Wawanakar yatichañataki

Wali munat tawaqünwa

MÄ SUMA tawaqut parltʼäma. Uka tawaqux Jefté chachan phuchhapawa. Bibliax janiw kuna sutinïnsa uk siskiti, ukat sistuwa kunas pasäna ukxa. Ukhamasti, Jefté chachampita phuchhapampit yatxatañäni. Ukat Jehová Diosansa, amiganakapansa qhawqha munatänsa uka tawaquxa uk uñjarakiñäni.

Ukhamax liytʼsnaw Jefté ukat phuchhapan sarnaqäwipatxa Jueces 11 jaljana. Ukanxa, qhanwa uñachtʼayistu qhawqsa Jehová Diosas amigonakapas jupar munasipxäna.

Khä maranakanxa, israelitanakax jan walinakan uñjasipxäna, ukat janirakiw reyinïpkänsa ni apnaqirinïpkänsa, ukatwa mä irpir munapxäna. Uñisiri amonitanakaw jupanakar qʼal aynachtʼayañ munapxäna. Jefté chachax jan axsariri, wali chʼikhi jaqïnwa, ukat nuwasiñsa sum yatirakïna. Ukatwa israelitanakax juparu yanaptʼapxita sasin achiktʼasipxäna.

Jefté chachasti Diosaruw yanaptʼita sasin achiktʼasïna. Ukatxa, amonitanakar atipañ yanaptʼitäta ukhaxa, khititï utajat nayraqat katuqir mistunkani ukaruw churäma sasaw Diosar säna. Uka jaqisti, Diosar yupaychañ utaruw sarxañapäna. ¿Jefté chachax nuwasïwin atipjpachänti? Jïsa, atipjänwa. Ukampis ¿khitis jupar katuqirix utapat nayraqat mistpachäna uk yattati? *...

 Phuchapaw nayraqat mistunïna. Ukat Jefté chachax uk uñjasinxa wal llakthapisïna. Uka sapa wawanikïnwa ukat wali munatarakïnwa. Ukatxa, Jehová Diosarux churämaw siskäna ukxa phuqañapapunïnwa. Ukatsti, uk phuqapuniñamaw sasaw phuchapax tatapar sarakitayna (Jueces 11:36). Ukatxa, pä phaxsiruw qullunakar sarañ munta sasaw tatapar mayirakïna. ¿Kunatsa? Wali llakitaw jikxatasïna. Jupax yatïnwa, Diosan utapar sarasaxa, janiw jaqichasiñapäkänsa ni wawanïñapäkänsa. Jupax familianïñsa munarakpachänwa. Ukampis Jehová Diosar ukat tatapar istʼañaw jupatakix wali askïna. ¿Uk uñjasinxa janit Jehová Diosas tatapas wali kusisit jikxatasipxpachäna?...

Ukhamasti, amiganakamampi saramsaya sasaw Jefté chachax pä phaxsitaki khitäna. Ukat kuttʼanxäna ukhaxa, Diosan utaparuw khitxäna, kunjamtï Jehová Diosar siskäna ukhama. Siló ukhankänwa Diosan utapaxa. Ukatxa, sapa mararakiw israelit tawaq masinakapax Jefté chachan phuchapar chuymachtʼañatäkix sarapxirïna. Uka tawaqitax ukanwa qhiparäna.

¿Awkiparu istʼasïri ukat Jehová Diosar munasiri mä masimar jumax uñtʼtati?...Wali askipunïspaw jumatï ukham amigonïsma ukhaxa. Ukatakixa, jumaxa Jefté chachan phuchhapjamañamawa, Jehová Diosar wali munasiri ukat tatamarus istʼasiri ukham wawäñamawa. Ukhamatwa jumax tatamarus mamamarus wal kusisiyäta, ukat Jehová Diosas wali munasirakïtamxa.

Bibliat liytʼäñataki

Deuteronomio 6:4-6

Jueces 11:30-40

1 Corintios 7:37, 38

[Qhanañchäwi]