Jehová Diosar kusisiyañatakejj khuyaptʼayasirïñasawa

JAPÓN markankir mä waynarojja, chuymankipstat mä chachan khuyapayasirïtapaw chuymapar purtʼäna. Uka chachajja, mä misionerönwa, jukʼa maranakakiw uka markankaskäna, ukat uka aru parlañsa janiw sum yatkänti. Ukhamäkchïnsa, uka waynarojj Bibliat parlirejj sapa semanaw sarirïna. Munasiñampi, kusisita ukhamaw uka waynan walja jisktʼanakapar jaysirïna.

Ukham wali munasiñamp uñjatapaw uka waynarojj wal muspharayäna, ukatwa jupajj akham lupʼïna: “Bibliatï ukham suma jaqëñatak yanaptʼchejja, nayajj Bibliat yatjjatañajarakiwa” sasa. Misioneron khuyaptʼayasirïtapaw uka waynarojj kuntï jan yatkän taqe ukanak yatjjatañapatak yanaptʼäna. Cheqas ukhamawa, khuyaptʼayasirïñajja, maynirojj llampʼu chuymanwa tukuyi ukat ukajj arunakat sipansa jukʼamp chʼamanirakiwa.

Jehová Diosajj khuyapayasiriwa

Khitinakarutï wal munasktan mä arunjja, familiaranakasar khuyaptʼayañajj janiw chʼamäkiti. Cheqas khuyapayasirïñajja Jehová Diosatwa juti ukat kunjamtï Jesusajj siskänjja, alajjpachankir Awkisajj janiw khitinakatï Jupar wal munasipki ukanakaruk munaskiti, jan ukasti ‘Jupar jan yuspäririnakarusa’ khuyapayasirakiwa sasa. Ukatwa Jesusajj arkirinakapar akham sas chʼamañchtʼäna: “Askïpjjamaya, kunjämatejj alajjpachankir Awkimajj askïki ukhama” sasa (Lucas 6:35; Mateo 5:48; Éxodo 34:6).

Niyakejjay Jehová Diosar uñtasit luratästanjja, Jupjam khuyaptʼayasirirakïsnawa (Génesis 1:27). Ukhamajja, Jupat yateqasisajj janiw familiasaruk khuyaptʼayasksnati, yaqhanakarojj khuyaptʼayaraksnawa. Ukampirusa Bibliajj khuyaptʼayasirïñajj qollan ajayun mä achupawa ukat ukarakiw Jehová Diosan chʼamapjja churi sasaw qhanañchi (Gálatas 5:22, MT). Ukhamajja, taqe kun Lurir Diosarutï jukʼamp uñtʼañäni ukhajja, jukʼampiw Jupar jakʼachasiñäni ukat khuyaptʼayasirakiñäni.

Niyakejjay jaqenakajj khuyapayasirïñasatak lurtʼatästanjja, Diosatakejj ukajj wali valoraniwa, ukatwa Jupajj “maynit maynikama khuyaptʼayasirïpjjam” sasajj sistu (Efesios 4:32). Ukat Arupanjja, ‘katoqtʼasirïpjjam’ sasaw chʼamañchtʼarakistu (Hebreos 13:2).

Jan yuspärasir jaqenak taypin jan ukajj jan wali tiempon jakkasasa, ¿kunjamarak mayninakampis ukat jan uñtʼatanakampis sum apassnasti? ¿Kunjamsa uk lursna? ukat ¿Kunatsa chʼamachasiñasäspa?

Diosar kusisiyañatakejj khuyaptʼayasirïñasawa

Jan uñtʼatanakar khuyapayañat parlañ tukuyasajja, apóstol Pablojj akham sänwa: “Yaqhepanakajj jan yatisakiw angelanaks katoqapjjäna” sasa. Jehová Diosan khithanitanakapar khuyapayasma ukhajja, ¿kunjamakis jikjjatasisma? Amuytati “jan yatisakiw” yaqhepanakajj utapar katoqapjjäna sasaw Pablojj qhanañchi. Mä arunjja, jiwasatï jan uñtʼatanakaru ukat yaqhanakarus khuyaptʼayañänejja, jan katoqañatwa bendicionanaks katoqsna.

Kuntï Pablojj qhanañchkäna uka arunakjja, Génesis 18 ukat 19 jaljanakan Abrahamat ukat Lot chachat parlki ukaruw jilapart jiskʼa qhanañchäwinakan Biblianakajj uñtayi. Jupanakajja, wakiskir yatiyäwinak yatiyir Diosan angelanakaparuw katoqapjjäna. Abrahamarojja, Diosajj mä wawanïyätawa siskäna ukwa angelajj yatiyäna. Ukat Lot chacharojj Sodoma,  Gomorra markanakajj tukjatäniw sasaw angelajj yatiyarakïna (Génesis 18:1-10; 19:1-3, 15-17).

Uñjaniwayktan uka tʼaqanjja, kunjamsa Abrahamas ukat Lot chachas jan uñtʼatanakar katoqtʼapjjatayna ukwa yatjjataniwaytanjja. Bibliajj qellqaskäna ukhanakajja, amigonakaru, familiaranakaru jan ukajj jan uñtʼatanakar katoqtʼañajj wali askit uñjatänwa. Amuytʼañäni, Moisesajj katoqkän uka Leyinakarjamajja, yaqha markat jutirinakarojj janiw ukhamak jaytasiñapäkänti (Deuteronomio 10:17-19). Ukhamäkchin ukhasa, ukat qhepat kunjamäkäntï leyejj ukarjamajja, uka pä chachanakajj wali askinakwa lurapjjäna. Jan uñtʼatanakar katoqtʼañjja wal munapjjäna ukatwa bendicionanak katoqapjjäna.

Abrahamarojj mä wawampiw bendicïna, jupajj Isaac satänwa, ukhamarakiw jiwasanakajj Diosan khuyapayasïwipat askinak apstanjja. ¿Kunjamatsa? Abrahamampi Isacampejj Diosan amtanakapanjja wali askinakwa phoqhapjjäna. Jupanak toqew Mesiasajja, mä arunjja, Jesusajj jutañapäna. Cheqansa, kunanakatï jakäwinakapan paskäna ukajja, kunsa Diosajj jaqenakar munasitapa ukat khuyaptʼayasitap laykojj lurani ukwa uñachtʼayäna, mä arunjja, jaqenakar juchanakapat qhespiyañataki (Génesis 22:1-18; Mateo 1:1, 2; Juan 3:16).

Uka sarnaqäwinakajja, janiw kuntï Diosajj suyki ukak qhanañchkiti jan ukasti qhawqsa khuyapayasiñar Jupajj muni uksa yaticharakistuwa. Diosatakejj khuyapayasiñajj wali wakiskiripuniwa.

Jehová Diosar jakʼachasiñatakejj khuyapayasirïñasawa

Bibliarjamajja, ‘jan yäqasiri, Diosar jan jaysiri ukat jan munasiri’ jaqenak taypinwa jaktanjja (2 Timoteo 3:1-3). Sapürus uka kasta jaqenakamp chikachaskstanjja, janiw jupanakjam sarnaqañasäkiti. Antisas cristianonakajja, “janiraki ñanqhat ñanqha kuttʼayapjjamti; kunatejj askïki ukrak taqe jaqenakan nayraqatapanjj lurapjjam” siski uka ewjjtʼanakarjamaw sarnaqtanjja (Romanos 12:17).

Taqenir khuyapayaña ukat taqe chuym uk lurañajj wali askiwa. Bibliajj akham siwa: “Khitinakantejj munasiñapajj utjki” ukanakajj ‘Diosarojj uñtʼiwa’ sasa. Munasirïtasjja, mayninakar khuyaptʼayasaw uñachtʼaysna (1 Juan 4:7; 1 Corintios 13:4). Ukham lurasajj Diosarojj jukʼampiw uñtʼtanjja ukat kusisitarakïtanwa. Jesusajj wali uñtʼat arstʼäwipanjja, akham sänwa: “Kusisiñanïpjjew khitinakatejj khuyapayasirïpki ukanakajja, Diosasti jupanakatjja khuyaptʼayasirakiniwa. Kusisiñanïpjjew qʼoma chuymaninakajja, jupanakarakiw Diosarojj uñjapjjani” sasa (Mateo 5:7, 8).

Japonankir Aki sat pä wawan warmit parltʼañäni. Mamapajja, akatjamatwa jiwjjatayna ukatwa wali llakita jikjjatasïna. Awisajj llakimp  sinti aynachtʼat uñjasisajja, doctorar kunaw sarañapäna. Ukharakiw mä familiajj utap jakʼar jakasir puripjjäna. Chachapajj mä chhijinwa jiwatayna ukat phesqa wawanakaparuw wajcha jaytawayatayna. Ukaw Akirojj wal chuym chʼalljtayäna ukat uka familian amigapäñatakiw chʼamachasirakïna. Kunanakantï yanaptʼirjamäkän ukanwa yanaptʼäna, sañäni: manqʼa wajjtʼasa, kuna isinaktï familiapajj jan uchasjjapjjän ukanak churasa ukat yaqha ukhamanakampirakiw yanaptʼäna, ukhamatwa jupas walik jikjjatasirakïna. Ukat kuntï Biblian “katoqerit sipansa jukʼamp kusisiñaniw khititï churki ukajja” siski uka arunakajj cheqaskapunitapwa amuyäna (Hechos 20:35). Cheqansa, maynejj wali aynachtʼata jikjjataski ukhajja, mayninakar khuyaptʼayasajj wali chʼamañchtʼataw jikjjatasi.

Khuyaptʼayasirejja, ‘Diosaruw maytʼaski’

Khuyaptʼayasirïñatakejj janiw wali qollqenïñasa, chʼamanïñasa ni wali yatjjatatäñas munaskapuniti. Mä jukʼa kusisit uñkattʼañasa, munasiñamp parljjaytʼañasa, mä jiskʼa regalo churañasa jan ukajj filaskasin maynir lugaras churañasa maynitakejj wali askïspawa. Jumatï jan kuns kamsirjamäksta jan ukajj jan kuns lurirjamäkstajja, kunas maynir khuyaptʼayaspa uk sañama jan ukajj lurañama. Qalltan parltʼaniwayktan uka misionerot amtañäni, jupatjja Japonankir mä waynajj wal muspharäna ukat janis pachpa aru parlirïpkchïnjja, sum apasipjjäna. Ukatwa Bibliajj Diosan loqtirinakapajj ‘khuyapayasirïpjjañapawa’ sasajj sispacha (Miqueas 6:8).

Mä säwejja, akham siwa: Khuyaptʼayasirjam arunakajja, wali juyphi pachanjj kimsa phajjsiw maynirojj juntʼuchaspa sasa. Uka arunakajja yateqaskañawa: Maynir mä jukʼa khuyaptʼayasajja, walja askinakwa jikjjatsna. Jiwasatï Jehová Diosar munasa ukat suma amtamp lurañäni ukhajja, khuyaptʼaykañäni ukanakarojj kusisiyañäniwa. Ukat inas yaqhepajj jan yuspärkchistaniti, ukhamäkchin ukasa janiw inamayäkaspas ukham amuyañasäkiti. Ukham luratasajj Jehová Diosaruw kusisiyi. Bibliajj akham siwa: Taqe chuyma khuyaptʼayasirejj ‘Jehová Diosaruw maytʼaski’ sasa (Proverbios 19:17). ¿Janit yaqhanakar khuyaptʼayañatakejj chʼamachaskasma?

[12 janan fotopa]

Abrahamajj khuyaptʼayasirïtapatjja, walja bendicionanakwa katoqäna

[13 janan qhanañchäwipa]

Jumatï jan kuns kamsirjamäksta jan ukajj jan kuns lurirjamäkstajja, kunas maynir khuyaptʼayaspa uk sañama jan ukajj lurañama

[13 janan fotopa]

Maynir khuyaptʼayasirejja, ‘Jehová Diosaruw maytʼaski’