Biblian qellqatäki uka milagronakarojj ¿creytati?

MÄ MUNAT amigomatï mä muspharkañ sarnaqäw toqet jumar cuenttʼiristam ukhajja, ¿kunjamatsa kuntï sisktam ukajj cheqäskapuniw sasmajja? Janiw kunjamtï cuenttʼktam ukatak creykasmati jan ukasti, amigomajj kunjam jaqesa ukarjamaw juparojj creyisma ¿janicha? Amigomatï uñtʼkta ukhatpach janipun kʼarisirïkstam ukhajja, kuntï sisktam ukjja, jan pächasisaw creyismajja.

Niya uka pachparakiw Biblian qellqatäki uka milagronakat sasispa. Janis jiwas pachpa uka milagronak uñjawaykstanjja, cheqäskapunit janicha ukjja yatsnawa ¿kunjamatsa? Ukwa jichhajj phesqa toqet uñjañäni:

Walja milagronakajj taqenin uñjkataw lurasïna. Yaqhep pachajja, waranq waranqa jan ukajj millón millón jaqenakaw milagronak uñjapjjäna (Éxodo 14:21-31; 19:16-19). Janiw jamasat luraskänti jan ukasti taqenin uñjkataw lurasïna.

Jan amuykayakiw lurasïna ukat akatjamatarakwa lurasirakïna. Janiw aleqat walja jaqenak tantachthapisin luraskänti ni jaqenak jutapjjañapatakjam musicanakampi jan ukajj yaqha ukhamanakampis wakichaskänti. Biblian qellqatäki uka milagronakajja, jilapartejj akatjamata jan ukajj khitis mayïna ukarjamaw lurasïna (Marcos 5:25-29; Lucas 7:11-16). Ukat janirakiw jayäkipans wakichaskarakïnti.

Janiw wali uñtʼatäñataki ukat qollqeniñ laykukis luraskänti. Milagronak lurapkäna ukanakajja, Jehová Diosar jachʼañchañ munasaw lurapjjäna (Juan 11:1-4, 15, 40). Ukat milagronakat qollqe mayiñ munapjjerïn ukanakarojj juchañchasïnwa (2 Reyes 5:15, 16, 20, 25-27; Hechos 8:18-23).

Kunayman milagronakarakiw lurasïna, janiw khiti jaqes ukham lurkaspänti. Sañäni: Lamar qotarus saytʼayasïnwa, thayas tʼakurayasïnwa, umsa vinoruw tukuyasïna, jallsa wal puriyasïna jan ukajj janiw puriyaskänti, usutanakarus qollasïnwa ukat nasïwitpach juykhupkäna ukanakarus qollasirakïnwa. Uka milagronakasa ukat yaqha milagronakasa, jaqet sipansa jukʼamp chʼamanin yanaptʼapampi lurasitapwa qhan uñachtʼayistu (1 Reyes 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7).

Uñjapkäna ukanakasa ukat jan iyawsirinakasa creyipjjarakïnwa. Jesusajj Lazaror jiwatat jaktaykän ukjja, uka tiempon kʼari yupaychäw pʼeqtʼirinakajj janiw pächasipkänti.  Lazarojj pusüruw kawkharutï jiwatanak imapjjerïn ukan imatäjjäna (Juan 11:45-48; 12:9-11). Walja patak maranak qhepatjja, Talmud qellqer judionakasa janirakiw Jesusan milagronak luratapatjj pächasipkänti. Antisas khitin chʼamapampis ukanak luräna ukwa pächasipjjäna. Uka pachparakiw Jesusan arkirinakaparojj judionakajj akham sasin jisktʼapjjäna: “¿Kuna munañampisa jan ukajj khitin sutipjjarusa jumanakajj taqe akanak lurapjjtajja?” sasa (Hechos 4:1-13).

Ukhamajja, Biblian qellqatäki uka milagronakajj ¿cheqäskapuniw sisnati? Cheqansa, phesqa toqet amuytʼaniwayktan uk uñjasajja, janiw pächasksnati antisas confiyañasawa. Ukampis janiw ukakïkiti jukʼampinakaw ukar creyiñasatakejj utji. Biblianjja, uka milagronakajj kuna pachasa, kawkhansa ukat khitinakas uñjapjjatayna taqe ukanakwa qhanañchi. Ukat jan creyipki ukanakasa, kunjamtï Bibliajj siski ukajj cheqäskapunitap amuyasajj wal muspharapjjarakïna. Ukampirusa, Biblian qellqatäki uka profecianakajj kunjamtï qhanañchki ukajj ukhampuniw phoqhasiraki. Ukat ukhamarakiw Biblian wali chuymachtʼkir arunakapajj kunayman kasta jaqenakaru, wayn tawaqonakaru jilïrinakaru cheqansa, taqeniruw taqenimp sum apasiñatak yanaptʼawayi. Uka ewjjtʼanakjamajj janipuniw yaqhajj utjkiti.

Ukat kuntï Bibliajj siski ukar janipun confiyksta ukajja, ¿Bibliat jukʼamp yatjjatañar janit uchaskasma? Ukham lurät ukhajja, jukʼampiw uñtʼäta ukat confiyarakïta (Juan 17:17). Jumatï Biblian qellqatäki uka milagronakar creyïta ukhajja, kuntï Bibliajj jutïritak parlki ukajj phoqhasipuniniw sasajj taqe chuymaw confiyarakïta.

[7 janan fotopa]

Jesusan uñisirinakapajj Lazaron jiwataparojj creyipjjänwa