Jupjam iyawsäwinïpjjañäni

Chikhi amuyumpi jan ajjsartʼasa ukat jan askipak thaqasaw sarnaqäna

ESTER warmejj reyin tronoparuw wali ajjsartʼayasis jakʼachasiski. Akatjamatwa Susa marka palacio manqhanjj chʼujtawayi, janiw kunas istʼasjjeti. Esterajja sartatapa ukat kʼachattʼat isipan onjjtatapakwa istʼjje. Ukat jupajja janiw uka manqhan jachʼa suma lurat machonanaksa, jaya markat apanit cedro maderat lurat tumbadorus uñchʼukkiti. Jan ukasti tronon qontʼatäki uka chachar uñtasaw kʼachitat jakʼachasiski, kunattejj jiwañapas jakañapasa reyin amparapankiwa.

Ukampisa reyejj Esterar uñjasinjja, qori thujrupwa aytäna. Ukhamatwa qhespiyäna, mä arunjja perdonanwa, kunatejj janiw khitis reyin jan jawsatajj mantañapakänti. Esterajj jakʼachasisinjja uka qori thujru puntap llamktʼasaw yusparatap uñachtʼayäna (Ester 5:1, 2). *

Asuerojj wali munañäni, qamiri ukat chʼamani reyinwa. Uka tiemponjja, Persia marka apnaqer reyinakajj wali jila alani isinakampiw isisipjjerïna, ukajja millón millón dolaranakajjaspawa sasaw uka toqet yatjjatatanakajj sapjje. Ukampis Esterajj kunjams chachapajj jupar munasiñamp uñtani uks amuyanwa. Reyejj akham jisktʼäna: “¿Kunas kamachtam reina Ester? ¿Kunsa munta? ¡Apnaqkta uka oraqtï chikatpacha mayitäta uksa nayajj churaskakïmawa!” sasa (Ester 5:3).

Esterajj iyawsiritapsa ukat jan ajjsariritapsa qhan uñachtʼayäna: Jan ajjsartʼasaw markapar arjjatañ laykojj reyin ukar mantäna. Ukhakamajj taqe kunas walikïskänwa, ukampis jichhajj jukʼamp chʼama luräwin uñjasiñapaskiwa. Kunattejj Asuero reyir Amán ewjjtʼirimajj jan wali kʼari jaqewa ukat markajaruw tukjañ muni, sasaw yatiyañapäna. Esterajj ¿kunjams amuytʼayani ukat kuns iyawsäwipat yateqsna?

‘Parlañ horasjja’ amuytʼasaw ajllïna

¿Esterajj taqe jan walttʼäwinakti rey nayraqatan yatiyañapa? Ukhamäspa ukhajja, reyirus jiskʼachkaspa ukhamaspawa, ukat Amanas ukchʼañkamajj janiw ukajj ukhamäkiti sisjjasspawa. Ukhamajj ¿Esterajj kuns lurani? Pasïr nayra maranakanjja Salomón reyejj akham sanwa: “Aka oraqenjja taqe kunas horasanikiwa, [...] Amuktʼañ horasa, parlañ horasa” sasa (Eclesiastés 3:1, 7). Ukampis Mardoqueo uywasir awkipaw Esterarojj jiskʼakäna ukjajj uka toqenakat yatichpachäna. Ukhamasti kuna ratos “parlañ horasa[jj]” uk Esterajj sum amuyäna.

Ukatsti Esterajj akham sasaw säna: “Juma jachʼa reyitaki walikïchi ukajja, achiktʼassmawa jichhüru jutañamataki kawkïr manqʼawtejj  nayajj wakichkta jumaru jachʼañchañataki ukaru, jumampi chiksti irpanirakim Amán chacharu” sasa (Ester 5:4). Ukat reyejj walikiw “nayamp chikaw jutani” sasaw säna ukat Amán chacharuw jawsayanïna. Amuytati kunja chʼikhinsa Esterajja. Esposoparojj wali respetompiw uñji ukat kunjamatsa llakinakap yatiyaspa ukwa amuytʼaraki.

Ukat mä suma manqʼäwi wakichäna, ukhamat kunatï chachapar gustkäna ukanak wakichtʼäna. Ukat suma vinos utjarakïnwa (Salmo 104:15). Asuero reyitakejj taqe ukanakajj wali sumapunïnwa, ukatwa ¿kunas llakimajja? sasin reyejj wasitamp jisktʼäna. ¿Jichhajj llakinakap yatiypachäniti?

Janiwa. Ester tawaqojj wasitampiw qhepurutaki mä suma manqʼäwi wakicharaki (Ester 5:7, 8). ¿Kunatsa jan jankʼak yatiyki? Amtañäni, Amán chachajj Esteran markapar tukjañatakiw mä ley apsuyäna. Uka lupʼisaw Esterajj kunjamats yatiyirista sasin amuytʼasiski. Ukatwa mayampi mä suma manqʼäw wakichi, ukhamat esposoparojj qhawqsa munasi uk uñachtʼayañataki.

Paciencianïñajj wali wakiskiriwa, ukampis jukʼanikiw paciencianïpjje. Esterajj llakitäkchïnsa, parlañs wal munkchïnjja, kuna ratus parlañ wakisispa uk suyäna. Jupat yateqasiñasawa, cheqas kuna jan waltʼäwi utjipansa askichasiñapjja wal muntanjja. Ukat jilïrinakan mä jan waltʼäwi askichañap munstan ukhajja, Ester warmit yateqasisaw pacienciamp suytʼsna. Proverbios 25:15 tʼaqajj akham siwa: “Llampʼu chuymanïñajja coleratarojj sumaptayiwa; suma arunakasti colerat arsüwinakarojj pʼakintiwa” sasa. Ester warmit yateqasisa pacienciampi suytʼañäni ukhajja, chʼakhar uñtat jan waltʼäwinaksa ‘pʼakjañaniwa’. ¿Esterarojj paciencianitapat ukat chʼikhi amuyunitapat Jehová Diosajj bendispachati?

Pacienciapajj cheqap lurañatakiw yanaptʼi

Kunayman pasañapatakiw Esteran pacienciapajj yanaptʼäna. Amán chachajj reyimpi ukat esposapampi nayrïr manqʼäwir invittʼatapatjja ‘kusisitaw mistuwayjjäna’. Ukat castillo punku paskasajja, Amanajj Mardoqueor uñjasinjja colertʼasïnwa, kunatejj Mardoqueojj janiw jupar yupaychtʼas aruntkänti. Ukham luratapatjja ¿jan respeton jaqew sisnati? Janiwa, Jehová Diosampiw sum apasiñ munäna ukat concienciapsa janirakiw qʼañuchañ munkänti, ukatwa ukham luräna. Amán chachajj uk uñjasajj “wali colerasïna” (Ester 5:9).

 Ukat Amán chachajj jankʼakiw esposaparu, amigonakaparu “janiw uka Mardoqueojj aruntkituti mä pʼenqaw uñjasta” sasin yatiyäna. Jupanakasti mä jachʼa lawa lurayam 22 metro jilani (72 pies) ukat ukar warkkatañataki reyit mä orden apsunim sasaw sapjjäna. Uka amuytʼajja jupatakejj wali askipunïnwa, ukat ukaratpachaw jupajj saräna (Ester 5:12-14).

Ukampis uka arumajj “reyejj janiw ikthapkänti” sasaw Bibliajj qhanañchi, ukat kuna qellqatanakatï utjkäna uk taqen istʼkañ liytʼañapatakiw mayïna. Uka qellqatanjja, kunjamsa reyir jiwayañatak amtapjjatayna ukaw jikjjatasïna. Ukat jupa contra ­saytʼirinakarojj jiwayapjjäna uksa amtarakïnwa. Ukampis Mardoqueojj ukham luratapatjja, ¿kuns katoqpachäna? Reyejj akham sasaw jisktʼäna: “¿Kuna churäwsa, jan ukajj kuna jachʼañchäwsa Mardoqueojj aka luräwitjja katoqejja?” sasa. Ukat sirvirinakapasti “janiw kunsa katoqkiti” sasaw sapjjäna (Ester 6:1-3).

Ukaratpachaw Asuerojj sirvirinakapar jisktʼi ¿khitirus yanaptʼa mayirista aka pantjasiwi askichañataki? sasa. Ukat ukaraturakiw Amán chachajj anqankaskäna. Amuyatajja, Mardoqueor jiwayañataki orden apsuriw alwat purinpachäna. Ukat janïr orden maykän ukhaw Asuero reyejj ¿kuna lurañaspasa kawkïr chacharutejj reyejj jachʼanchañ munki ukarojja? sasaw Amán chacharojj jisktʼäna. Ukat Amán chachajj jupats parlkaspa ukham amuyasajja akham sänwa: ‘Apanipjjañapawa kawkïr suma istejj reyejj uchaski uka, ukatjja kawkïr chachatï mayninakat jilirïki ukaw caballjjata Susa mark muytañapawa ukat jachʼanchatarakïpan’ sasa. Ukat reyejj jumaw Mardoqueor taqe ukanak luräta sasaw Amán chacharojj säna, ¿kunjamakis Amanajj jikjjataspachäna, uk amuyasmati? (Ester 6:4-10.)

Amán chachajj munkas jan munkasaw wali colerat uk phoqhe. Ukat jankʼakiw utapar wali llaktʼata, ajanups imantasisa kuttʼawayjjäna. Utatjja warmipasa amigonakapas janjaw ukajj walikïti ukat Mardoqueo chachaw aynachtʼayätam sasaw sapjjäna (Ester 6:12, 13).

Esterajj wali pacienciampiw reyimp parlañatakejj mä urump suyäna, ukhamipanwa Amán chachas jan amuytʼasis jupa pachpa aynachtʼañar purïna. Amuyatajja, reyirojj Jehová Diosaw jan ikthapiykpachänti (Proverbios 21:1). Ukatwa ‘Jehová Diosar suytʼañasatak’ Bibliajj ewjjtʼistu (Miqueas 7:7). Jehová Diosan amparaparu llakinakas jayttan ukhajja, Jehová Diosajj jiwasat sipans jukʼam sum askichaspa.

Jan ajjsartʼasaw parläna

Esterajj janiw esposoparu jukʼampi suyañap munjjänti, ukatwa qhepa manqʼäwin yatiyañatak chʼamachasi, ukampis ¿kunjams yatiypachäni? Reyi pachpaw ‘kuns munta uk mayiskakita’ sasin säna (Ester 7:2). Jichhaw ‘parlañ horasajj’ purinïna.

Ukatsti ‘jumatejj jachʼa rey, munaschista, ukhamarak jumataki walikïchini ukajja, nayajj muntwa, jachʼa rey, mayiraksmawa, jakañaj-jja munakimaya ukhamarak markajan jakañapsa’ sasin reyir parlañatakejj Diosaruw chuymapan nayraqat maytʼaspachäna (Ester 7:3). Ukat kuntï siskäta ukar respetäwa sasaw sarakïna. Janiw Vasti sat reinjamajj esposoparu amanut jiskʼachkänti (Ester 1:10-12). Maysa toqetjja Amán chachar jan amuytʼasis confiyatapatjja janiw Esterajj esposopar jiskʼachkiti. Antisas jakäwip qhespiyañapatakiw reyir achiktʼasi.

 Ukham mayitapajja reyirojj chuymaparuw purtʼi, ukat muspharayarakiwa. ¿Khitis reinaru jiwayañ amtpachäna? Esterajj akham siwa: “Nayampi, markajjampisti aljantatapjjtwa taqe jiwarayasina tukjatañataki. Ukampis nanakatejj esclavoñatakiki aljatäpjjerista ukajja janiw kuns siskiristti, uñisirejj janiw sinti jan wali lurkaspänti juman jachʼa apnaqäwimanjja” sasa (Ester 7:4). Amuytati, Esterajj kuntï llakisiykäna ukanakjja qhan esposopar yatiyäna, ukjjarusti akham saskakïnwa markajarusa nayarusa esclavjam aljapjjetaspan ukhajja janiw kamskirismansa. Jan ukasti markajarusa nayarusa tukjañ munapjje, ukat jan yatiykirisma ukhajj janipuniw jumatakis akchʼas walikaspati.

Ukat maynin chuymapar kunjamats purtʼsna ukjja Ester warmitwa yateqassna. Ukat kunapachatï mä jan waltʼäwi munat familiasaru jan ukajj mä jilïr autoridadar yatiyañ muntan ukhajja, paciencianïña, respetonïña ukat qhana arump parltʼañaw yanaptʼistani (Proverbios 16:21, 23).

Esteran arunakap istʼasajj akham sasaw Asuerojj jisktʼäna: “¿Khitisa ukajja, kawkinkisa uka jan wali amtirejja?” sasa. Esterajj amparamp uñachtʼayasaw “¡uka jan wali uñisiristi aka uñisir Amán chachawa!” sasajj säna. Ukat mä ratojj amuktʼapjjänwa. Amán chachasti wal sustjasi. Ukatsti Asuero reyejj kunjamsa Amanajj kʼarimpi leyinak apsuyatayna ukhamat munat esposapar jiwayañataki taqe ukanak yatisinsti, wal colertʼasïna ukat ajanupas mayjtʼänwa. Ukat reyejj coler apartayasiñatakejj jankʼakiw anqar mistsuwayäna (Ester 7:5-7).

Ukham kʼaripa qhanstjjepansti, Amán chachajj “khuyaptʼayasita” sasaw Esterar killtʼasis mayisïna. Ukat reyejj kuttʼanjjasajja, reinan samartʼañatak utjkän ukawjan Amán chachar killtʼat uñjäna, ukatsti reyejj wal colertʼasïna, jumajj palaciojjanwa reinaru violañ munaskatätajja sasaw juparojj juchanchäna. Ukat Amán chachajj janiw kunjamast qhespiyasirjamajjänti. Ukatsti ajanup tapantasaw apjjapjjäna. Ukat reyin mä yanapiripaw Amán chachajj Mardoqueor warkkatañatakiw mä jachʼa lawa lurayi sasin Asuero reyir yatiyäna. Ukhamajj ukar Amán chachar warkkatanipjjam sasaw säna (Ester 7:8-10).

Akapachanjja janiw khitis cheqapar kuns lurapkiti sasin amuyañjamawa. ¿Jumajj inas ukham amuyarakirïsta? Esterajja pacienciampiw suyäna ukat janirakiw llakimp aynachtʼkänti. Parlañ horasa purinïna ukhajja jan ajjsartʼasaw kunatï cheqäki uk yatiyäna ukat Jehová Diosaruw suytʼäna. Jiwasajj ukhamarak lurapjjañäni. Jehová Diosajj pachpakïskiwa. Kunjamtï Amán chacharu lurkäna ukhamarakwa jan wali jaqenakarojj luräni (Salmo 7:11-16).

 Jan jupan askip thaqasaw Jehová Diosan markapar arjjatäna

Ukat Mardoqueojj janiw mä suma servirikïkänti jan ukasti reyin jakäwips qhespiyanwa, ukat Esteran mä uywir awkiparakïnwa taqe ukanakwa reyejj yatjjäna. Ukatwa mä jilïri yanapiripjam Mardoqueor uttʼayäna. Ukat Esterarojj kunanakatï Amán chachan utjkäna taqe uka yänakapwa churäna, jupasti Mardoqueoruw taqe ukanak apnaqañapataki uttʼayäna (Ester 8:1, 2).

Niyakejjay Mardoqueos Esteras qhespitäjjapchejja, ¿Ester reynanjj janit kuna llakisiñapas utjjpacha? Jupan askipak thaqherïspa ukhajja, ukhamaspawa. Ukampis kuna kamachtï Amán chachajj judionakar jiwayañatak apski ukajj taqe cheqaruw puri. Cheqansa Amán chachajj uka amtanakap phoqhañatakejj suertenak wartäna sasaw Bibliajj qhanañchi. Suertenak wartäna siski uka arojj Pur sasaw uñtʼasiraki (Ester 9:24-26). Uka uru puriniñapatakejj walja phajjsinakaw faltaski ukampis niyaw jakʼachasisinki. ¿Taqe uka jan waltʼäwinakat qhespipjjaniti?

Esterajj jupa pachpat jan llaktʼasisaw reyin ukar jan jawsatpach mayamp manti. Ukatsti jachtʼasisaw markap contra leyinak utjkän uk chhaqtayañapatak wal achiktʼasi. Ukampisa Persa reyinakan sutipjjaru ley apsutanakajja janiw chhaqtayasiñapakänti  phoqasiñapapuninwa (Daniel 6:12, 15). Ukatwa reyejj Esterampiru Mardoqueompirojj machaq leyinak apsupjjam sasajj säna. Ukhamatwa uka machaq leyirjam judionakajj jan jiwapjjañapatakejj saytʼasipjjañapäna. Ukat carta apirinakajj jankʼakiw markpacharu uka suma yatiyäwinak yatiyapjjäna. Uka yatiyäwinak katoqasajja, judionakajj wal kusisipjjäna (Ester 8:3-16). Persa markpachänwa nuwasiñatakejj wal wakichtʼasipjjpachäna, uka machaq leyitï jan utjkasapäna ukjajja, janiw kunjamats jarkʼaqasipkasapänti. Ukampis ¿“taqe chʼaman” Jehová Diosajj yanaptʼpachäniti? (1 Samuel 17:45.)

Ukat nuwasiñ uru purinjjän ukhajja, Jehová Diosan markapajj wakichtʼatajjanwa, ukat Persankir jilirinakajj judionakar yanaptʼañatakiw wakichtʼasipjjaraki, kunattejj taqe markpachaw Mardoqueojj Asueron mä jachʼa jilïr yanapiripätap yatjjapjjäna. Ukat Jehová Diosajj markapar atipjayiwa. Ukhamatwa taqpach uñisirinakapar jiwarayapjjäna (Ester 9:1-6). *

Ukat Mardoqueojj Amán chachan utapsa yanakapsa jan ajjsaras apnaqañapatakejja, Amán chachan tunka wawanakaparus jiwarayapjjarakïnwa (Ester 9:7-10). Ukhamatwa, Jehová Diosajj profecianakap phoqhäna. Taqe amalecitakaruw tukjäna, jupanakajj Diosan markap añisirinakapäpjjänwa (Deuteronomio 25:17-19). Amuyatajja Amán chachan wawanakapaw qhep qhepa amalecitanakapachäna. Uka markajj chhaqhañapänwa.

Ester tawaqorojj wali chʼama luräwinak phoqañapänwa, kamachinak apsuñapäna ukatakejj chajjwañanakaw utjañapäna. Ukanak phoqañajj wali chʼamäpachanwa. Ukampis Jehová Diosajj janiw markapan tukjatäñap munkänti, kunattejj Mesiasaw Israel markat mistuñapäna, ukat jupa toqerakiw taqe markanakajj bendicitañapäna (Génesis 22:18). Jichha tiemponjj Diosan sirvirinakapajja janiw cheqpach nuwasipjjañapajj wakiskiti sasaw Jesusajj aka oraqer jutkäna ukhajj säna (Mateo 26:52).

Ukampis cristianonakajj ajay toqen nuwasïwinktanwa, Supayajja janiw Jehová Diosar confiyasiñas munkiti, tukjañ munistu (2 Corintios 10:3, 4). Ester reinat yateqasisajj jupjamarakiw Diosar iyawsatas, wali amuyumpi, pacienciampi, jan ajjsartʼasa ukat jan jiwasan askis thaqhasa Diosan markapar arjjatañasa.

[Qhanañchäwinaka]

[30 janan recuadropa]

Ester toqet jisktʼanaka

Esterajj Diosar jan yupaychirimp casaraskän ukhajj ¿kunats Mardoqueojj jan kamskäna?

Mardoqueojj jupan askip thaqhasakiw Ester ­tawaqorojj reyimp casarasiñap munäna, ukhamat wali uñtʼatäñapataki sasaw yaqhep yatjjatatanakajj sapjje. Ukampis ukajj janiw cheqäkiti. Mardoqueojj Diosan arunakaparjam sarnaqerïnwa, uka kasta matrimoniojj janiw walïkiti saspänwa (Deuteronomio 7:3). Judionakan sarnaqäwiparjamajja, Mardoqueojj Esteran jan casarasiñapatakejj inamayakis jarkʼkaspa ukhamawa. Ukat Mardoqueomp Esterampejj janiw kuns lurapkaspänti, reyejj wali munañäni, diosarjam uñjayasiñ munir qhoru jaqënwa. Ukhamarusa jupanakajj yaqha markat jutirïpjjarakïnwa. Qhepatjja Jehová Diosajj Esteran casarasitap toqnamaw markapar qhespiyäna (Ester 4:14).

¿Kunatsa Jehová uka sutejj Ester libron jan uñstkpacha?

Diosan amuytʼayat Ester librjja Mardoqueow qellqpachäna. Jerusalenar janïr apatäkasajja inas persanakan documentonakapamp imaschïna. Ester librontï Diosan sutipajj uñstaspänjja, Persa markankir diosanakar taqe chuym yupaychirinakajj uka librjja chhaqtayapjjaspänwa. Ukampis Diosaw taqe ukanak uñjaskäna ukaw Ester qellqatanjj qhan amuyasi. Ester librojja hebreo arutwa qellqasïna. Ukanwa Diosan sutipajj imtʼat uñsti, ¿kunjams imantasïna? Pusi arunakan qallta letranakapata jan ukajj tukuya letranakapat apthapisin liytʼasajja, Diosan sutipaw uñsti: Jehová sasa. Ukham liytʼañasti acróstico sutimpi uñtʼatawa (Ester 1:20).

¿Nayra sarnaqäwinakat qellqat libronakampejj kikpakiti?

Yaqhep yatjjatatanakajj Ester librojj janiw jaqen nayra sarnaqäwiparjamajj cheq parlkiti sapjjewa. Yaqhepajj Ester libro qellqerejj kunjamsa persanakajj jakasipjjäna, uta lurasipjjäna ukat palacios kunjam luratänsa ukanakjja, sum yatpachäna sapjjarakiwa. Ukat ukham yaqha qellqatanakansa, janirakiw Esterat parlkiti, ukat janiw jupa saparukejj uka qellqatanakat apsupkiti, waljaninakaruw ukham apsupjje. Ukampis uka yaqha qellqatanakanjja, Mardukâ sutiw uñsti, uka sutejj Mardoqueo sañ muni. Jupajj Susa palacionwa mä jilïrjam irnaqäna, uka Mardoqueo sutirakiw Ester libronjj uñstaraki.

[31 janan recuadropa]

Mä profeciaw phoqhasiraki

Mardoqueompi Esterampejj Diosan markapar jan walit jarkʼaqasajja, mä profeciy phoqhasipkäna. Jayäkipanwa Diosan amuytʼayatajj Jacobojj aka arunak maynïr wawapjjaru phoqasiñapatak arsüna: ‘Benjaminasti mä qhoru qamaqer uñtatawa, alwatanakajj katuntatapar manqʼantani, jaypʼurusti jiltʼanaka lakinoqarakini’ sasa (Génesis 49:27). ‘Alwata’ sasinjja, Israelan reyjam apnaqañ qalltapkän ukanakatwa parlaski. Jupanakatjja jan ajjsartʼir nuwasirinakaw utjäna, maynïrejj Saulanwa ukat yaqhanakasti Benjaminat jutiripjjänwa, jupanakaw Diosan markaparojj jarkʼaqapjjäna. ‘Jaypʼurusti’ Esterampi Mardoqueompiw Jehová Diosan markaparojj jarkʼaqapjjäna, jupanakajj Benjamin tribut jutiripjjänwa. Uka maranakanjja, janiw khitis Israel tronon utjjänti, ukhamatwa Esterajj Mardoqueompi Diosan uñisirinakapar tukjapjjäna. Jupanakaw jiltʼanak lakjasipjjpachäna, kunatejj Amanan taqe yänakapwa katoqapjjäna.

[27 janan fotopa]

Esterajj altʼat chuymampiw reyirojj yuspäräna

[28, 29 jananakan fotopa]

Esterajj jan ajjsartʼasaw Amán chachat yatiyäna

[30, 31 jananakan fotopa]

Esteramp, Mardoqueompejj Persa markankir taqe judionakaruw leyinak apayapjjäna