Rusia markana ¿khitinakas arxatasipxi?

RUSIA MARKACHIRINAKATAKI: Aka yatichäwixa, 188 arunakar jaqukipatawa. Ukat kunjamsa Rusia markanx leyinak pʼakintasax mä religionat yaqha religionar sarañat jarkʼatäsipki ukwa aka yatichäwix yatiyaskani, 230 markanakan jakasir jaqinakaru. Yatiyañataki sat revistax 40.000.000 jilaw sapa phaxsi lurasi ukat Uraqpachanxa uka revistaw yaqha qillqatanakat sipansa jukʼamp lakiratäski ukat walja arunakarus jaqukipasiraki. Kunjamsa Jehová Diosan Qhanañchirinakapax Rusia markan uñjasipxi ukx inas yaqhip autoridadanakax uraqpachan jan yatisiñap munapkchiti. Ukampisa kunjamtï Jesusax siskänxa, “janiw kuna jamasankiris jan qhanstirix utjkiti, ni kuna imantatas jan yatisirix utjkarakiti” (LUCAS 12:2).

DICIEMBRE 2009 marat enero 2010 marakamaxa, Rusia markan utjki uka tribunalanakatxa pä jachʼa tribunalaw Jehová Diosan Qhanañchirinakaparux jan wali religionat uñjapxäna. Unión Soviética markax Rusia mark apnaqkäna ukhaxa, jupanakarux marka uñisirinakatwa kʼarintapxäna, jichhax ukarjamakiw wasitat kuttʼaski. Jaya markanakar apata, carcelar jistʼantata ukham uñjasipxäna, ukat munkir jan munkirwa chʼama trabajonakan irnaqayapxäna. Ukat uka markax jan apnaqxäna ukhaxa, machaq gobiernowa wasitat askirjam uñtʼayxäna. * Jichhax mayampiw kʼarinakamp jan walit uñjayañatak amtapxi.

Marka apnaqirinakaxa 2009 mara qalltkäna ukhaw Jehová Diosan Qhanañchirinakaparux yupaychañ tuqit jarktʼañ qalltapxäna. Febrero phaxsinakwa, kuna tuqittï juchañchasipkäna uk qhanstayañatakix 500 jila kutiw markpachan yatxatapxäna. Ukat qhipa phaxsinakanxa, walja policianakaw mayak misttasin katuntañatak utanakarusa ukat tantachasipkäna uka utanakarusa sarapxäna, ukat Bibliat apstʼat qillqatanaksa ukat yaqha yänakapsa apasipxarakïnwa. Ukat Diosan Qhanañchirinakapar arxatañatak yaqha markat jutapxäna uka abogadonakarus yaqha markaruw aptʼayapxäna, ukat Rusia markar kuttʼanipxañapatakis jarkʼatäpxänwa.

San Petersburgo marka jakʼanxa, 2009 maran octubre phaxsit 5 uru saraqatarux Alemania markan lurat Bibliat apstʼat qillqatanakwa aduanax apaqäna, ukanakxa Rusia markankir  walja tamanakatakiw apataskäna. Yänaka contrabandot apanipki ukanak jarkʼir policianakaw kunatï uka cargamento utjkäna uk uñjapxäna. ¿Kunatsa? Kunattix mä documentorjamax uka cargamentonxa, “yupaychäwinak pitthapir qillqatanakaw utji” sasaw säna.

Federación Rusa ukat República de Altái uka markanakan Jachʼa Tribunalapax Jehová Diosan Qhanañchirinakapan Bibliat apstʼat qillqatanakapax jilamp jilamp taqi kuns parli sasin sapxäna ukhaw jukʼamp arknaqat uñjasipxäna. Diosan Qhanañchirinakapax leyinakarjamaw documentonak apayapxäna, ukat yaqha markankirinakax ukax walïskataps amuyapkchïnxa uka markan Tribunalapax janiw istʼañ munapkänti. Jichhakamas Rusia markanxa, Bibliat apstʼat qillqatanak apantayañasa ukat lakirañasa jarkʼatäskakiwa.

Diosan Qhanañchirinakapax ukham jan walit uñtʼayatäpxatapata ukat jarkʼata uñjasipxatapatxa ¿kuns kamachapxäna? Kuntï Tribunalanakax sapxi ukarjamaxa, ¿Rusia markachirinakax mä religionat yaqha religionar sarapxaspati?

Ukham jan walin uñjasisax jankʼakiw sartasipxäna

Jehová Diosan 160.000 Qhanañchirinakapaw 2010 maran febrero 26, viernes urunx 12.000.000 tratadonak ruso arut lakirawayapxi. Uka tratadon pʼiqiñchäwipax akawa: ¿Wasitampix pasarakispati? Rusia markachirinakatak mä jisktʼa. Siberia markan Usolje-Sibirskoje sat chiqanxa, wali thayäkchïnsa (-40 °C), niya 400 yatiyirinakawa 5.30 alwa horasan 20.000 tratadonak lakirañatak callenakan tantachasipxäna. Jupanakat mä qhawqhanix iyawsäwip laykuw khä 1951 maranx Siberia markar apat uñjasipxatayna.

Kimsa urunwa tratadonak lakirapxañapäna, uk yatiyañatakixa, Jehová Diosan Qhanañchirinakapax Muscú markanwa, conferencia de prensa waktʼayapxäna. Instituto de Derechos Humanos ukan irnaqir Lev Levinson wali uñtʼat chachaw ukan arstʼañapatak invittʼatäna. Diosan Qhanañchirinakapax kunjamsa Alemania nazi ukat Unión Soviética markan ina chʼusat tʼaqhisiyata ukat arknaqata uñjasipxäna uka tuqinakatwa mä qhawqha qhanañchtʼäna, ukat qhipatxa jupanakax janiw ukham jarkʼat uñjasxapxänti sasaw qhanañchtʼarakïna. Ukatsti akham sarakïnwa: “Yeltsin sat presidenten mä kamachi apsutaparjamaxa, kawknïr yupaychäwinakatï arknaqata ukat jarkʼata uñjasipxäna ukanakax wasitatwa askirjam uñtʼayatäxapxäna. Ukat taqi kuntï aptʼasiwayapkäna ukanaksa kuttʼayxapxarakïnwa. Chiqasa, Unión Soviética markax Rusia mark apnaqkäna ukhaxa, Diosan Qhanañchirinakapax janiw utanïpkänti ni uraqinïpkänsa, ukampisa wasitatwa askit uñtʼayatäxapxäna”.

 Jichhaxa, wasitatwa jan walit uñtʼayatäsipki. Levinson sat chachax akham saskakiwa: “Kawkir markatï pantjasitapat amtasïna uka pachpa markaw jichhax wasitat ina chʼusat aka jaqinakar arknaqaski” sasa.

Tratado lakirasitapatxa ¿kamsapxis yaqhipaxa?

Kuna amtampitï uka tratadox lakirasiwayki ukax ¿phuqasiwayiti? Lev Levinson chachax akham siwa: “Conferencia de prensa ukar metrot sarkasinxa, walja jaqinakaruwa kawkir tratadotï Jehová Diosan Qhanañchirinakapax Rusia markan lakirasipkäna uk liytʼaskir uñjta. [...] Jaqinakaxa liytʼañatakix quntʼasipxiwa ukat wali amuyumpiw liytʼapxaraki” sasa. * ¿Ukat kamsapxis uka tratado liytʼirinakaxa?

Rusia markan islamismo religionankirinakax walj utjki ukawjan jakasir chuymankipstat mä mamaxa, tratado katuqasinxa kuna tuqits parli sasaw jisktʼäna. Jaqinakan derechonakapata ukat kunanakatsa Rusia markan jarkʼasiski uka tuqinakat parli sasin qhanañchasïna ukhaxa, akham sänwa: “¡Ukham lurasiñapax horasäxänwa! Aka tuqinakatxa, Unión Soviética markamp apnaqatäna uka tiemporuw kuttʼaskäna. ¡Walik ukham lurapxtaxa, wal yuspärapxsma!” sasa.

Cheliabinsk markan mä warmir tratado churapxäna ukhaxa, akham sasaw jupax satayna: “Nayax katuqxtwa. Ukat liytʼxaraktwa, wali askiw nätakixa. Jumanakax wali mayachtʼataw iyawsäwinakam arxatapxtaxa, janipuniw yaqha religionankirinakax ukham lurapkiti. Isisipxatamatsa ukat wali amuyumpi kuns lurapxatamatxa, wali askirjampunwa uñjapxsma. Kuntï lurapkta ukax chiqapunïskatapax qhan amuyasi, Diosax jumanakampipunïskpachawa” sasa.

San Petersburgo markanxa, tratado iqtʼatäskir mä jaqirux uka qillqatax walikïskiti jumatakixa sasaw jisktʼasïna. Jupax  akham sänwa: “Jïsa, liytʼkasaxa cuerpojas chhijtituwa, ukat jachaqtʼast kunawa. [Unión Soviética markax apnaqkäna] uka tiemponwa awichajax tʼaqhisiyat uñjasitayna, ukat khitinakampitï preso katuntatäkäna ukanakatwa parlirïtu. Walja lunthatanakaw carcelan jistʼantatäpxäna ukat ina chʼusat iyawsäwip layku jistʼantatanakas utjarakïnwa. Kunatï paskäna ukx taqiniw yatipxañapa, ukhamax kuntï lurasipkta ukax nätakix walikipunïskiwa” sasa.

¿Kunas Rusia markan paspachäni?

Uka markankir Jehová Diosan Qhanañchirinakapaxa, janïr uk paskipan 20 maranak nayraxa, jan jarkʼatäsinxa wali askirjamaw uñjasiwayapxi; ukampisa, jarkʼat uñjasiñax akatjam purinirïtapxa yatipxiwa. ¿Jichhürunakan jupanak contra kʼarinak parlapxatapatxa, kunjamtï nayrax tʼaqhisipkäna ukhamanti wasitat uñjasipxarakpachäni? Tiempompiw ukax yatisini.

Kunas kunäpan Jehová Diosan Qhanañchirinakapaxa, Biblian yatichäwinakapxa jaqinakan mä suytʼäwinïpxañapataki ukat sumankañ jikxatapxañapatakix yatiyasipkakiniwa. Uka amtapxa, lakirasiwayki uka tratadonwa akham sasin qhanañchasi: “Jarkʼatäñaxa janipuniw wiñayatakïkaniti. Jehová Diosatsa ukat Bibliatsa respetompi ukat amuyump yatiyasipkakiwa (1 Pedro 3:15). Alemania nazi jupanakan tʼaqhisiyatasa ukat markasan jarkʼat uñjasisasa janiw amuktʼapkti. Janirakiw jichhasa amuktʼapkäti (Hechos 4:18-20)”.

[Qhanañchäwinaka]

[28 janan qhanañchäwipa]

Vladimir Litvin, 81 marani, jupaxa 14 maranïkäna ukhaw Krasnoyarsk sat markar apat uñjasïna. Viernes uruxa, kunapachatï tratado lakirasiñ qalltasïna ukhaxa, jupaw Jehová Diosan Qhanañchirinakapar mä grupo pʼiqtʼäna

[29 janan qhanañchäwipa]

Nikolay Yasinski, 73 marani, wali kusisitapuniw tratado lakiräna. Jupax akham sasaw jisktʼäna: “¿Chiqapuniti wasitat arknaqapxistani ukat Jehová Diosar yupaychañ jarkʼapxistani?” sasa

[29 janan qhanañchäwipa]

Stepan Levitsky, 85 marani, Yelena warmipampi. Jupaxa Yatiyañataki sat mä revistanïtap laykukiw tunka maranak carcelan jistʼantatäna

[27 janan recuadropa]

 Certificados de Rehabilitación

Unión Soviética markax Rusia mark apnaqkäna uka tiempon Jehová Diosan Qhanañchirinakapax carcelankasipkakïna ukanakarux 1990 maranwa antutxapxäna. Ukat askit uñtʼayatäxapxatapat waljaniw kusisipxäna, kunattix mä documento katuqapxäna ukanxa, “markan uñisirinakapa” sasin qillqatäñat sipansa ina chʼusat tʼaqhisiyatanaka sasaw qillqantatäna. Uka documentoxa Certificados de Rehabilitación sas uñtʼatawa.

[27 janan recuadropa/fotopa]

¿Aka qillqatanakanx chiqapunit jilamp jilamp parlpacha?

Federación Rusa ukan Jachʼa Tribunalapaxa Jehová Diosan qhanañchirinakapan Bibliat apstʼat qillqatanakapatxa, akanakwa jan walit uñjapxi:

▪ Bibliat apstʼata sarnaqäwinaka * (alayana)

▪ Acerquémonos a Jehová

▪ La vida... ¿cómo se presentó aquí? ¿Por evolución, o por creación?

▪ El hombre en busca de Dios *

▪ Kunsa wayn tawaqunakax yatiñ munapxi (mayïr libro) *

▪ ¿Kunsa Bibliax chiqpachapuni yatichi? *

Uka qillqatanakax Diosaru ukat Bibliar respetañwa yanaptʼi. Ukat uka qillqatanak liytʼapki ukanakarux kunatï walïki ukat jan walïki ukanakwa amuytʼañ yanaptʼi, ukat jaqinakan uñstayat yatichäwinakat amuytʼasiñsa yanaptʼarakiwa. ¿Uka qillqatanakat jarkʼatäñax walikiw sasmati?

[Qhanañchäwinaka]

[28 janan recuadropa/fotopa]

Mä wakiskir yatiyäwi

¿Wasitampix pasarakispati? Rusia markachirinakatak mä jisktʼa sat tratadonxa, Jehová Diosan Qhanañchirinakapax janiw jan wali religionäpkiti sasaw qhanañchtʼaski. Unión Soviética markax Rusia mark apnaqkäna ukhaxa, kunjamsa arknaqañ qalltapxäna, niya ukhamarakiw jichhürunakanxa arknaqañ munapxi uka tuqitwa mä jukʼa qhanañchtʼaski. Uka tiemponakanxa Jehová Diosan Qhanañchirinakapax jukʼanikïpkchïnsa, khitinakarutï wal tʼaqhisiyapkäna uka taypinkapxarakïnwa. Uka tratadonxa Internetar www.jw-russia.org chiqar mantañatakiw liytʼirinakar invittʼasiraki, ukanwa uka tuqit jukʼamp qhanañchtʼasi ukat Jehová Diosan Qhanañchirinakapan luräwinakapatsa ruso arut jikxatasiraki. Ukat uka tratadonxa, kuntï Dimitri Medvédev presidentex tʼaqhisiyatapkäna ukanakan urupan arstʼkäna ukas qillqaqtʼatarakiwa, uka arstʼäwipaxa internetan mä video grabat utjki ukat qillqaqtʼatawa. *

[Qhanañchäwi]

[29 janan recuadropa]

 Tʼaqhisiyatäpkäna ukanakat amtañataki uru

Akat walja maranak nayraxa, Unión Sobiética markax Rusia marka apnaqäna ukhax tʼaqhisiyata uñjasipxäna ukanakat amtasïna uka uruxa, akham sasaw Dimitri Medvédev sat presidentex säna:

“Politiconakampi tʼaqhisiyatapkäna ukanakatxa jichhüruw jupanakan urupax amtasi.[...] Kunjamsa markax tʼaqhisiyatapxäna ukax janipuniw akchʼas walïkänti. [...] Kunayman kasta jaqinakaruw jiwarayasiwayi ukat ayllunakpachwa chhaqtayasiwayi. [...] Taqi kasta religionankirinakaruw arknaqasiwayi. [...] Millón millón jaqinakaw jan juicio lurasa ni kuna qillqat jaytawayasin jiwarayatäpxäna, yaqha markanakar apata ukat campos de concentración ukar apata jaqinakatwa [jichhürux amtasktanxa], jupanakax yaqha kasta jañchinïpxatapata ukat yaqha kasta luräwinïpxatap laykuw derechonakapat jarkʼat uñjasipxäna. [...] Familianakpachaw ‘jan wali lurañatak wiytirinakjama’ ukat ‘markan uñisirinakapjam’ uñtʼatäpxäna. Kunjamsa millón millón jaqinakar ina chʼusat tʼaqhisiyata ukat kʼarintatäpxatapat jiwapxäna uk ¿amuysnati? Taqi derechonakapatwa jarkʼatapxäna, janiw sums imtʼayatäpkänti. Walja maranakaw jupanakat jan yatiskänti. [...]

”Janipuniw ukham lurapxatapatxa kuna razonas utjkiti.”