan pächasisaw Evax iyaw sasin manqʼantäna.

Ukhamarusa, Supayax wali sumwa arunakap ajllïna. Diosas wali sumanakata ukat libreñatsa jarkʼkaspa ukham amuyaykäna ukhaxa, Evax Jehová Diosatwa pächasxäna. Amtap phuqasiñapatakixa, taqi kun churir Luriripar istʼañat sipansa Evax jupan munañapwa lurañapäna, uk sum Supayax yatïna (Génesis 3:4, 5). Kunjamtï amtkäna ukhampunwa phuqasïna. Evax Jehová Diosar taqi chuym jan munasitapxa qhanwa uñjasiwayi, ukat Adanatx ukhamwa sasirakispa. ¿Jichhürunakanx jaqinakar Diosat jithiqtayañatakix ukhamarakixay Supayax luraskixa?

Ukampix ¿kunsa Supayax lurañ munäna? ¿Kunänsa chiqpach amtanakapaxa? Edenanxa khitinsa jupaxa ukat kunänsa amtapaxa ukwa imtʼañ munäna, ukampis qhipatxa, Jesusar yantʼkäna ukhaxa, ‘nayar yupaychita’ sasin jan phinqʼaniw säna, kunattix imantasitapax inamayaspänwa (Mateo 4:9). Kuna yupaychäwtï Jehová Diosax katuqki uk Supayan envidiasitapax wali qhanawa, ukat chiqa yupaychäwi qʼañuchañatakis kuns lurakispawa. Diosar jan istʼxapxañapataki jaqinakar jithiqtayañax wali kusiskañapuniw jupatakixa.

Ukampisa, kunjamanakatsa Supayax sallqjistaspa uk Bibliax sum yatiyistu. Ukhamasti, niyakixay “kunja jachʼa sallqäkitix Supayax” uk yatstanxa, janiw Eva warmjam sipitanakapar jalantañasäkiti (2 Corintios 2:11).