Diosar jakʼachasipjjam

¿“Kunäkitejj Diosar uñtʼañajja” uk jikjjatsnati?

JEHOVÁ DIOSAJJ taqenin jikjjatkay wali valorani mä tesoro uchi, ukat taqe chuymaw jiwasan jikjjatañasjja munaraki. Aka tesorosti janiw qamiriptaykistaniti, ukampisa sumankaña ukat sum jakasiñwa yanaptʼistu, ukajj janipuniw oraqpachan utjki uka qorimpis alksnati. ¿Kunas uka tesorojja? Wali yatiñani Salomón reyiw Proverbios 2:1-6 qellqatan qhanañchi.

Uka tesorojja, “kunäkitejj Diosar uñtʼañajja” ukaw sasaw Salomón reyejj qhanañchi, mä arunjja, kunatï Diosat cheqäki ukat kunjamtï Bibliajj amtanakapat qhanañchki ukawa (5 jiskʼa tʼaqa). Uka tesorojj walja askinakaniwa.

Cheqa yatichäwinaka. Bibliajja akham jisktʼanakaruw qhanañchi: ¿Kunas Diosan sutipajja? (Salmo 83:18.) ¿Jiwatanakarojj kunas kamachi? (Salmo 146:3, 4.) ¿Kunatsa akanktanjja? (Génesis 1:26-28; Salmo 115:16.) Qhan parlkasinjja, ¿qhawqha valoranïpachas uka jisktʼanakan qhanañchäwipajja?

Wakiskir ewjjtʼanaka. Bibliaw sum jakasiñ yatichistu. ¿Kunjamsa matrimonion kusisit jakassna? (Efesios 5:28, 29, 33.) ¿Wawanakar sum uywañatakejj kuns lursna? (Deuteronomio 6:5-7; Efesios 6:4.) ¿Kunjamsa kusisit jakassna? (Mateo 5:3; Lucas 11:28.) Wasitampi, ¿qhawqha valoranïpachas uka wakiskir jisktʼanakan qhanañchäwipajja?

Kunjamas Diosajj uk sum qhanañchi. Bibliakiw Diosat cheq yatichistaspa. Ukanwa kunjamasa Jupajja (Juan 1:18; 4:24), jiwasat llakisitapsa (1 Pedro 5:6, 7), ukat kunjam Diosäkitejj Jupajj ukanak yatichistu (Éxodo 34:6, 7; 1 Juan 4:8). ¿Diosat taqe uka cheqa yatichäwinak yatiñajj wali valoranejjaya?

Cheqpachansa, “kunäkitejj Diosar uñtʼañajja” ukajj wali valorani tesoropuniwa. Ukampis ¿kunjamsa uk jikjjatsna? Proverbios 2:4 qellqatanjja Salomón reyejj akham sasaw amuytʼayistu, “jila alani imat yänakarjama” thaqham sasa. Jila alani imantat yänak jikjjatañatak jan chʼamachasksna ukhajj janiw jikjjatksnati. Kunäkitejj Diosar uñtʼañajj ukajj ukham imantatarakiwa, ukampis Biblian imantatawa. Ukhamasti jikjjatañatakejj chʼamachasiñasarakiwa.

Uk jikjjatañatakejj kunas wakisi uk Salomón reyiw amuytʼayistu. “Jumatejj arunakajja katoqetäta” ukat “chʼikhi chuymanïñsa jikjjatañ munarakïta” sasinjja, istʼasir chuymanïñaw wakisi sasaw qhanañchistu (1 ukat 2 jiskʼa tʼaqanaka). Ukhamarusa taqe chuymampi thaqhañatwa parlaraki, mä arunjja, uka tesoro jikjjatañjja taqe chuyma munataswa uñachtʼayañasa (3 ukat 4 jiskʼa tʼaqanaka). Ukhamasti, “kunäkitejj Diosar uñtʼañajja” uk jikjjatañ munstanjja, taqe chuyma ukat jan jaytasaw Bibliat yatjjatañasa (Lucas 8:15).

Uktï lurañänejja, Jehová Diosaw jikjjatañ yanaptʼaskistani. “[Jehová] Tatituwa yatiña churirejja” sasaw Proverbios 2:6 qellqatan qhanañchtʼistu. Jïsa, Jupan yanaptʼapampikiw Biblian cheqa yatichäwinakap sum amuysnajja (Juan 6:44; Hechos 16:14). Jumatï “kunäkitejj Diosar uñtʼañajja” uk Biblian thaqhäta ukhajja, jikjjatätawa, ukat janipun pächasimti: ukaw jakäwiman wali askirjam yanaptʼätam (Proverbios 2:10-21). *

[Qhanañchäwi]