¿Walikïskpachat layqanakar jisktʼasiñajja?

Barbarajja, * tawaqetatpachwa ina chʼusatak arunak istʼirïna, ukat jiwat familianakäjampiw parlta sirïnwa. Joaquín esposopampejj layqasiñ libronak liyipjjerïna, ukat tarot sat cartat uñañjja sum yatjjapjjäna. Uka toqew negocionakapan nayrar sartañs yatisjjapjjäna. Ukat cheqapuniw negocion nayrar sartasipkäna. Ukampis mä urojja, pä warminakaw punkum leqtʼanipjjani, ukat kunjamsa jarkʼaqasipjjaspa uksa tarot carta toqejj yatjjapjjärakïnwa.

NAYRA jaqenakakiw layqanakar jisktʼasipjje sasins waljanejj amuyapkchejja, jichhürunakanjja taqe cheqanwa layqanakar jisktʼasipjje. Jan walit jarkʼaqasiñatakejj amuleto, tablas ouija sat anatañanak anatapjje ukat kunas jutïrinakan pasani uk yatiñatakis layqanakar jisktʼasipjje ukhamawa. Alemania markanjja “Lucifer ukat computadoranakampi” sat mä pʼeqeñchäwiw Focus sat revistan utjäna, ukanstï akham sänwa: “Internetajj layqanakat jukʼamp yatjjatañ munapjjañapatakiw chʼamañchi” sasa.

¿Bibliajj layqasiñ toqet parlatap yatiyätati? Kuntï siski uk yatisajj inas muspharchïta.

¿Layqasiñ toqet kamsis Bibliajja?

Diosajj Israel markarojj akham sänwa: “Jan jumanakat kawkïris [...] yatiri jaqes tukupjjamti, janiraki jutkan uka urunakat yatjjatañanakarusa uchasipjjamti, janiraki layqanakasa tukupjjamti. Janiraki kʼarimpi lunthatirinakarus jisktʼasipjjamti, ni yatir layqa jaqerusa, janiraki chʼamakani ajayunakarus mayisipjjamti, ni jiwatanakan ajayunakaparus thaqapjjamti. Tatitu Diosamarusti, kawkïri jaqenakatejj ukham lurapki ukanakajj ajjtasiyapjjewa” sasa (Deuteronomio 18:10-12). ¿Kunatsa Diosajj taqe ukanakat ajjtasi?

Qalltanjja mä chacha warmit parltʼaniwayktanjja, walja jaqenakaw jiwatanakampi, ukat jiwatanakan ajayupampi kunatï jutïrin paskani ukanak yatsna sasajj amuyapjje. ¿Kunats ukham amuyapjjpacha? Walja religionanakajja, maynejj jiwjje ukhajja, ajayunakajj jakapki ukaruw sarjje sasaw yatichapjje. Ukampis Bibliajj janiw ukham yatichkiti, antisas akham siwa: “Jiwatanakajj janiw kunsa yatipkiti” sasa  (Eclesiastés 9:5). Ukat jiwañajj ikimp sasiwa sasaw Bibliajj saraki. Kunjamtï maynejj ikiski ukhajja, jupa jakʼan pasaski uk janiw akchʼas amuykiti (Mateo 9:18, 24; Juan 11:11-14). * Ukampis ¿kunatsa walja jaqenakajj jiwatanakampiw parlta sasajj sapjjpacha? ¿Khitis ukham amuyañapatakejj wiytpacha?

¿Ajayunakamp parlsnati?

Jesusajj aka oraqenkkäna ukhajja, ajayunakampejj parlänwa sasaw Mateo, Marcos, Lucas ukat Juan uka qellqatanakanjj qhanañchi. Ukat Marcos 1:23, 24 qellqatanjja ‘mä ñanqha ajayojj’ “nayajj uñtʼsmawa” sasaw Jesusar säna. ¿Ajayunakajj uñtʼapjjaraktamwa, uk yatiyätati? ¿Kunjamäpjjes jupanakajj uk yattati?

Janïr jaqenak lurkasajja, Diosajj waranq waranqa angelanakwa luratayna. Jupanakajj jaqenakat sipansa jilïrïpjjewa (Job 38:4-7; Hebreos 2:6, 7). Ukat angelanakajj wali chʼamani, chʼikhi ukhamapjjarakiwa. Jupanakajj Jehová Diosan munañap phoqhañatak luratäpjjewa. ­Salmo qellqerejj jupanakat akham siwa: “Tatitur jachʼañchapjjam: angelanakapa, arsutanakap phoqherinaka” sasa (Salmo 103:20).

Tiempompejja mä qhawqha angelanakajj Je­hová Diosar jan istʼasisaw aka Oraqer saraqanipjjäna sasaw Bibliajj qhanañchi. ¿Kunarus saraqanipjjpacha? Nayraqat saraqanir angelajj Adanampir Evampir Diosat jitheqtayañatakiw saraqanïna. Ukham lurasaw Supayaru jan ukajj Diabloru tukuwayi, uka sutinakajj Diosan uñisiripa ukat kʼarintiri sañ munaraki (Génesis 3:1-6).

Qhepatjja yaqha angelanakarakiw alajjpachankir ‘utjäwip jaytanukusin’ jaqer tukus aka oraqenkir suma uñnaqtʼan warminakamp jakañatak saraqanipjjäna (Judas 6; Génesis 6:1, 2). Uka jan istʼasir angelanakasa, wawanakapasa jaqenakaruw ajjsarayapjjäna. Ukatwa, aka oraqejj “ñanqha lurañampi kunayman casta jan wali lurañanakampi phoqhantatanwa”. Diosajj Uma Juiciompiw uka ñanqha lurir jaqenakarojj Noé urunakapan tukjäna. Inas uka Uma juiciot parlir istʼirïsta (Génesis 6:3, 4, 11-13).

Aka oraq umamp phoqantat uñjasajja, jaqer tukut angelanakajj ajay cuerpor tukusaw alajjpachar kutʼjjapjjäna. Ukampis Jehová Diosajj janiw jupanakar katoqjjänti, jan ukasti, mä phenqʼaruw tukuyäna mä arunjja, ‘chʼamaka manqharus jistʼantkaspa’ ukham sañ muni (2 Pedro 2:4, 5, MT). Uka jan istʼasir angelanakaruw ‘supaya’ jan ukajj sajjranaka sasin Bibliajj sutinchi (Santiago 2:19).

¿Kunsa sajjranakajj munapjje?

Sajjranakajj Jehová Diosat jitheqtayañatakiw jaqenakamp parlapjje, ukhamat cheqpach Diosar jan yupaychapjjañapataki. Kuntï sajjranakajj jutïr urunakat yatiyapki ukanakajj jaqenakar pantjasiyañatakikiwa. Janiw Diosar uñtʼapjjañapa ukat Diosamp sum apasipjjañap munapkiti.

Kunas sajjranakan yaqha amtapajj uk yatiñatakejja, jupanakan jilïripajj mä arunjja Supayajj kuns luräna uk amtañäni. Mä urojja, Jesusarojj “uñachtʼayarakïnwa taqe markanaka, kunja sumäkäntejj ukanaka, kunja jachʼäkarakïntejj ukanaksa”. ¿Kamsänsa? “Taqe akanak nayajj churäma, jumatejj killtʼasisin nayar yupaychitäta ukajja” sasa. Jichhurunakanjja Supayas sajjranakas yupaychayasiñwa munapjje. Jesusajj janiw jupanakar yupaychirïkänti, Jehová Diosarukiw yupaychirïna (Mateo 4:8-10).

 Jichhürunakanjja sajjranakajj jaqenakamp parlañatakejj janiw cheqpachapun uñstapkiti, jan yäqañjam cosasanak toqew jaqenakar sallqjapjje, sañäni: Coca laphinak toqe, cartas del tarot ukat horóscopo toqnämas sallqjapjjarakiwa. Ukanakampejj jan sallqjjayasimti. Taqe ukanakajja, jan uñtʼat chʼamanakaw utji sasin jaqenakajj sapki ukarojj apkiti. Ukanakajj kʼarikiwa. Cheqansa, sajjranakajj layqasiñ toqnämaw jaqenakar pantjasiyañ munapjje, ukhamat Jehová Diosar jan yupaychapjjañapataki. Ukat jan jikjjatapki ukhajja, layqasiñan sarnaqapki ukanakaruw aynachtʼayapjje, janiw antutañ munapkiti wal tʼaqhesiyapjje. Jumatï ukhaman jikjjatastajja, ¿jarkʼaqasiñatakejj kuns lurasma?

¿Kunjamatsa jitheqtasma?

Jan sallqjjayasimti. Jaqenakamp parlapki uka ñanqha ajayunakajj Diosan enemigopawa ukat niyaw tukjatäjjapjjani (Judas 6). Sajjranaqajja, jiwat jaqenakäpkaspas ukham tukupjje, kʼari ukat sallqanakapjjewa. Amuytʼañäni: Mä amigomajj jumar aynachtʼayañ munasak amigomjam tukuskatap yatisma ukhajja, ¿kunjamakis jikjjatasisma? Jan ukajj Internet toqe mä jaqer uñtʼasma ukat uka jaqejj jan wali qʼañu lurirïtap yatisma ukhajj ¿kamachasmasa? Sajjranakamp parlañajj jukʼamp jan waliwa. Jupanakat kunjamatsa jitheqtañamapuniwa. ¿Kunjamats jitheqtasma?

Layqasiñanak toqet kamsis Bibliajj uk yatjjatasajja, Efesonkir nayra cristianonakajj layqasiñ toqet parlir libronakapjja ‘taqenin uñjkataw ninar’ phichhantapjjäna, uka libronakajj ‘wali jila alanïnwa’ sasaw Bibliajj qhanañchi (Hechos 19:19, 20). Jichhürunakanjja, janiw libronakana, tabla ouija ukat amuletonak toqekejj layqasiñanakajj utjkiti, jan ukasti radionsa televisionansa ukat Intertetansa utjarakiwa. Ukhamajj taqe kunanakatï sajjranakamp parlañar apkiristam ukanakatjja jitheqtañamawa.

Amtañäni: Qalltanjja, Joaquín ukat Bárbara chacha warmitwa parlaniwaytanjja. Jupanakarojj “pä jan wali warminakaw jutapjjani ukat janiw jupanakar katoqapjjätati” sasaw tarot carta toqejj amuyapjjäna. Ukampis Connie ukat Gudrun Jehová Diosan Qhanañchirinakapajj “Jehová Diosan suma yatiyäwinakap apanisipkta” sasin punkup leqtʼapjjäna ukhajja, Joaquinompi, Barbarampejj istʼapjjänwa. Ukat parlkasinjja layqasiñ toqetwa parljjapjjäna. Bibliajj kamsis layqasiñ toqetjja ukwa jupanakajj uñachtʼayapjjäna. Ukhamatwa jupanakajj Bibliat yateqañ qalltjjapjjäna.

Uka chacha warmejj janiw sajjranakamp parlañ munjjapjjänti. Ñanqha ajayunakampi jan mayampi parljjañajja chʼamäniwa sasaw Jehová Diosan Qhanañchirinakapajj sapjjäna. Ukajj cheqäskapunïnwa, Joaquinompi Barbarampejj kunayman jan waltʼäwinakanwa uñjasipjjäna, sajjranakajj wal tʼaqhesiyapjjäna. Sapa arumaw ajjsarayasipjjerïna, ukat qhepatsti, yaqha utaruw jakasir sarjjapjjäna, ukanwa taqe ukanakat samarjjapjjäna. Jupanakarojj Filipenses 4:13 qellqataw yanaptʼäna, ukanjja akham siwa: ‘Jehová Diosan chʼamapampejj taqe kunaruw saykatirista’ sasa. Joaquinompir Barbarampirojj Jehová Diosaw yanaptʼäna, sajjranakajj tiempompejj jaytj-jjapjjänwa janiw tʼaqhesiyjjänti. Jichhajj kusisitaw Jehová Diosar yupaychasipki.

Jehová Diosan bendicionap katoqañ munapki ukanakarojja, akham sasaw Bibliajj ewjjtʼi: “Diosaruy jaysapjjam, Supayatakisti saytʼasipjjarakim, uka Supayasti jumanakatjja jaltawayjjarakiniwa. Diosar jakʼachasipjjam, Jupasti jumanakarojj jakʼachasirakiniwa” sasa (Santiago 4:7, 8). Jumatï yanaptʼayasiñ munstajja, Jehová Diosajj Supayat ukat sajjranakat jitheqtañatakejj yanaptʼätamwa. Ukat kuntï Salmo 121:2 qellqatan akham siwa: ‘Nayatakejj Jehová Diosatwa yanapajj juti’ sasa uka arunakajj cheqapuniw Joaquinompi Barbarampitakejj phoqasïna.

[Qhanañchäwinaka]

[21 janan qhanañchäwipa]

Layqasiñanakajja, Jehová Diosamp sum apasiñatwa jaqenakar jarkʼi

[22 janan qhanañchäwipa]

“Diosar jakʼachasipjjam, jupasti jumanakarojj jakʼachasirakiniwa.” (SANTIAGO 4:7, 8)