Diosar jakʼachasipjjam

Diosajj juchanak perdonasajj armjjewa

¿UKAJJ cheqati? Jïsa cheqawa. Jehová Diosajj loqtirinakaparojj akham siwa: “Nayasti jupanakarojj ñanqha luratanakapatjja perdonarakïwa, jucha luratanakapatsti janiw mayampsa amtaskjjarakïti” sasa (Jeremías 31:34). Maynejj arrepentisjje ukhajja, Diosajj perdoniwa ukat janiw mayamps uk amtjjeti. Ukhamajja, ¿taqe kun Lurir Diosajj kuna juchanaktï perdonki uka juchanakat armasjje sañt ukampejj munpacha? Kunjam toqetsa Jehová Diosajj juch perdoni ukat armaraki ukjja, Ezequiel profetan arunakapan qhan amuyasi. (Ezequiel 18:19-22 Liytʼäta.)

Ezequiel profet toqew Jehová Diosajj Judá markarusa ukat Jerusalén sat capitalaparus juchañchañatak arsüna. Cheqa yupaychäwitwa jupanakajj jitheqtjjapjjäna ukat nuwasiñanakaruw sarjjapjjäna. Uka markarojja, Babilonionakaw tʼunjani sasaw Jehová Diosajj säna, ukampisa mä suytʼäwi churarakïna: juchañchäwejja sapa maynirüniwa, mä arunjja, sapa maynejj lurataparjamaw juchañchatäni sasaw sarakïna (19 ukat 20 jiskʼa tʼaqanaka).

Ukhamajja maynitï jan walinak lurkasin arrepentisini ukhajja, ¿kunas jupamp pasasapäna? 21 jiskʼa tʼaqanjja, Diosajj akham sänwa: “Ñanqha lurir jaqetejj taqe ñanqha juchanaka lurkän ukanaka apanukjjani, ukatsti nayan leyinakajjarjamaraki sarnaqjjani, kunatejj askïki, kunatejj cheqapäki ukanak lurjjarakini ukajj jakaskaniwa, janiw jiwkaniti” sasa. Kunjamtï uñjktanjja, taqe chuyma arrepentiski ukat jan wali luräwinakap jaytjje ukanakar ‘pampachañatakejj’ Jehová Diosajj jankʼakiwa (Salmo 86:5).

Ukat juchanakapampejj ¿kunas pasäna? 22 jiskʼa tʼaqajj akham saskakiwa: ‘Janiw mayampsa uka jucha luratanakapatjja jupa contra amtasjjäti’ sasa. ‘Janiw mayampsa jupa contra amtasjjäti’ siski uka arunakajja, ¿kamsañs muni?

Biblian hebreo arut “amtaña” sasin jaqokipatäki ukajja, janiw kuntï nayrajj lurasiwayki ukanakak amtaña sañak munkiti, “jan ukasti lurañapuni, mä arunjja, amtañampi lurañampejj mayakipuniwa” sasaw Biblia toqet yatjjatir mä jaqejj säna. Ukhamajj “amtaña” siski uka arojj “luraña”sañ munarakispa. Ukhamajj juch luriritï taqe chuym arrepentisini ukhajja, Jehová Diosajj janiw jupa contra kuns lurkaniti, mä arunjja, janiw uka jan wali luratanakapat mutuykaniti. *

Ezequiel 18:21, 22 qellqatan qhanañchki uka arunakajja, kawkhakamas Jehová Diosajj perdoni ukwa qhan uñachtʼayistu. Diosatï arrepentisirinakar perdonchejja, janiw juchanakap mayamps amtjjaniti. Mä arunjja, kuna juchanaktï perdonki ukjja qheparus jaytkaspa ukhamäjjewa (Isaías 38:17). Perdonasajj janiw mayamps amtjjeti (Hechos 3:19).

Juchararätasatjja, sapa kutiw pantjastanjja, ukatwa Diosan khuyapayasiñap munapuntanjja (Romanos 3:23). Ukampis jiwasatï taqe chuym arrepentisiñäni ukhakiw Jehová Diosajj perdonistani uk janipun armañäniti. Maynin juchap perdonasajj armjjewa, mä arunjja perdonkistu uka juchanakasatjja janiw mutuykistuti. ¡Uk yatiñajj wali askiwa! ¿Janit ukham Diosar jukʼamp jakʼachasiñ munkarakisma?

[Qhanañchäwi]