¿Yatiyätati?
¿Yatiyätati?
Jilïr sacerdoten pechopan pectoral satäkis ukan utjkän uka suma qalanakjja, ¿kawkitsa israelitanakajj jikjjatapjjpachäna?
▪ Israelitanakajj Egiptot mistsunisin wasarankjjapjjän ukhaw Diosajj kunjamsa pectoral lurapjjañapa uk säna (Éxodo 28:15-21, NM). Aka suma qalanakampiw lurapjjañapäna: rubí, topacio, esmeralda, turquesa, zafiro, jaspe, léschem sat qalampi, ágata, amatista, crisólito, ónice ukat jade. * ¿Kunjamsa uka suma qalanak jikjjatapjjpachäna?
Biblia qellqaskäna uka tiemponakanjja, uka suma qalanakajj wali askit uñjatänwa ukat aljañatakis apnaqapjjarakirïnwa. Egipcionakajj wali jaya markanakatwa uka qalanak jikjjatanipjjerïna, uka markanakajj jichhürunakanjja akanakawa: Irán, Afganistán ukat inas India markatsa alanipjjerichïna. Ukat pachpa Egipto markan minanakapajj utjkäna ukatsa uka suma qalanakjj apsupjjarakpachänwa. Faraonanakajj apnaqapkäna uka cheqanakänjja, uka suma qalanak apsupjjañapatakejj wal irnaqayapjjerïna. Job chachajja, kunjamsa uka tiempon jakïrinakajj oraq manqhat suma qalanak apsupjjäna uka toqetwa parlarakïna. Ukat zafironakatsa ukhamarak topacionakatsa parlarakïnwa (Job 28:1-11, 19).
Janïr Egiptot mistkasïnjja, “israelitanakajj egipcionakarojj jan kunani jaytawayapjjäna” sasaw Éxodo qellqatajj qhanañchi (Éxodo 12:35, 36). Ukhamajj sacerdoten pechopar uskuñatak pectoral satäkis uk suma qalanakampi kʼachachtʼañatakejja, inas egipcionakat jikjjatapjjchïna.
Biblia qellqaskäna uka tiemponakanjja, ¿kunjams carta apayapjjerïna?
▪ Persa markankir reyinakajja, kunjamsa ukat khitis cartanakap apani ukjja sumwa uttʼayapjjäna. Kunjamsa carta apayapjjerïna ukjja, Ester librow sum qhanañchi akham siwa: ‘Mardoqueojj taqe cartanakjja rey Asueron sutipampi firmantata, ukhamarak sellopampi sellantata wakichtʼäna. Ukatsti apayarakïnwa carta apirinakaru, uksti reyin wali jalir caballonakapar latʼjjatawayasinwa jalayapjjäna’ sasa (Ester 8:10). Roma markanjja, niya ukar uñatasitarakwa militaranakataki ukat reyinakataki carta apayapjjerïna.
Apóstol Pablojj qellqäna uka kasta cartananakjja, janiw ukham apayapjjerïkänti. Qollqenipkäna ukanakajja, mä uywatapampiw apayapjjerïna. Ukampisa jila partejj uñtʼatanakaru, awisajj kawkirutï carta apayañ munki uksar saririnakaruw jan uñtʼatäkchi ukas apayapjjerïna. Khitis cartjja apakispänwa, sañäni: Familiaranaka, amigonaka, soldadonaka jan ukajj alakip luririnakasa... Awispajj ukham apayasiñajj llakïnwa, cartajj sumat purini janicha ukajj janiw yatiskänti. Apóstol Pablojja, cristiano masinakaparuw yaqhep cartanakjja apayirïpachäna ukaw Bibliarjamajj amuyasi (Efesios 6:21, 22; Colosenses 4:7).
[Qhanañchäwi]
^ Qhawqhay taqpach uka suma qalanakajj jichhürunakan cuestchisp ukajj janiw sañjamäkiti.
[29 janan fotopa]
Persanakan carta apiripa
