MOISESATJJA: ¿KUNS YATEQASSNA?
¿Khitïns Moisesajja?
Uka suti istʼasajj akjjar utjki uka listatjja, ¿kawkïris amuyumar juti?
-
Asu wawäkän ukhaw mä canastar uchasin Nilo sat jawirar taykapajj jaytanïna.
-
Mä waynajj wali yänakjjaruw Egiptonkir faraonan phuchhapamp uywatäna ukat israelitätap janipuniw armaskänti.
-
Mä chachajj Madián markan 40 maranakaw uwij awatïna.
-
Mä chachajj Jehová * Diosampiw nina aqaskir zarza chʼaphi nayraqatan parläna.
-
Mä chachajj Egipto markan reyiparuw israelitanakar antutañapataki jan ajjsaras parläna.
-
Mä chachajj jachʼa jachʼa tukuri faraonaruw tunka jan waltʼäwinakat qhanañchäna.
-
Mä chachajj Egipto markat israelitanakar qhespiyasinwa wasaran pʼeqtʼäna.
-
Mä chacha toqnämwa Diosajj Wila lamar qota payar jaljtayäna.
-
Mä chachajj Diosan sutipjjaruw Tunka Mandamientonak israelitanakar churäna.
MOISÉS chachaw taqe ukanakana ukat jukʼampinakan uñjasïna. Jupajj Diosat jan jitheqtasapuniw loqtäna ukatwa cristianonakana, judionakana ukat musulmananakan wali respetatänjja.
Cheqansa, Moisés profetajj wali ‘muspharkañ milagronakwa luräna’ (Deuteronomio 34:10-12). Diosas taqe uka milagronak lurañapatak chʼam churkchïnjja, Moisesajj mayni profetanakjam “jaqekirakïnwa” (Santiago 5:17). Ukat jiwasjamarakiw kunayman jan waltʼäwinakan uñjasïna ukat atipjarakïnwa.
¿Kunjams atipjpachäna uk yatiñ munasmati? Kunjam jaqënsa ukjja, kimsa toqet uñjañäni ukat kunjamsa jupat yateqassna uksa uñjarakiñäniwa.
^ Bibliarjamajja, Diosajj Jehová satawa.
