Biblian yatichäwinakapa

¿Familianakajj kunjamsa kusisitäpjjaspa?

Aka yatichäwejja, kawkïr jisktʼanaktï jumajj jisktʼasirïta ukwa pachpa Bibliamampi yatjjatañ yanaptʼätam. Jumatï munstajja, Jehová Diosan Qhanañchirinakapampiw aka jisktʼanakat yatjjatasma.

1. ¿Kunatsa mä parejajj kusisit familianïñatakejj casarasiñapa?

Kusisit Jehová Diosaw matrimonio uttʼayi. Mä parejan kusisit jakasipjjañapatakejj casarasipjjañapajj wali wakiskiripuniwa, ukhamatwa wawanakarus sum uywapjjaspa. Ukat chacha warmejj jan jaljtasa sarnaqapjjaspa ukat leyinakarjam qellqayasipjjaspa ukwa Diosajj muni (Lucas 2:1-5). Chacha warmejj purapat respetasipjjaspa ukwa munaraki (Hebreos 13:4). Kunapachatï maynejj wachoq juchar purtʼasi ukhakiw cristianonakajj divorciasipjjaspa jan ukajj jaltapjjaspa. (Mateo 19:3-6, 9 liytʼäta.)

2. ¿Kunjamsa chacha warmejj uñjasipjjañapa?

Matrimonion yanaptʼasipjjañapatakiw Jehová Diosajj chacha warm lurawayi (Génesis 2:18). Familianjj chachaw pʼeqtʼirejja, ukhamasti jupaw kunatï familian jakasiñatakejj wakiski uk churañapa ukat Diosats yatichañaparaki. Ukat warmipar munasitap laykojja, jakäwipsa aptʼasirjamäñapawa. Panpachaniw munasipjjañapa ukat respetasipjjañapa. Ukat niyakejjay pantjasir jaqëpjjchejja, kusisit jakasiñatakejj perdonasirïpjjañaparakiwa. (Efesios 4:31, 32; 5:22-25, 33, ukat 1 Pedro 3:7 liytʼäta.)

3. ¿Jan waltʼayasiñajj utjani ukhajj jaljtapjjañapati?

Mä matrimoniontï jan waltʼayasiñajj utjani ukhajja, panpachaniw munasiñamp uñjasiñatak chʼamachasipjjañapa (1 Corintios 13:4, 5). Jan waltʼäw askichañatakejj jaljtapjjañapaw sasajj janiw Bibliajj siskiti. Ukampisa, sinti jan waltʼäwinak utj-jjaspa ukhajj inas mä cristianojj jaljtañ amtchispa. (1 Corintios 7:10-13 liytʼäta.)

  4. ¿Kunsa Diosajj wawanakatak muni?

Jehová Diosajja, jupanakan kusisit jakasipjjaspa ukwa muni. Ukatwa kunjamsa wayn tawaqökasin kusisit jakasipjjaspa uk yatichi. Ukat yatiñanïñsa, experiencianïñsa awk taykapat yateqasipjjaspa ukwa munaraki (Colosenses 3:20). Ukat taqe kuntï wawanakajj Jupar yupaychañatak lurapjje uksa wali askitwa uñjaraki. (Eclesiastés 11:9–12:1 ukat Mateo 19:13-15; 21:15, 16 liytʼäta.)

5. ¿Kunjamsa awk taykajj wawanakapan kusisit jakasiñapatak yanaptʼapjjaspa?

Awk taykajj wawanakapar manqʼa, isi ukat kawkhansa jakasipjjaspa uk churañatakejj wal chʼamachasipjjañapa (1 Timoteo 5:8). Janiw ukakïñapäkiti. Diosar munasiñsa ukat yateqasiñsa yatichapjjañaparakiwa (Efesios 6:4). Awk taykajj Diosar munasiñ uñachtʼayapjje ukhajja, wawanakapajj yateqasipjjarakiwa. Ukat Biblian kamachinakaparjam uywatäpki ukhajja, sum sarnaqapjjañapatakiw yateqapjjaraki. (Deuteronomio 6:4-7 ukat Proverbios 22:6 liytʼäta.)

Wawanakajj suma luratanakapat chʼamañchtʼayasiña ukat walik ukham lurtajj sayasiñ wal munapjje. Ukat awisajj ewjjtʼañasa cheqachañas wakisirakiwa, ukhamatwa jan walinakar jan puripjjañapataki jarkʼaqatäpjjani (Proverbios 22:15). Cheqañchasajj janipuniw jiljapjjañapäkiti. (Colosenses 3:21 liytʼäta.)

Jehová Diosan Qhanañchirinakapajja, awk taykanakaru ukat wawanakar yanaptʼañatakejj walja yanaptʼanakwa apsuwayapjje, uka qellqatanakajj Bibliat apstʼatkamakiwa. (Salmo 19:7, 11 liytʼäta.)

Jukʼamp yatjjatañatakejja, ¿Kunsa Bibliax chiqpachapuni yatichi? aka libron 14 jaljap uñjjattʼäta, ukajj Jehová Diosan Qhanañchirinakapan luratawa.