Moundsville sat markanwa nasiwayta, uka markajja Ohio sat jawir lakanwa jikjjatasi, Virginia Occidental inti jalanta toqena Estados Unidos markana. Pusi jila sullkäpjjayätwa, kimsa yoqalla ukat mä imilla, nayajj jupanakatjja payïrïkis ukatwa; wali kusisitaw jakasipjjayäta. Awk taykajajj wali irnaqtʼiri honrado ukat jaqe masipar munasiri ukhamapjjänwa; janiw wali qollqenipkayäti, ukampis jakasiñatakejj utjapjjetänwa. Niyakejjay awk taykajajj Jehová Diosan Qhanañchiripäpjjchïnjja, waynitüpkäyät ukhatpachwa Bibliat yatichapjjetäna.

Waynitöjjayät ukhajja, jukʼat jukʼatwa cheqa yatichäwinakajj chuymajat chhaqtjjäna. Biblian yatichäwinakapajj janiw kusisiñ churkitaspati, librejjerista ukhakiw kusisiñ jikjjatirista sasaw amuyayäta. Ukatwa cristian tantachäwinakarojj jan sarjjayätti. Jilïr jilajasa ukat kullakajasa janirakiw sarjjapjjänti. Awk taykajajj kunaymanitwa yanaptʼañ munapjjetäna, ukampis janiw istʼawayapkti.

Ukham libre jakasiñ wal munatäjajja, jan wali vicionakan uñjasiyitu. Mä urojj yateqañ utat utajar kuttʼaskayät ukhaw mä amigojj cigarro churitu ukat nayajj katoqasiktwa. Ukhat uksarojja, jukʼamp jan wali vicionakan uñjasjjayäta, droganakampiw qolljjasjjayäta, alcohol umjjayäta ukat qʼañu lurañanakanwa sarnaqjjayäta. Tiempompejja, jukʼamp jan waltʼayir droganakampiw qolljjasjjayäta ukat mä qhawqhanakjja janiw armirjamäjjayätti. Ukhamïpansti, droga qollanak aljjañar kunaw uchasjjayäta.

Cocienciajar janis istʼañ munkchiyätjja, jukʼampiw jan wali luratanakajat amtayitäna. Ukampis “luratajj luratäjjewa, janiw qhepar kutʼkasmati” sasaw sasiyäta. ¡Fiestanakans conciertonakans walja jaqenakamp chikaskchiyätsa, sapaki wali llakita ukham jikjjatasiyäta! Awisajja, wali munasir awk taykajat amtasisajj kunjamarak akhamar purtʼaspachätsti sasaw wal amtasirïta.

Janis kunatak askëjjerista ukham amuyasiyäta ukampis yaqhanakajj janiw ukham amuyapkänti. Jehová Diosan Qhanañchirinakapan  kimsa uru jachʼa tantachäwipajj utjki ukaruw 2000 maran awk taykajajj invitapjjetu. Ukat janis taqe chuyma iyaw siskstjja, sartwa. Ukat jitheqtjjapjjän uka jilajas kullakajas sarapjjarakitaynawa.

Ukat mä mara nayrajja, uka pachpanwa rock sat música conciertojj apasïna ukwa jachʼa tantachäwinkkasajj amtasiyäta. Uka conciertonjja janiw kunäkipansa aka tantachäwjamäkänti. Ukanjja, basuranakakiw uksans aksans utjaskäna ukat cigarro jeqʼe phoqhakïnwa. Ukar saririnakasa jan munasiri ukhamapjjänwa, musicapas llakisiyirjamänwa. Ukampis Jehová Diosan Qhanañchirinakapan jachʼa tantachäwipanjja, wali kusisitäpjjänwa ukat walja maranakas jan jikisjjapjjchiyätjja, munasiñampiw katoqtʼapjjetäna. Ukat tantachasiñ lugaras qʼomänwa ukat yatichäwinakapas wali chʼamañchkirirakïnwa. Bibliajj kunjamsa maynir yanaptʼi taqe uk uñjasajja, kunats taqe ukanak jaytpachäta sasaw amuytatasta (Isaías 48:17, 18).

Ukat jankʼakiw cristian tamarojj kuttʼañ amtjjayäta. Ukat jilajas kullakajas taqe ukanak uñjasajj tamar kuttʼapjjarakïnwa. Ukat kimspachaniw Bibliat yatichayasiñatakejj amtjjapjjarakta.

Kuntï Santiago 4:8 jiskʼa tʼaqan siski ukaw chuymajar purtʼitu, ukanjja akham siwa: “Diosar jakʼachasipjjam, jupasti jumanakarojj jakʼachasirakiniwa” sasa. Nayatï Diosar jakʼachasiñ munstjja, jan wali luräwinakäj jaytjjañäjawa sasaw amuytʼasta. Ukatjja droganaksa, cigarrillsa ukat alcohol umañsa jaytjañäjjarakïnwa (2 Corintios 7:1).

Nayra jan wali amigonakaj-jja jaytanukjjtwa, jichhajj Jehová Diosar yupaychiri suma amigonakanëjjtwa. Bibliat yatichkitäna uka yatjjattʼat cristianow wal yanaptʼawayitu. Sapa kutiw kunjamakis jikjjatasiyät uk yatiñatakejj telefonot jawstʼaniritu. Jichhakamas suma amigojakïskiwa.

Ukat 2001 maranwa, jilïr jilajampi ukat kullakajamp chikajj Diosar jakäwij katuyasis bautisasjjta. Ukat awk taykajasa, Diosar jan jitheqtas loqtawayki uka sullka jilajasa, wali kusisitapjjänwa, jichhaw familiajajj Jehová Diosar yupaychasajj mayachthapitäjjäna.

Biblian yatichäwinakapajja taqe kunatpuns jarkʼkaspa janipunis kunas walëjjaspa ukham amuyayäta, ukampis jichhajja, jan walinakat jarkʼaqeritapwa amuyjjta. Ukat droganakamp jan qolljasjjañatakisa, jan alj-jjañatakisa ukat suma jaqëñatakis Bibliaw yanaptʼawayitu.

Jichhajja, oraqpachan mayachtʼata Jehová Diosar loqtasipki ukat maynit maynikam taqe chuym munasipki uka familia taypinkjjtwa (Juan 13:34, 35). Ukat ukanwa Adrianne sat kullakar uñtʼawayta, jichhasti jupajj esposäjäjjewa walpun jupar munasta ukat respetarakta. Panpachaniw Jehová Diosar wali kusisita loqtasipkta.

Nayatakik taqe kun thaqhañat sipansa, jaqenakaruw Diosan arunakaparjam sarnaqasajj kuna askinaksa jikjjatapjjaspa uk yatichañatak tiempo sapür apstʼasta. Diosar ukham taqe chuyma amtajata jaqenakar yanaptʼatäjatjja wali kusisitätwa. Bibliaw nayra jakäwejj jaytañatakejj yanaptʼawayitu sasajj taqe chuymaw siristjja. ¡Jichha kuchapï librejjtjja!