¿Kunatsa jan waltʼäwinakajj wal utjpacha?

KUNA yatiyäwinakansa, Oraqen jan waltʼäwinakapat jila partejj yatiyasi. Ukham jan walina jan ukajj yaqha jan waltʼäwinakana jaqenakajj janipuniw tʼaqhesipjjerïkiti. Bélgica markankiri Centro de Investigación sobre la Epidemiología de los Desastres satäkis uka yatiyäwirjamajja, 2010 maranakwa 373 ukha jan waltʼäwinakajj utjatayna, ukat 296.000 jila jaqenakaw jiwarapjjarakitayna.

Aka qhepa maranakan jukʼampiw jan waltʼäwinakajj jiljjattawayi. Sañäni, 1975-1999 marakamajja, 300 jan waltʼäwinakatjja minusakïnwa, ukampis 2000-2010 marakamajja, niya 400 ukhaw utjawayi. Inas jumajj mayninakjam akham jisktʼasirïsta: “¿Kunatsa jichha tiempon jan waltʼäwinakajj wal utji?” sasa.

Jan waltʼäwinakajj “Diosan munañapawa” sasins jaqenakajj sapkchejja, ukajj janiw cheqäkiti. Jichhürun walja jaqenakaw jan waltʼäwinakan jikjjatasipjje, ukampis Diosajj janipuniw ukanak utjaykaspati. Ukhamarus jichha tiempon kunanakatï pasañapäki ukjja, Bibliaw sum qhanañchi. Mateo 24:7, 8 qellqatanjja, Jesusajj akham sänwa: “Manqʼat pistʼa[ñaw] utjani [...], oraq khatatinakas walja cheqanakana. Taqe akanakasti jachʼa tʼaqhesiñan qalltapakïskiwa” sasa. ¿Kunatsa Jesusajj ukanak yatiyäna, ukat ukajj kunsa sañ muni?

“¿Kawkïrïnis chimpojja [...] akapach tukuskan uka uru[takejja]?”, siski uka jisktʼaruw Diosan Yoqapajj qhanañchaskäna (Mateo 24:3). Kunanakatï pasañapäki ukanakat parlasajja, Jesusajj akham sasaw yatiyarakïna: “Akanak pasir uñjapkäta ukkhajja, yatipjjam Diosan reinopajj jakʼankatapa” sasa (Lucas 21:31). Ukhamasti uka jan waltʼäwinakajj wali wakiskiriw jiwasatakejja. Ukanak pasir uñjasaw mayjtʼäwinakan utjatap amuytanjja.

¿Kunatsa Oraqen jan waltʼäwinakajj utji?

Inas mayninakjam jisktʼasirïsta: “Diosatejj jan waltʼäwinak jan utjaykchejja, ¿khitirak utjayisti?” sasa. Uka jisktʼan jaysäwip yatjjatañ munstanjja, kuntï Biblian uka toqet qhanañchki uk sum amuytʼañasawa, ukansti akham siwa: “Taqe aka oraqpa[chajj] Supayan munañapan[kiwa]” sasa (1 Juan 5:19). Uka qellqatarjamajja, taqe jan walinak aka pachan utjki ukanakat  Diosajj janipuniw juchanïkiti, jan ukasti, ñanqha “Satanás” enemigopaw juchani, Bibliansti “Supaya” sasaw suticharaki (Apocalipsis 12:9, 12).

Diosan enemigopatakejja, jupatakik taqe kun munirïtap laykojj jaqenakan jiwapjjatapajj janiw kunäkisa. Ukat Akapacha apnaqasajj kunjamäkitejj jupajj uka kikpäpjjañapatakiw jaqenakar amtayi. “Qhepa urunakanjja [...] Jaqenakajj michʼaw tukupjjani, qollqe chuymaraki, jachʼa jachʼaw tukupjjani, jilamp parlirinakaraki” sasinwa Bibliajj nayratpach qhanañchäna (2 Timoteo 3:1, 2). Kunjamtï Supayajj nayratpach jan walinak utjaykejja, ukhamarakiw jichhürun kunayman jan walinakamp phoqantaski. Juparakiw taqe kunatï aka Oraqen utjki ukanak qʼañuchasiñapatakisa ukat maynitakik taqe kun munañsa utjayi, ukhamatwa jaqenakar jan walin uñjasiyi.

Akapachankirinakajja, ¿kunjamsa jan waltʼäwinaka utjañapatakejj yanaptʼi? Naciones Unidas ukankirinakajja, oraqpachan jan waltʼäwinakajj utjki ukanakat akham sapjjewa: “Kawkhantï umampi apañjamäki uka cheqanpunwa jaqenakajj jakapjje. Ukat kawkhantï chʼumi alinakasa, joqhonakas utjki ukanakajj chhaqtaskiwa, ukatwa taqe kunatï jakañasatak aka Oraqen utjki ukanakajj aynachtʼaski. Janiw ukakïkiti, jaqenakajj jan wali jeqʼenakampiw aka Oraqe juntʼuptayapjje. Ukhamatwa samsktan uka samanas mayjtʼaspa ukat lamar qotan umapas jiljjattaspa”. “Jaqen luräwipajj” qollqe utjañapatakiw yanaptʼi sasa, ukampis kunjamtï oraqpachan uñjaskejja, taqe ukanakajj maynin askip thaqhañataki ukat maynitakik taqe kun munasaw ukham lurapjje.

Jaqenakan ukham jan walinak lurapjjatapajj jukʼamp jan waltʼäwinaka utjañapatakiw yanaptʼi, sasaw walja yatjjattʼat jaqenakajj sapjje. Cheqans akapachan jan waltʼäwinaka utjañapatak jaqenakajj yanaptʼapjje ukhajja, Supayaruw yanaptʼasipki.

Kunjamtï uñjaskejja, jaqenakajj yatkasinwa jan walinak lurapjje ukhamatwa jukʼamp jan waltʼäwinak utjayapjje. Ukhamarus mä jan waltʼäwejj kawkhantï utjkäna ukarjamaw jukʼamp jan walïspa. Walja cheqanakanjja, yaqhep jaqenakajj yatkasinwa jan wal lurapjje, ukat yaqhepasti, yaqha costumbrenïsasa, jan ukajj pisin jakasisas jan wali cheqar jakiriw sarapjje, ukhamatwa jan waltʼäwin uñjasisajj jukʼamp llakinkapjje. Ukat yaqhepanakajj janiw jaqenakan pantjasirïpjjatapatsa, jan ukajj yatkasin jan wal lurapjjatapatsa ukham jan waltʼäwin uñjasipkiti, jan ukasti, “horasajj jan waltʼañajj taqeniruw puri” (Eclesiastés 9:11).

Ukhamajj mä jan waltʼäwin jikjjatasisma ukhajja, ¿kunsa lurasma? Ukhaman jikjjatasisajj kunsa lursna uk amuytʼañatakejj mä qhawqhanak uñjañäni.

[5 janan fotopa]

Waljani mä cheqanak jakaña

[5 janan fotopa]

Qoqanak chhaqtayaña

[5 janan fotopa]

Oraqe qʼañuchaña

[5 janan fotonakax khitinakan apsutasa]

Chʼeqäjjankiri: © Mark Henley/Panos Pictures

Chikankiri: © Jeroen Oerlemans/Panos Pictures