Armagedonajj ¿kunas yaqhepanakatakejja?

“Reyinakarojj Armagedón satäkis uka cheqaruw tantachapjjäna. Uka sutisti hebreo sutiwa.” (APOCALIPSIS 16:16)

ARMAGEDÓN aru istʼasajj ¿kuns jumajj amuyta? aka Oraqew tukuspachäni sasin inas amuysta. Ukampis uka arojj mä kutikis Biblian uñstkchejja, televisionansa, radionsa, periodiconsa ukat iglesia pʼeqtʼirinakasa wal uka toqet parlapjjaraki.

¿Kuntï jaqenakajj Armagedonat amuyapki ukanakajj Biblian siski ukampejj pachpakïpachati? Uka toqet yatjjatañajj wali wakiskiriwa. ¿Kunatsa? Kuntï Bibliajj yatichki ukarjam yatjjatätajja, ina chʼusat llakisiñsa jan ukajj ajjsarañatsa jarkʼaqasïtawa. Ukat jutïr urunaksa kusisitaw suyäta ukat Diosatsa sum amuyarakïta.

Armagedonatjja aka kimsa amuyunakaw utji. Ukat Bibliajj kamsis uka toqenakat uk amuytʼma.

  1. ARMAGEDONJJA JAQEKIW UÑSTAYI.

Uka toqet yatjjatirinakasa ukat yaqhep periodistanakasa, Armagedón arjja jachʼa chʼajjwawinakataki ukat jan waltʼäwinakatakiw apnaqapjje. Sañäni, aka oraqen pä Jachʼa Chajjwäwi utjkän ukhajja, uka arwa apnaqawayapjje. Estados Unidos ukat Unión Soviética markanakajj jachʼa bombanakampiw (bombas atómicas) purapat nuwasipjjaspa sasaw jaqenakajj wal ajjsarapjjäna. Televisionansa, radionsa, periodiconsa “Armagedón nuclearaw” utjani sasaw sapjjarakïna. Jichhürunakan yaqhep yatjjatatanakajja akham sapjjarakiwa, samanasa, umasa wali qañuchatäjjewa. Ukanakaw qʼal oraqerojj aynachtʼayjjani ukhamatwa “Armagedón climaticojj” utjani sasa.

¿Kamsañs muni uka amuyunakajja? Aka Oraqesa ukat kunanakatï utjki ukanakasa jaqenakan amparapankiwa. Marka ampnaqerinakatï Oraq jan aynachtʼañapatak jan kuns lurapkani ukhajja, Oraqejj aynachtʼakipuniniwa.

¿Kamsis Bibliajja? Diosajj janiw aka Oraqjja jaqenakamp tukjaykaniti. Jan ukasti Bibliajj akham siwa: ‘Jehová * Diosajj janiw aka Oraqjja chʼusañapataki lurkiti jan ukasti, jaqenïñapatakiw luri’ sasa (Isaías 45:18). Khitinakatï aka Oraq tukjasipki ukanakatjja Bibliajj akham siwa: “Aka Oraqe tʼunjirinakarusa, Jumajj tʼunjarakïtawa” sasa (Apocalipsis 11:18).

2. ARMAGEDONAJJ ORAQEN JAN WALTʼÄWINAKAPAWA.

Yaqhep markanajja, aka Oraqen jan waltʼäwinakapat parlañatakejja, Armagedón arwa periodistanakajj apnaqapjje. Haití markan oraq khathatejj 2010 maran utjkän ukhajja, walja jaqenakaw jiwarapjje, tʼaqhesipjje ukajj markarojj walpun aynachtʼäwayi sasin qhanañchtʼañatakejj “Haití markanjj ‘Armagedonaw’ utji” sasaw periodistanakajj yatiyapjjäna. Ukat yaqhep película wakichirinakasa, periodistanakasa Armagedón arjja, kunanakatï pasawayki ukatakisa ukat jutirin kunanakas pasani ukar uñtayañatakis apnaqapjjarakiwa. Amuytʼañataki, Oraqerojj mä jachʼa qalaw (asteroide) chocantasin phallayani sasin parlapki ukatakejja, Armagedón arwa apnaqapjjaraki.

¿Kamsañs muni uka amuyunakajja? Armagedonajj mä akatjamatwa purinini, ukat juchan jan juchan jaqeruw jiwarayani. Janiw khitis qhespkaniti.

¿Kamsis Bibliajja? Armagedonajj janiw taqe jaqenakar jiwaykaniti. Jan ukasti, jan wali lurir jaqenakarukiw jiwarayani. Bibliajj akham siwa: “Ñanqha lurir jaqenakajj chhaqtjjaniwa” sasa (Salmo 37:10).

3. ARMAGEDONANWA DIOSAJJ AKA ORAQ TʼUNJANI.

Iglesiar saririnakatjja waljaniw akham amuyapjje: “Walimpi jan walimpiw nuwasipjjani, ukhamatwa aka Oraqesajj chhaqtayatäjjani” sasa. Ukat Estados Unidos markan Princeton Survey Research Associates sat institucionanjj jaqenakar uka toqet jisktʼäna ukhajja, sapa patakat 40 jaqenakaw aka pachajj “Armagedón chhʼajjwäwinwa tukusjjani” sasajj sapjjatayna.

¿Kamsañs muni uka amuyunakajja? Jaqenakajj janiw aka Oraqen wiñay jakapjjañatak  luratäpktanti, ukat aka Oraqes janirakiw wiñay utjañapatak luratäkiti. Mä jukʼa tiempo jakasin ukat jiwjjañasatakikiw Diosajj luristu.

¿Kamsis Bibliajja? Bibliajj akham siwa: ‘Oraqerusti sumwa uttʼayaraktajja, ukatsti uka cheqat janipun onjjtañapataki’ sasa (Salmo 104:5). Aka Oraqen jakapki ukanakarojj Bibliajj akham sarakiwa: “Aski jaqenakajj Oraq katoqapjjani, wiñayatakiw ukan jakapjjarakini” sasa (Salmo 37:29).

Kuntï Bibliajj Armagedonat yatichki ukat jaqenakajj kuntï amuyapki ukampejj janiw pachpäkiti. Ukhamajj ¿kawkïris cheqäpacha?

[Qhanañchäwi]