Jehová Diosan Qhanañchiripampiw parltʼaski ¿Jesusajj Diosäpachati?

JEHOVÁ DIOSAN QHANAÑCHIRINAKAPAJJ vecinonakapamp parlañjja wal munapjje. ¿Biblia toqet kuna jisktʼamas utjiti? Kuntï Jehová Diosan Qhanañchirinakapajj lurapki jan ukajj yatichapki uka toqet ¿kuna jisktʼamach utji? Ukhamächi ukhajja, jupanakar uñjkäta ukhaw jisktʼkasma. Jupanakajj taqe chuymaw qhanañchtʼapjjätam.

Kunjamsa Jehová Diosan Qhanañchirinakapajj parltʼapjje uk amuytʼañatakejja, uñjksnas ukham amuytʼañäni, Jehová Diosan Qhanañchiripajj Carmen satawa jupajj Susana sat mä mamaruw visittʼaski.

¿Cheqapunit Jehová Diosan Qhanañchirinakapajj Jesusat jan yatichäpki?

Susana: Jehová Diosan Qhanañchirinakapajj janiw Jesusat yatichapkiti sasaw pastoräjajj sapjjetu. ¿Ukajj cheqati?

Carmen: Cheqansa, nänakajj Jesusatjj yatichapjjtwa. Ukat jupar taqe chuym confiyasakiw qhespiyasna uksa yatipjjaraktwa.

Susana: Nayajj ukhamarak amuytjja.

Carmen: Ukhamajj panpachaniw ukham amuytanjja. Nayajj Carmen satätwa, ¿jumasti?

Susana: Susana satätwa.

Carmen: Ukhamajj waliki Susana. Inas jumajj akham amuyasksta, jumanakatï Jesusat yatichapjjstajja, ¿kunatarak jaqenakasti Jehová Diosan Qhanañchirinakapajj janiw Jesusat yatichapkiti sasin sapjjesti? sasa.

Susana: Jïsa, uk yatiñ munaskapuntwa.

Carmen: Cheqansa, nänakajj taqe chuymaw Jesusarojj confiyapjjta, ukampis kuntï jaqenakajj jupat sapki taqe ukanakarojj janiw creyipkti.

Susana: ¿Ukanakat qhanañchtʼitasmati?

Carmen: Walikiwa, yaqhepajja, Jesusajj aleq suma jaqekïnwa sasaw sapjje. Ukampis nänakatakejj janiw ukhamäkiti.

Susana: Nayatakis janirakiw ukhamäkiti.

Carmen: Ukansa pachparak amuytanjja. Ukat maysa toqetjja, kuntï Jesusajj Awkip toqet yatichkäna, ukar jaqenakajj mayjtʼayapjje ukarojja, janiw iyawsapkti.

Susana: ¿Ukampejj kamsañs munta?

Carmen: Walja religionanakajja, Jesusajj Diosawa sasaw yatichapjje. Inas jumar ukham yatichapjjarakstam.

Susana: Jïsa, Jesusampi, Diosampejj pachpakiwa sasaw pastoräjajj yatichapjjetu.

Carmen: Ukhamajj ¿kunatï Jesusat cheqäki uk yatjjatañatakejj kuntï Jesusajj jupa kikpat yatichkäna uk yatjjatañajj janit wakiskaspa?

Susana: Jïsa jupat yatjjatañajj askipunispawa.

¿Kuns Jesusajj yatichäna?

Carmen: Ukatakejj Biblian mä jiskʼa tʼaqap liytʼañäni, ukaw sum qhanañchistani. Amp suma aka Juan 6:38 uñjjattʼañäni ukanjja akham sasaw Jesusajj jupa pachpat säna: “Nayasti janiw alajjpachat munañajj lurasir jutkti, jan ukasti khitankitu ukan munañap luririw jutta” sasa. ¿Jesusatï  Diosasapäna ukhajja, aka qellqatajj janit mayjakasapänjja?

Susana: ¿Kamsañs ukampejj munta?

Carmen: Amuytati, Jesusajj janiw nayan munañajj luririw alajjpachat jutta siskänti.

Susana: Jïsa, khitankitu ukan munañap luririw jutta sarakisä.

Carmen: Amuytʼañäni, Jesusajj Diosaspa ukajja, ¿khitis alajjpachat khithanpachänjja? Ukat ¿kunatsa istʼañapäna ukat munañaps phoqhañaparakïnjja?

Susana: Kuntï sañ munkista uk amuytwa. Ukampis janiw uka mä jiskʼa tʼaq liytʼasakejj Jesusajj janipuniw Diosakiti sasajj sisksnati.

Carmen: Kuntï mä kutejj Jesusajj siskarakïna uk amuytʼañasaspawa. Niya ukar uñtasitwa sarakïna ukajj Juan 7 jaljanwa jikjjatasi. ¿Mirä amp suma 16 jiskʼa tʼaqa liytʼasmati?

Susana: Kun janisti. “Jesusasti ukjjarojj sänwa: ‘Yatichäwejjajj janiw nayankkiti, jan ukasti khitankitu ukankiwa’.”

Carmen: Yuspära. Uka jiskʼa tʼaqarjamajja, ¿Jesusajj amuyupakti yatichänjja?

Susana: Janiwa, yatichäwijajj khitankitu ukankiwa sarakisä.

Carmen: Jïsa ukham siwa. Ukhamajj ¿khitis Jesusar khithanpachäna? ¿Kuntï yatichkäna ukjja khitis jupar yatichpachäna? ¿Janit jupat sipan jukʼamp jilïrikpachäna? Cheqansa, khithanki ukajj maynit jilïriwa.

Susana: ¡Wali wakiskirirakisä! Janipuniw uka jiskʼa tʼaqa liytʼirikatätti.

Carmen: Ukat kuntï Jesusajj Juan 14:28 jiskʼa tʼaqanjja siskäna ukats amuytʼarakismawa akham siwa: “Jumanakajj istʼapjjestawa: ‘Sarjjäwa, ukatsti wasitampiw jutä jumanakampïñataki’ siri. Cheqpachantejj munasipjjetasmajja: ‘Awkin ukaruw saraskta’ uk siri istʼasinjja kusisipjjasamänwa, jupajj nayatsa jukʼampïtap layku” sasa. Aka jiskʼa tʼaqarjamajja, ¿Jesusajj jupa pachpat kunjams amuyasïnjja?

Susana: Cheqasa, Awkejj nayat jilïriwa sarakisä. Ukhamajj Diosarojj jilïriparjamaw uñjpachäna.

Carmen: Cheqas ukhamawa. Jichhajj Mateo 28:18 jiskʼa tʼaqa liytʼarakiñäni. Ukanjja, Jesusajj arkirinakapar akham sänwa: “Nayar churatawa taqe munañanïñajja alajjpachansa, akapachansa” sasa. Ukhamajj ¿qalltatpach munañanïpuniyatwa sänti?

Susana: Janiwa, antisas churituwa sarakisä.

Carmen: Jïsa, ukampis Jesusatï Diosaspajja, ¿kunjamarak jukʼamp munañanïñ katoqaspansti? ¿Ukat khithirak churaspänsti?

Susana: Uk amuytʼañajaspawa.

¿Khithirus parlirïna?

Carmen: Jesusatï Diosaspajja, mayaw mayjajjarakispajja.

Susana: ¿Kunas mayjäspa?

Carmen: Kuntï Jesusan bautismopat Bibliajj parlkejja ukaw mayjäspa. Lucas 3:21, 22 jiskʼa tʼaqanak thaqtañäni. ¿Liytʼasmati?

Susana: “Juanajj taqe jaqeru bautisaskäna ukapachajja, Jesusajj bautisatarakïnwa; ukatsti jupa oración lurkïpanwa alajjpachajj jistʼartäna. Qollan ajayuwa jupjjaru saraqanirakïna qhanpacha mä palomar uñtata, ukatsti mä aruw alajjpachat istʼasïna: ‘Jumätaw nayan munat wawajajja, kawkïrirutejj nayajj ajlliskta ukajja’”.

Carmen: Amuytati, ¿Jesusajj bautisaskäna ukhajj kuns luräna?

Susana: Oraskänwa.

Carmen: Jïsa ukhamawa. Jesusatï Diosapajja, ¿khitirus oración mayiskpachäna?

Susana: Ukajj wali wakiskir jisktʼarakisä, pastorajaruw jisktʼä.

Carmen: Ukat yaqha toqetjja, akarakiw amuyañajj wakisispa, Jesusajj umat mistsuskäna ukhajja, mayniw alajjpachat parlanïna. ¿Kamsansa uk amuytati?

Susana: “Jumätaw nayan munat wawajajja, kawkïrirutejj nayajj ajlliskta ukajja” sasa.

Carmen: ¡Waliki! Ukhamajj Jesusatï Diosaspajja, ¿khitis alajjpachat taqe ukanak arsunpachäna?

Susana: Janipuniw uk amuyirïkatätti.

 ¿Kunatsa “Awki” ukat “Yoqa” satäpjjejja?

Carmen: Ukat yaqha toqet yatjjataskakiñajj utjaskakiwa. Kunjamtï liytʼawayktanjja, Jesusajj Diosaw Awkïjajja sasaw säna. Ukat bautisaskäna ukhajja, mä aruw alajjpachat akajj Wawäjawa sasin istʼasirakïna. Ukat Jesús pachpasa nayajj Diosan Yoqapatwa sarakïnwa. Amuytʼañäni, jumatï uka toqet jupanakajj kikpakipuniw sasin qhanañchtʼañ munitasma ukhajja, ¿kuna uñachtʼäwimpis qhanañchtʼitasma?

Susana: Pä jila sullkampit qhanañchtʼirismajja.

Carmen: Jïsa ukampïspawa, ukat inas kikpa uñnaqtʼan pä ispa wawanakat qhanañchtʼaraksna. Ukampis Jesusajja, Diosajj Awkijawa ukat nayasti Yoqapatwa sänwa. Ukampejj ¿kamsañs Jesusajj munpachäna?

Susana: ¡Ah...! jichhaw amuyjjtjja. Jesusajja, jupat sipansa jukʼamp jilïrita ukat jukʼamp munañanitwa parlaskänjja.

Carmen: Ukhampuniskiwa. Pä jila sullkat jan ukajj kikpa uñnaqtʼan ispa wawanakat amuytʼatamajj wali askiwa. Ukhamajj Jesusatï Diosamp nayampejj kipkakïptwa sasin yatichañ munaspän ukhajja, ¿janit uka pachpa uñachtʼäwimpi jan ukajj ukat sipans jukʼamp suma uñachtʼäwimp yatichkaspänjja?

Susana: Ukhamäspänwa.

Carmen: Ukampisa, Diosampi jupampejj kunjamsa apasipjje uk qhanachtʼañatakejja, Awki ukat Yoqa uka arunakwa apnaqäna.

Susana: Uka amuytʼäwejj wali askiwa.

Jesusan nayrïri arkirinakapajj ¿kunsa Jesusjjat yatichapjjäna?

Carmen: Janïr sarkasajja, yaqha toqetwa jumamp yatjjatañ munirista, ¿tiemponisktati?

Susana: Jïsa, mä jukʼa tiempojj utjaskituwa.

Carmen: Jesusatï Diosäspänjja, ¿arkinakapajj janit ukham yatichapkarakispänjja?

Susana: Cheqas ukhamäspänwa.

Carmen: Ukampis Biblianjja, janiw ukham yatichatapajj kawkhans uñstkiti. Antisas kamsasas apóstol Pablojj qellqatayna uk uñjañäni, jupajj Jesusan nayrïr arkiripänwa. Filipenses 2:9 jiskʼa tʼaqanjja, Jesusajj jiwjjäna ukat jaktjjarakïna uka qhepatjja, kunsa Diosajj luräna uk qhanañchi, akham siwa: “Diosajj juparojj wali jachʼaru[w] apti, mä suti churaraki, uka sutisti taqe sutit sipans wali jachʼarakiwa” sasa. Aka jiskʼa tʼaqarjamajja, ¿Diosajj kamachänsa Jesusampejja?

Susana: Diosajj juparojj wali jachʼaruw apti, sarakisä.

Carmen: Jïsa, ukhamawa. Ukhamajj Jesusatï janïr jiwkasajj Diosjamaspäna ukat Diosajj qhepat jukʼamp jachʼar aptjjäspäna ukhajja, ¿janit Diosat sipansa jukʼamp jilïrikaspänjja? ¿Diosat sipansa yaqha jukʼamp jilïrejj utjaspati?

Susana: Janiwa. Janiw kunäkipans utjkaspati.

Carmen: Ukhamajj kuntï jichhakam yatiqawayktan ukarjamajja, ¿Jesusajj Diosawa sasaw Bibliajj yatichi sasmati?

Susana: Janiwa, janiw ukham yatichkiti. Antisas Jesusajj Diosan Yoqapawa sarakisä.

Carmen: Ukampisa, nänakajja Jehová Diosan Qhanañchirinakapjamajja, janiw Jesusarojj wali jachʼar apktänti. Cheqasa Mesiasajj jiwatapampiw thakhi jistʼarawayi taqe jaqenak qhespiyasipjjañapataki.

Susana: Nayajj ukhamarak amuyta.

Carmen: Ukhamajj inas akham jisktʼasiñ wakischispa, niyakejay Jesusajj taqe jaqenakan juchanakap layku jiwawaychejja, ¿kunjamsa yuspäratas uñachtʼaysna? *

Susana: Awisajj uk jisktʼasipunirïtwa.

Carmen: Jumatï munasmajja, yaqha uruw kuttʼanirista ukat kamsis Bibliajj uka jisktʼamar qhanañchañataki. ¿Mä semänaw aka horarjamajj utamankaskätati?

Susana: Jïsa, akankaskäwa.

Carmen: ¡Waliki! Ukhamajj mä semänaw jikisiñäni.

[Qhanañchäwi]