¿Yatiyätati?

¿Jumarutï mä ukchʼa qʼepiyañ munstam ukhajja, mä ukchʼampi qʼepirapim sasajj kunatsa Jesusajj säna?

▪ Jesusajja, wali uñtʼat arstʼäwipanjja, akham sänwa: “Jumarutejj mä ukchʼa qʼepiyañ munstam ukajja, mä ukchʼampi jumajj qʼepirapim” sasa (Mateo 5:41). Ukampejj ¿kamsañs munäna? Uka pachajja, autoridadanakas jan ukajj soldadonakas ak uk luram sapjjerïna ukhajja, kunjamats markachirinakajj phoqhapjjañapänwa.

Nayra patak maranakanjja, Israel markajj romanonakan apnaqatapjjänwa. Ukat jupanakajja, jaqenakarusa ukat uywanakarus munkir jan munkir kuns lurayapjjakispänwa. Ukat kun lurañatakis markachirit kuna yanakaps apaqapjjarakispänwa. Amuytʼañataki, mä Cirenenkir jaqeruw jikjjatapjjäna. Jupajja, Simón satanwa. Ukat Jesusar chʼakkatapjjañapakäna uka lawap qʼepiyapjjäna (Mateo 27:32). Ukham romanonakan lurayatapajj wali chʼamänwa ukat markachirinakarus tʼaqhesiyapjjanwa. Uka luräwinakasti janiw judionakan utjkänti.

Cheqansa, janiw sum yatiskiti qhawqpins markachirinakar munkir jan munkir qʼepiyapjjerïna. Ukampis judionakajj ukanak phoqhañjj janiw munapkaspänti. Ukhamajj kuntï Jesusajj mä ukchʼa qʼepipjjam sas sapjjatam ukhajja mä ukchʼampi qʼepipjjañama sänwa, ukampejj kamsañs munäna, kuntï autoridadanakajj mayipkätam ukat wakisini ukhajja, uk sum phoqhapjjañapatakiw chʼamañchtʼaskäna (Marcos 12:17).

¿Biblian qellqatäki uka Anás chachajj khitïnsa?

▪ Jesusar juchañchapkäna uka tiemponwa mä ‘jilïr sacerdote’ Anás jan ukajj Anán sat chachat parli (Lucas 3:2; Juan 18:13; Hechos 4:6). Jupajj Caifasan suegropänwa. Caifasajja, uka tiempo israelitanakan jilïr sacerdotepanwa. Ukat Anasajj 6 jan ukajj 7 nayra pach maranakatpachwa, sacerdotjam loqtarakitayna. Ukat Valerio Grato Roma mark apnaqerin yanapiripaw 15 maranjj apaqakjjatayna. Ukhamäkchïn ukasa Israel markanjja, wali munañanïnwa. Ukat tollqapasa, phesqha yoqanakapas ukham jïlïr sacerdotenakapjjarakïnwa.

Ukat Israel markajj jan yaqha markan apnaqatäpkäna ukhajja, sacerdotjam uttʼayatäpkäna ukanakajj jiwañapkamaw loqtapjjerïna (Números 35:25). Ukampisa, Roma markajj apnaqjjäna ukhajja, apnaqerinakasa ukat reyinakasa munañaparukiw sacerdotenak uttʼayapjjerïna ukat apaqapjjerïna. Sarnaqäwinakat yatjjatir Flavio Josefojja, Quirinio apnaqeriw Joazar sat sacerdoter 6 jan ukajj 7 maranakan sacerdotet apaqäna, ukat jupa lantiw Anasarojj sacerdotet uttʼayäna. Amuyatajja romanonakajj sacerdotepkän uka familianakatwa sacerdoteñapatakejj ajjlipjjerïna.

Anasan familiapajja, wali qamiri ukat jupatakik taqe kuns munirit uñtʼatänwa. Amuyatajja, templonjj familiapakiw sacrificion loqtañatak palomanaka, uwijanaka, acietsa, vinsa ukat yaqha ukhamanaksa aljirïna, janiw yaqhanakar aljayirïkänti. Ukat Josefojja, Anasan mä wawapajj Ananías satänwa sasaw qellqatayna, “ukan uywatanakapajja wali qhoru jaqenakapjjänwa, kunattejj [...] sacerdotenakataki diezmo qollqe apthapiskäna ukjja jupanakakiw katuntasjjapjjerïna, ukat jan churañ munirinakarojj nuwjapjjerïnwa” sasa.