ABEL waynitojj qollu parkin uwijanakap wali sum manqtʼasiskir uñti. Ukat uwijanakapat jukʼamp khurir uñtasajja, mä chhayphu qhana qhanaskir uñji. Edén jardinar jan mantapjjañapatakejj mä aqkir espadaw muyuskäna, jupajj uk yatirakïnwa. Nayrajja, awk taykapaw ukan jakasipjjäna, ukampis jichhajj janiw jupanakasa ni wawanakapasa mantjjapjjaspati. Jaypʼu thayaw thaytʼasinki Abelan ñikʼutanakapsa, chʼaskaptayiwa ukampis Abelajj alajjpach uñtataw Taqe kun Lurir Diosapat lupʼiski. ¡Diosamp jaqenakamp wasitat sumankthapjjañap wal munäna!

Abelajj jichhürunakan parlaskakistuwa. ¿Jumajj istʼtati? Kamisarak ukhamänisti sasin inas sischisma. Kunattejj Adanan uka payïr yoqapajja, wali jaya tiempow jiwatäjje. Chʼakhanakapas niya sojjta waranqa maranakaw laqʼäjje. Bibliajj jiwatanak toqet parlkasajj akham siwa: “Jiwatanakajj janiw kunsa yatipkiti” sasa (Eclesiastés 9:5, 10). Ukampis Biblianjja, janiw Abelan kuna arsutapas utjkiti. Ukhamajj ¿kunjamarak parlistaspasti?

Apóstol Pablojj Diosan amuytʼayatäsajj akham sasaw Abelat säna: “Jiwatäkchisa, parlaskakiwa” sasa (Hebreos 11:4). ¿Kuna toqnams Abelajj parlaskakistu? iyawsäwip toqew parlistu. Taqe jaqet sipansa jupaw nayraqat iyawsäwinïtap uñachtʼäwayi. Niyakejjay wali iyawsäwinïchïnjja, jichha tiempons jupatjj yateqasiskasnawa. Jiwasatï, iyawsäwipat yatjjatañäni ukat yateqasirakiñäni ukhajja, Abelan sarnaqäwipajj cheqapunis parlkistaspa ukhamäniwa.

Ukampisa, Biblian Abelat jukʼaks parlkchejja, ¿kunjamsa iyawsäwipat ukat jupats yateqassna? Uk jichhajj uñjañäni.

Jaqen jakäwipajj qalltaskän ukhaw Abelajj nasïna. Jesusajj walja maranak qhepatjja, Abelajj ‘aka oraqe qalltkäna’ ukhaw jakasïna sasaw säna (Lucas 11:50, 51). Oraqe sasinjja, juchat qhespiñatak suytʼäwinïpki uka jaqenakatwa Jesusajj parlaskäna. Jaqen jakäwip qalltki ukhatjja, Abelajj pusïr jaqëkchïnsa, juparuw Jehová Diosajj juchat qhespiyañatak nayrïr jaqjam uñjpachäna. * Cheqasa, Abelajj janiw suma jaqenak taypin jilsuwaykänti.

Jaqen jakäwipajj ukhakis qalltaskchïnjja, wali llakinakanwa jikjjatasjjapjjäna. Adanamp Evampejj suma uñnaqtʼani ukat wali chʼamani jaqenakäpjjpachänwa. Ukampis jan walinwa uñjasjjapjjäna, uk jupanakajj yatipjjarakïnwa. Qalltanjja janiw juchararapkänti ukat wiñayaw jakapjjañaparakïna. Ukampis Jehová Dios contraw saytʼasjjapjjäna ukatwa Edén jardinat jaqsuyasipjjäna. Munañanakapak nayrar uchasajja, kuna jan walinsa wawanakapar uñjasiyapjjani uksa armasjjapjjänwa. Ukat jucharar jaqejjapjjänwa, wiñay jakañs aptʼasjjapjjarakïnwa (Génesis 2:15–3:24).

Edén jardinat jaqonukutäjjasinjja, Adanamp Evampejj wali chʼam tukusaw jakjjapjjäna. Ukhamäkchïnsa, Caín sat jilïr wawapajj nasïna ukhajja,  Evajj akham sänwa: ‘Mä yoqall wawanejjtwa, Jehová Diosan yanaptʼapampi’ sasa. Uka arunakajja, kuntï Jehová Diosajj Edén jardinan mä ‘warmiw mä wawanini’ ukat juparakiw Adanampir Evampir pantjasiykän uka ñanqhar tukjani siskäna uka arunak inas jupajj amtaschïna (Génesis 3:15; 4:1). Ukhamajja, kuntï Jehová Diosajj profecian mä warmit arskän ukajj ¿jupäkaspas ukhamti Evajj amuyaspachäna ukat Cainas jutaniw sat ‘wawakaspa’ ukhamti amuyarakpachäna?

Ukham amuychïna ukhajja, pantjasïnwa. Ukampis Awk taykapatï Cainar uka amuyumpi uywsupchïna ukhajja, Cainajj jukʼamp jachʼa jachʼaw tukpachäna. Tiempompejja, Evajj mayampwa mä yoqall wawa ususïna ukampis jupatjja janiw kuns kamskänti. Uka wawajj Abel satänwa, uka sutejj inas “Jan valorani” sañ munchispa (Génesis 4:2). Ukhamajja, ¿Abelat sipansa Cainaruw Evajj wali askit uñjäna sissnati? Inas ukhamächïna, janiw yatktanti.

Cheqansa awk taykanakajja Adanampit Evampitjja waljanakwa yateqapjjaspa. Awk taykanaka, arunakamampis lurawïnakamampis ¿Jehová Diosar munasiri ukat Jupan amigopañapatakit wawanakamar yatichapjjta, jan ukajj jachʼa jachʼa tukuri, jupatakik kuns muniri ukat jupan askip thaqherïñapatakich wiytasipkta? Nayrïr awk taykajja, janiw kunatï askïki uk yatichawayapkiti ukajj wali llakkañawa. Ukampis wawanakapajj janiw jan suytʼäwinïpkiti.

Uka pä wawanakapan jiltataparjamaw Adanajj familiar yanaptʼañatakejj kunjamsa irnaqapjjaspa uk yatichpachäna. Cainajj yapu lurañwa yateqäna ukat Abelajj uwija awatiñwa yateqarakïna.

Ukampisa, Abelajj jukʼamp wakiskirinakwa luräna. Walja maranak pasatatjja iyawsäwipajj jukʼampiw jiljjattäna, ukat qhepatjja, Apóstol Pablojj uka aski luräwipat qellqarakïnwa. Amuytʼañäni, Abelatakejj janiw khiti jaqet yateqasiñapas utjkänti. Ukhamajj ¿kunas Jehová Diosar iyawsäwinïñapatakejj yanaptʼäna? Uk kimsa toqet uñjañäni.

Jehová Diosan luratanakapa.

Cheqansa, Jehová Diosajj Oraqer maldicïnwa, ukatwa chʼaphinaka ukhamarak jan walinakak achjjäna, yapuchañajj wali chʼamäjjänwa. Ukhamäkchïnsa, Oraqejj achunak churaskarakïnwa, ukhamatwa Abelan familiapas jakaskarakïna. Ukampisa, uywanakasa, jamachʼinakasa, chawllanakasa; qollunakasa, qotanakasa, jawiranakasa, lamar qotanakasa; alajjpachasa, qenayanakasa, intisa, phajjsisa jan ukajj warawaranakasa janiw maldicitäpkänti. Kawkhar uñtasasa Abelajj Diosan munasiñapa, wali yatiñanïtapa ukat khuyaptʼayasirïtapsa luratanakapanjja qhanwa uñjäna (Romanos 1:20). Ukat uka toqet taqe chuym lupʼisaw iyawsäwipajj jukʼamp chʼamañchasïna.

Abelajj Jehová Dios toqet lupʼiñatakejj tiempo apsuspachänwa. Uwijanakap awatiskirs uñjksna  ukham amuytʼañäni. Uwij awatirinakajja, wal sarnaqapjjañapawa. Abelajj uwijitanakapjja qollu patnama, vallenaka, jawiranak pasasaw kawkhantï suma pastonakasa, umasa ukat samartʼañatakis utjki ukawjaruw anakiski. Jehová Diosan taqe luratanakapatjja, uwijanakajj jaqen sum uñjatäñataki, irpatäñataki ukat jarkʼaqatäñatak luratäpkaspas ukhamäpjjewa. ¿Abelajj jaqet sipans wali yatiñanïki ukat chʼamanïki ukamp yanaptʼatäña, irpatäña ukat jarkʼaqatäñti munarakpachäna? Cheqas munpachänwa, Diosar oración mayisitapanwa ukajj qhan amuyasi, ukatsti iyawsäwipajj jukʼampiw chʼamañchasirakïna.

Jehová Diosan arsutanakapa.

Kunanakas pasäna ukat kunatsa Edén jardinat jaqonukutapjjäna ukjja, Adanamp Evampejj wawanakaparojj yatiyapjjpachänwa. Ukatwa Abelajj taqe ukanakat lupʼpachäna.

Oraqejj maldicitaniw sasaw Jehová Diosajj säna. Abelajj uka arunak phoqhasir uñjänwa, Oraqejj chʼaphinaka ukhamarak jan walinakakwa achjjäna. Ukat Evarojja usur jaqëkasasa ukat wawa ususkasasa wal tʼaqhesïta sasaw Diosajj sarakïna. Uka arunak phoqhasirjja, Abelajj uñjarakïnwa. Ukatjja, munasiñampi ukat suma uñjatäñsa wal munarakïta, ukampis chachamajj apnaqarakïtamwa sasarakiw Diosajj Evar säna. Uka arunak phoqhasirsa, nayrapampiw Abelajj uñjarakïna. Taqe ukanak uñjasaw Diosan arunakapajj cheqätap amuyäna. Ukat Jehová Diosajj mä ‘wawa’ toqew kunatï Edén jardinan jan walinakajj qalltawaykäna ukajj askichatani siskäna ukarojj taqe chuymaw confiyarakïna (Génesis 3:15-19).

Jehová Diosan loqtirinakapa.

Abelatakejj janiw khiti jaqes yateqasiñatak utjkänti, ukampis yaqhanakaw yateqasiñapatakejj aka Oraqen utjäna. Jehová Diosajj Adanampir Evampir Edén jardinat jaqonukkäna ukhajja, uka jardinar jan khitis mantañapatakejj querubín sat angelanakwa usküna. Uka angelanakajj jilïripjjänwa ukat ‘mä aqkir espada muyuskäna’ uka chikaw Edén jardín mantañ punkun sum uñjapjjäna (Génesis 3:24, NM).

Ukanksnas ukham amuyañäni: Abelajj querubín sat wali chʼamani jaqer tukut angelanakaruw uñchʼukiski. Ukat wali ajjsarkayarakiw espadajj nina aqas jan saytʼas muyuskaraki. Abelajj jachʼaptañapkamasa, janipuniw uka angelanakar qarita, samartʼaskiri jan ukajj qʼala aynachtʼatsa uñjirïkänti. Jan ukasti urunakasa, maranakasa..., pasjjchïnjja uka chʼikhi angelanakajj janipuniw onjjtapkänti. Uk uñjasaw Jehová Diosar jan jitheqtas loqtirinakap utjatap Abelajj yateqäna, ukampis familiapajj janiw ukham loqtapkänti. Cheqansa uka angelanakar uñjasaw iyawsäwipajj jukʼamp chʼamañchaspachäna.

Kuntï Jehová Diosajj luratanakap toqejj Jupa pachpat qhanañchki, arsuwayki ukat Diosar taqe chuym loqtirinakat lupʼisaw Abelan iyawsäwipajj jukʼamp chʼamañchasïna. Cheqas Abelan sarnaqäwipajj parlkistaspas ukhamawa. Wayn tawaqonakan familianakapasa Diosar jan loqtapkchejja Abelan sarnaqäwipaw jupanakar wal chʼamañchaspa. Jichhürunakanjja, walja yanaptʼanakaw iyawsäwis chʼamañchañatakejj utjistu, sañäni: Diosan luratanakapa, Diosar jan jitheqtas yupaychirinaka ukat Biblias phoqhatpacharakiw utj-jjestu.

Abelajj jukʼamp iyawsäwinïtapjja luräwipampiw uñachtʼayañ munäna. Ukampis ¿kunarak mä aleq jaqekist taqe kun Lurir Diosar churaspasti? Cheqas janiw kuns churkaspati. Tiempompejj Abelajj akham amuyäna: nayatï suma amtampi, kunäjatï utjkitu ukanakat sumäki uk churäjja, munasir Diosajj katoqasitaniwa sasa.

Abelajj Diosar sacrificio loqtañatakejja, mä qhawqha uwijanakwa wakichtʼäna. Ukatakejj jilïr suma jachʼa uwisqallunakwa wakichtʼäna, ukat amuyuparjamajj kawkhatï Diosatakjamäkaspa ukanak ajlltʼasaw sacrificiot loqtäna. Cainajja ukhamarakiw Diosan askit uñjatäñataki ukat bendicionap katoqañatakejj yapuchkän ukanakat ofrendjam loqtañatak wakichtʼäna. Ukampis Abelan amtapat sipanjja mayjänwa. Ofrendanakap loqtapkäna ukhaw ukajj qhan amuyasïna.

 Cainampi Abelampejj Diosar sacrificio loqtañatakejj altarsa ukat ninsa wakichapjjpachänwa. Ukat querubín sat angelanak nayraqatan inas loqtapjjchïna, jupanakakiw Diosar taqe chuym loqtirejj aka Oraqen ukapachajj utjäna. Uk Jehová Diosajj uñjaskänwa. Bibliajj akham siwa: “Diosasti Abelarojj, ukhamarak ofrendaparusa [askit uñjäna]” sasa (Génesis 4:4). ¿Kunjamsa Diosajj askit uñjpachäna? Uka toqet Bibliajj janiw qhanañchkiti. Ukampis ¿Kunatsa Abelarojj askit uñjpachäna?

¿Suma sacrificio loqtatapatti Diosajj askit uñjpachäna? Abelajj jakkir uwijwa wilap wartasin loqtäna. ¿Jupajj uka sacrificiojj wali askit uñjatäñap yatpachänti? Walja maranak qhepatjja, ‘Diosan Corderoparuw’ mä arunjja, Yoqaparuw uka qʼoma jan kamachtʼat uwij-jja uñtayasiñapäna (Juan 1:29; Éxodo 12:5-7). Ukampis qhepat kunjamänisa ukjja, inas Abelajj jan yatkchïnti ni amuykchïnsa uk janiw yatktänti.

Abelajj sacrificio loqtañatakejj kunapatï utjkäna ukatjja, sumäkis ukwa Jehová Diosarojj mä ofrendjam loqtäna, uk niyas sum yattanjja, ukatwa juparusa ukat sacrificioparus wali askit uñjäna. Jupajj Jehová Diosar taqe chuym munasïna ukat wali iyawsäwinïtap laykuw ukham luräna.

Ukampis Cainajj janiw ukhamäkanti. Jehová Diosajj ‘janiw Cainarus ni ofrendaparus askit uñjkänti’ (Génesis 4:5). Cheqansa, ofrenda waktʼaykän ukajj walikïskänwa, qhepatjja Jehová Diosajj israelitanakar Leyinak churkäna ukanjja, Oraqen achunakapjja churapjjarakispänwa (Levítico 6:14, 15). Ukampis Bibliajj Cainatjja, akham siwa: “Cainan luratapajj janiw walïkänti” sasa (1 Juan 3:12). Jichhürunakanjja jaqenakajj Dios chuymapkaspas ukhamwa tukupjje, Cainajj ukhamarakiw tuküna. Ukampis luratanakapanwa jan cheqpach iyawsäwinitapa ukat Jehová Diosar jan munasitap uñachtʼayäna.

Jehová Diosamp jan askit uñjatasajja, ¿Cainajj Abel jilapat yateqasiñatakejj chʼamachaspachänti? Janiwa. Antisas jilaparojj wal uñisjjäna. Jehová Diosajj Cainar uk amuyasajja, pacienciampiw amuytʼayañ munäna. Kuntï luraskta ukajj jachʼa jucharuw puriyiristam, ukat jumatï kunatï askïki uk lurjjäta ukhajja, “¿janit jachʼar aptatäkarakismajja?” sasaw säna (Génesis 4:6, 7).

Ukampis Cainajj janiw Diosan ewjjtʼanakaparojj istʼkänti, mä urojja Abel jilaparuw pampar sarañäni sasin säna. Ukanwa akatjamat katuntasin jilaparojj jiwayjjäna (Génesis 4:8). Cheqansa Abelajj cheqa yupaychäw laykojj jupaw nayraqat arknaqat uñjasïna ukat jiwarakïna sisnawa. Abelajj jiwatäjjänwa ukampis sarnaqäwipatjja amtasiskakiwa.

Abelan wilapajj kunatï cheqapäki uk uñjañapatakis Diosar artʼaskaspa ukhamänwa. Diosajj uka jan wali luratapatjja, Cainarojj cuenta mayïna (Génesis 4:9-12). Ukampis Abelajj iyawsäwip toqew jichhürunakan parlistu ukaw jukʼamp wakiskirejja. Niya patak maranakas Abelajj jakawaykchïnjja, uka tiempon jakapkän uka jaqenakatakejj jukʼa tiempokis jakawaykaspa ukhamanwa. Ukampisa Abelajj sum sarnaqawayäna ukat Jehová Diosan askit uñjatätapsa, wali munatätapsa janïr jiwkasinwa yatiwayjjäna (Hebreos 11:4). Ukhamajja, Abelajj Diosan amtapankaskiwa kunaratutï jiwatanakajj jaktanipkani ukhajja, jupajj jaktanirakiniwa (Juan 5:28, 29). ¿Jumajj jupar uñtʼätati? Jumatï Abelar istʼañatak chʼamachasïta ukat iyawsäwipat yateqasirakïta ukhajja, uñtʼätawa.