¿Yatiyätati?

¿Kunatsa Jerusalén templon qollqe trokirinakajj utjäna?

▪ Janïr jiwayatäñatak uru purinkipanjja, kuna jan walinaktï templon lurapkäna ukwa Jesusajj qʼomachäna. Kunatï paskäna ukjj akham sasaw Bibliajj qhanañchi: “Jesusasti [...] taqe ukan aljasirinakaru ukhamarak alasirinakaruw anqaru alissüna. Qollqe trokirinakan mesanakapsa liwinukünwa, uka kikparakiw luräna paloma aljirinakan sillanakapsa. Ukatsti sarakïnwa: ‘Qellqatanjja siwa: “Utajjasti Diosat mayisiñ utäniwa” sasa, ukampis jumanakajj lunthatanakan putupwa waktʼayasipjjatätajja’” sasa (Mateo 21:12, 13).

Nayrïr pataka maranakanjja, judionakasa ukat judior tukuri cristianonakasa waljaniw jaya markanakat Jerusalén templor sarapjjerïna. Ukhamata marat impuesto pagañataki, kawkïr animalanaktï jiwayasin mä ofrendjam loqtapjjañapäkäna uk alañataki ukat kuna qollqtï jupanakajj apasipjjäna ukjj templon apnaqasïna uka qollqer trokañataki. Ukwa qollqe trokirinakajj mä qhawq cobrasa trokapjjerïna. Ukatwa jupanakajj judionakan fiestanakap jakʼachasinkäna ukhajj Atrio de los Gentiles uka cheqan puestonakap uttʼayasipjjäna.

“Jumanakajj lunthatanakan putupwa [templo] waktʼayasipjjatätajja” sasaw qollqe trokirinakarojj Jesusajj juchañchäna. Uk sasajja, uka trokirinakajj jilamp jilampi cobrapjjatapwa uñachtʼayi.

Biblia qellqaskäna uka tiemponjja, ¿kunatsa olivojj wali askit uñjatänjja?

▪ Kuna bendicionanaktï Diosajj markapar churañapäkäna uka taypinjja uvanakas olivonakas utjarakïnwa (Deuteronomio 6:10, 11). Jichhürunakanjja, kawkhantï olivo qoqajj utjki uka cheqanakanjj wali askit uñjataskakiwa. Uka qoqanakajj janis suma uñjatäñ wakiskchejja, patak pataka maranak achoqasipkakispawa. Ukhamarusa qalarar oraqenakansa jilakiwa ukat machʼa maranakansa aliskakiwa. Ukat khuchhoqatas wasitat pachpa troncot altaskakiwa.

Bibliajj qellqaskäna uka tiemponjja, kunaymanitakiw olivojj apnaqasïna. Troncon sillpʼipasa ukat laphinakapasa calentura (fiebre) usu apaqañatakiw apnaqapjjerïna. Ukat ramanakapan vainilla qʼapkir jachanakapatjj perfume lurapjjäna. Ukampisa aceituna achoqatapata ukat aceitenïtapatwa olivo qoqajj wali askit uñjatänjja. Poqtʼat aceitunajj niya chikatajj aceitkamakiwa.

Mä suma qoqatjja, maranjj 57 litronakwa aceite apsusispa. Olivon aceitepajj lamparanak naktayañataki ukat cuerpotaki, ñikʼutatak cosmético lurañatakiw apnaqapjjerïna, chhojjrinaka ukat kharintatanak qollañatakis apnaqapjjarakïnwa (Éxodo 27:20; Levítico 2:1-7; 8:1-12; Rut 3:3; Lucas 10:33, 34).