Oraqen jan waltʼäwinak utjaspa ukhajja, ¿kuns lursna?

Oraqen sapa kutiw jukʼamp jan waltʼäwinaka ukat tʼunjäwinakas uñjasi. ¿Ukhamajj kuns lursna? Uk mä qhawqha uñjañäni.

Jan waltʼäwinakat jitheqtaña. Bibliajj akham siwa: “Chʼikhi jaqejj jan waltʼaña uñjasinjja jaltjjewa, ukampis jan amuytʼasir jaqejja mantaskakiwa, ukatsti [‘llakinakanwa jikjjatasi’, NM]” sasa (Proverbios 22:3). Uka suma ewjjtʼajja Oraqen jan waltʼäwinak paski ukhajj yanaptʼarakistaspawa. Amuyasipjjam volcanaw phallani, apasir uma ukat hurakananakaw utjani sistaspa ukhajja, khitinakatï uka cheqanakan jakasipki ukanakajj suma cheqar sarjjapjjañapaw wakisispa. Kunattejj utata ukat yänakat sipansa jakäwiw wali wakiskirejja.

Jan waltʼäwinakajj utjki uka cheqanakat sarjjañwa yaqhepajj amtapjjaspa. Mä autoridadajj akham siwa: “Oraqen jan waltʼäwinakajj utjirjamäki ukkhanakanwa jukʼamp jan waltʼäwinakajj utji. Yaqhep cheqanakanjja jukʼamp jan waltʼäwinakaw utji, uka cheqanakanwa jukʼamp jan waltʼäwinakajj jutïrinakan utjani” sasa. Ukanakat yaqhepajja aka cheqanakankaspawa: lamar qota lakanakana ukat volcananakajj utjki uka cheqanakana. Jumatï uka cheqanakan jan jakkasma jan ukajj yaqha cheqar sarjjasma ukhajja, janiw añcha jan waltʼäwinakar purtʼaskasmati.

Janïräkipan sum wakichtʼasiña. Sumsa wakichtʼaskchïtasa may akatjamat jan waltʼäwinakan jikjjatasiñajj utjakispawa. Ukampisa, ukham jan walin uñjasisajj kunsa luräta uk janïrakipan amtañaw yanaptʼiristamjja. Proverbios 22:3 qellqat liytʼaniwayktan ukajj yanaptʼarakiristamwa. ¿Kunanakas wakisini ukanak wakichtʼjjtati? Qollanakasa (botiquín), uman botellasa, waña manqʼanakasa ukat wakiskir documentonakasa qhanankañapawa sasaw 1-2-3 of Disaster Education (Medidas básicas contra los desastres) qellqatajj ewjjtʼi. Ukatjja kuna jan waltʼäwinakasa utjaspa ukat kunsa ukhajj lurasma ukanakat familjamaw amuykiptʼapjjasma.

Jehová Diosamp sum apasiskakiña. Diosamp sum apasiñaw taqe kunans yanaptʼistaspa. Bibliajj Diosat akham siwa: “Jupaw jiwasar khuyapayasir Awkisajja, ukhamarak chuymachirisasa. Taqe tʼaqhesiñanakasanwa Diosajj chuymachistu” sasa. Ukat “chʼama thayjtatanakaru chʼamañchir Diosa[wa]” sasaw yaqha cheqan saraki (2 Corintios 1:3, 4; 7:6).

Khitinakatï Jupar confiasipki jupanakajj kunjamsa jikjjatasipjje uk Diosajj sum uñjaski. Niyakejjay munasir Diosächejja, kunaymanitwa chʼamañchtʼistu (1 Juan 4:8). Wali wakiskir yaqha yanapajja oracionawa. Janiw milagro lurañap  maykañäniti, ukampis wali chʼaman qollan ajayup maysna, ukaw chuymachir suma arunak Bibliat amtayistaspa. Israel marka apnaqeri David reyjamaw Diosar servirinakapajj jikjjatasipjjaspa, Davitajj akham sänwa: “Ajjsarkay lajja chʼamak cheqawja sarkasasa, janiw kunarus ajjsarkati, nayamp chik saratam layku: lawamasa, thujrumasa, chʼam churitani” sasa (Salmo 23:4).

Jilat kullakanakasar yanaptʼaña. Nayrïr patak maranakanjja, Ágabo sat mä profetajj akham sänwa: “Mä jachʼa machʼaw taqe oraqer jutani” sasa. “Ukasti Claudio sat jachʼa jilïrin urunakapanwa phoqhasïna”, ukajj Judea markan jakir jilat kullakanakaruw wal aynachtʼayäna. Ukhamanakan jikjjatasipjjatap yatisinjja, ¿kunsa yaqha cheqankir jilat kullakanakajj lurapjjäna? Bibliajj akham siwa: “Tatitur arkiri[nakajj] [...] amtapjjäna mä yanap apayañatak Judeankir jilatanakaru, kunjämatejj sapa mayni jupanakan utjkän ukhamarjama” sasa (Hechos 11:28, 29). Kunjamtï uñjktanjja, munasiñatwa yanaptʼapjjäna.

Jichhürunakan jan waltʼäwinakajj utjki ukhajja, ukhamarakiw Jehová Diosan yupaychirinakapajj yanaptʼasipjje. Ukham maynit maynikam yanaptʼasipjjerïtapat jupanakarojj uñtʼasi. Febrero 27, 2010 maran jachʼa Oraq khathatejj Chile markan utjawayki ukhajja, jankʼakiw yanaptʼir sarapjjäna. Karlan utapwa lamar qotat llumstanisin umajj apatayna, jupajj akham siwa: “Qhepärmantpacha yaqha cheqankir jilat kullakanakajj yanaptʼañatak purinipjjatap uñjasajj wal kusisiyäta. Jehová Diosaw taqe chuyma uka yanaptʼirinak taypejj chʼamañchtʼapjjetäna. Munata ukat jarkʼaqtʼataw jikjjatasiyäta” sasa. Achachilapajj janiw Jehová Diosan Qhanañchiripäkiti, ukampis ukanak uñjasajj akham sänwa: “¡Walja maranakas iglesiajar sarkstjja, janipuniw ukhamanak uñjirïkti!” sasa. Ukanak uñjasaw Bibliat yateqañatak Jehová Diosan Qhanañchiripar mayïna.

Jan waltʼäwinakan jikjjatastan ukhajja, Diosar munasirinak taypinkañajj wal yanaptʼistu. Ukhamäkchisa, ¿kunapachas Oraqen jan waltʼäwinakapajj jan utjjpachäni? Bibliajj uka toqet kamsisa uk uñjañäni.

[6 janan fotopa]

¿Kunanakas jan waltʼäwin wakisini ukanak wakichtʼjjtati?

[7 janan fotopa]

Oracionaw taqe kunans yanaptʼi. Milagronak mayiñat sipansa wali chʼaman qollan ajayup maysna

[7 janan fotopa]

Jehová Diosan Qhanañchirinakapajj jan waltʼäwinak utjki ukhajj maynit maynikamaw yanaptʼasipjje

[7 janan fotopa]

“Munata ukat jarkʼaqtʼataw jikjjatasiyäta”