NAYRA qellqatanakat mä qhawqha yatjjatirinakajja, jichha maranakanak jikjjatapki uka qellqatan kuntï siski ukwa qhanañchapjjatayna. Ukat uk yatisajja, oraqpachankir periodistanakajj 2006 maran abril phajjsinjja, taqeniruw yatiyapjjäna, uka qellqatajj “Evangelio según Judas” sutimpiw uñtʼasi. Yatiyäwinakarjamajja, mä qhawqha yatjjatirinakajj uka toqet akham sasaw amuyapjjäna: aka qellqatajja, kuntï Jesusan arkirip Judas chachat amuyktan ukjja mayjtʼayaniwa, janiw jan wali jaqjam uñj-jjapjjañäniti, antisas jupakis Jesusar sum uñtʼkaspa ukat Jesusan mayitaparjamas aljantkaspa ukhamwa amuyjjapjjañäni sasa.

Uka qellqatajj ¿cheqapunit nayra tiemponakan qellqaspachäna? Ukhamächi ukhajja, kuntï Judas Iscariotetsa, Jesusatsa jan ukajj nayrïri cristianonakat jan yatktan ¿ukti qhanañchpacha? ¿Kuntï Jesucristotsa ukat yatichäwinakapats amuyktan ukarojj mayjtʼaypachäniti?

“Evangelio según Judas” sat qellqat kunjamsa jikjjatapjje ukajj janiw sum yatiskiti. Cheqansa, janiw kunjamtï oraq allirinakajj yaqha qellqatanak jikjjatapki ukham jikjjatapkiti, jan ukasti kawkhantï nayra yänak aljapki ukanwa akatjamat 1970 maranak tukuya jan ukajj 1980 maranak qalltan uñstäna. Amuyatajja, 1978 maranwa Egipto markan kawkhantï jiwatanak imapki ukan jikjjatapjjpachäna. Uka qellqatajj códice (mä libror uñtata) siski uka pusi qellqatanak taypinkänwa, ukat copto (nayra Egipto markan arupat jutiri) arun qellqatarakïnwa.

Niyakejjay walja patak maranak mä waña lugaran imatächïnjja, apsjjatajja, libror uñtat lipʼichimp lurat qellqatajja, jankʼakiw merqʼesjjäna. Ukat 1983 maranjja, kimsa yatjjatatanakaw uka qellqat uñakiptʼapjjäna, ukampis janiw uka qellqat alirjamäpkänti wali jilänwa. Uka qellqatajj walja maranakaw ukhamak thanthaptaskäna, janiw sum imapkänti. Ukat 2000 maranjja, nayra maranakan lurat yänak aliri Suizankir mä warmiw uka qellqat alatayna ukat mä qhawqha tiempotjja, walja markanakat mayachthapit yatjjatirinakaruw uka qellqat churatayna. Uka grupojja, Fundación Mecenas de Arte Antiguo ukat Sociedad National Geographic sat institucionanakan yanaptʼapampiw irnaqapjjäna,  ukat jupanakajj mä chʼama luräwi phoqhapjjañapänwa: uka jiskʼa jiskʼa tukjat qellqat (códice) askichtʼasin sumaptayapjjañapänwa, yaqha arur jaqokipapjjañapänwa ukat kunapachatänsa uk yatjjatapjjañapänwa ukat kuna toqets parli uksa qhanañchapjjañaparakïnwa.

Ukat carbono 14 satäkis ukampiw uka qellqatajj 200 jan ukajj 300 jichha maranakatätap yatisjjäna. Ukampis copto arut “Evangelio según Judas” qellqatajja, jukʼamp jaya maranakat griego arut jaqokipatawa sasaw yatjjatatanakajj sapjjarakïna. Ukhamasti ¿kuna marapunis qellqaspachäna ukat uka maranakajj kunanakas paspachäna?

“Evangelio según Judas” qellqatatjja, Ireneo chachan qellqatapanwa nayraqat parlasi, jupajj 100 tukuya maranakan jakäna ukat cristianjamaw uñtʼayasirakirïna. Ukat Contra las herejías sat qellqatapanjja, walja gruponakar uka maranakan qallasitapwa qhanañchi akham sasa: “Jesusar aljantir Judas chachajja taqe akanak sum uñtʼäna sasaw sapjje, ukat jupakis Jesusan arkirinakapat ‘kunatï cheqäki’ uk sum yatkaspa ukats aljantkaspa ukat jupa toqnämas taqe kunatï akapachansa ukat alajjpachansa utjki ukanakajj tʼunjaskaspa ukhamwa sapjjaraki, taqe uka arunakjja mä qellqatanwa qhanañchapjje, uka qellqatarojja, ‘El Evangelio según Judas’ sasaw sutichapjjaraki” sasa.

Ireneo chachajja, cristianos gnósticos sutimp uñtʼatäpkäna ukan yatichäwinakap contraw saytʼäna, jupanakajj janipun khitis yatki uks yatipkaspa ukham amuyasipjjerïna. Gnosticismo sasinjja, uka tiempon walja gruponakajj “cheqa” yatichäwinak amuyunakaparjamak qhanañchapjjerïna ukanakatwa parlaski. Uka gnósticos sutimp uñtʼatapkäna ukanakajja, jupanak pachpa qellqapkäna ukarjamakiw jaqenakarojj amuyunakap yatichapjjerïna, uka qellqatanakajj 100 jichha pacha maranakanjja waljaw utjäna.

Evangelios gnósticos (uka gruponakan yaqhep qellqatanakaparuw uka sutimp uñtʼapjjerïna) uka qellqatanakanjja, wali uñtʼat apostolonakapaw Jesusan arunakap mayjtʼayapjjäna ukat Jesusajj mä imantat yatichäwipjja, mä qhawqha apostolonakapar ajlltʼasaw yatiyäna, sasaw qhanañchi. * Ukat gnósticos taypinkirit yaqhepanakajja, aka Oraqejj mä carceläkaspas ukham luratawa ukat ukajj Antiguo Testamenton “taqe kun lurir diosat” parlki ukaw luri. Ukat uka diosajj creyipkäna uka diosanakat sipan sullkäkaspas ukham amuyapjjerïna. Ukatjja, kunatï cheqäki uk sum amuyki ukanakakiw uka imantat yatichäw amuyapjjaspa ukat jañchi cuerpopan qhespiñapatakis yanaptʼaspa sasaw sapjjerïna.

Ukham amuyapjjatapajj qhanaw “Evangelio según Judas” qellqatanjj amuyasi, uka qellqatajj akham sasaw qallti: “Jesusajj kimsaqallqo urunakanwa Judas Iscariotemp taqe kuntï jan yatiski ukanak parläna, ukat pascua fiestatakejj kimsa urunakarakiw faltaskäna” sasa.

Ireneo chachajj mä qellqatat parlkäna ukat walja maranak chhaqatäkäna ¿ukäpachat uka qellqatajja? “Evangelio según Judas” qellqatat sum uñakiptʼapkän uka taypinkirit Marvin Meyer yatjjatatajj akham siwa: “Kuntï Ireneo chachajj mä qellqatat parlkäna ukajj copto arut jaqokipat Evangelio según Judas qellqatampejj niya pachpakiwa” sasa.

“Evangelio según Judas” qellqatajja, Jesusajj arkirinakapan jan sum amuyapjjatapatjja, larusiwa sasaw qhanañchi. Ukat niyakejjay 12 arkirinakapat Jesusajj kunjamasa uk Judas sapaki sum amuychejja, Jesusajj juparukiw “reinot jan yatiski” ukanak yatiyi sasaw qhanañcharaki.

Uka qellqat yaqha arur jaqokipañ qalltapkän ukanakajja, Ireneo chachan qhanañchäwiparjamaw jaqokipapjjäna. Ukat ukarjamajja, Jesusajj Judasaruw kunatï jan yatiski ukanakat amuyañapatak ajlli ukat jupa sapakiw “reinor” purini sasaw qhanañchi. Ukat maynïr apostolonakajja, Judas lantejj yaqharuw ajllipjjani, ukampis Judasajj “tunka kimsanïri ajayuruw” tukjjani sasaw qhanañchi. Ukat Jesusajj “jumaw jupanakat sipans jilïrïyäta, kunattejj jumaw aka jañchi jaqerojj jiwayäta”  sasins Judasar siskaspa ukhamwa qhanañcharaki.

Bart Ehrman ukat Elaine Pagels yatjjatatanakajja, nayrïr cristianonakata ukhamarak gnosticismo siski ukanakatsa sum yatipjje ukat qellqatanakapas suma uñtʼatarakiwa, ukat amuyunakaparjamajj kuntï “Evangelio según Judas” qellqatat amuyapkäna ukjja, jankʼakiw yatiyjjapjjäna ukat ukajja, nayrïr grupojj yaqha arur jaqokipapkän uka pachpa amuyunakarakïnwa. Ukampis, qhepatjja, April DeConick ukat Birger Pearson, yaqha yatjjattʼatanakajja, uka toqet llakisipjjatapjja yatiyapjjarakïnwa. Akham sapjjänwa: Sociedad National Geographic ukajj jankʼakiw uka qellqatat jaqenakar yatiyapjje, kuntï amtatäkäna ukjja, janiw respetapkiti, uka amtarjamajj uka qellqatajj mayampwa uñakiptʼasiñapäna ukat yaqha yatjjattʼatanakas uñakiptʼapjjañaparakïnwa, ukampis ukajj janiw luraskiti sasa.

Ukat DeConick ukhamarak Pearson yatjjatatanakajja, uka qellqatjja sapa mayniw uñakiptʼapjjäna, ukat uñakiptʼasinjja akham sapjjänwa: Traduccionajj wakiskiri cheqanakanjja, pantjatawa sasa. DeConick chachan traduccionaparjamajja, Jesusajj Judasarojj “tunka kimsanïr sajjrayatawa” sasaw säna janiw “tunka kimsanïr ajayuyatawa” siskiti. * Ukat janiw “reinor” makatkätati sasaw qhoru arumpi saraki. Ukat jumajj jupanakat jilïrïyatawa sañat sipansa “jukʼamp jan wal luräta, jumaw aka jañchi jaqerojj jiwayäta” sasa. Cheqansa, DeConick chachan amuyuparjamajja, “Evangelio según Judas” qellqatajj apostolonakat phiskasiñatak luratawa ukat gnósticos siski jupanakaw lurapjjaraki sasaw qhanañchi. DeConick ukat Pearson, yatjjatatanakatakejja, uka qellqatajj janiw Judas chacharojj suma jaqjama uñtaykiti.

Ukhamajj Judasarojj suma jaqjamsa jan ukajj mä sajjrjamsa uñjapkchisa, janiw ni mä yatjjatiris uka qellqatajj wali askipuniwa sapkiti. Bart Ehrman chachajj akham qhanañchi: “Aka qellqatajj janiw Judas chachan qellqatäkiti, pachpa qellqatans janiw uk siskiti. [...] Ukat janirakiw Judasar uñtʼiri jaqen qellqatäkiti [...]. Ukhamajj Jesusajj aka oraqenkkäna ukhajj kunanakas pasäna ukjja janiw uka qellqatajj qhanañchkiti” sasa.

“Evangelio según Judas” qellqatajja, 100 jichha pacha maranakan griego arut mä gnóstico qellqatawa. Ukat Ireneo chachajj mä qellqatat parlkäna ukati janicha ukjja yatjjatatanakajj janiw mä amtar puripkiti. Ukampis “Evangelio según Judas” qellqatajj ak sum amuyayistu: mä tiemponjja, cheqa cristianonak taypitwa kʼari cristianonakajj mistupjjäna ukat kʼari yatichäwinakwa yatichapjjarakïna, ukhamatwa tamarojj tʼaqa tʼaqa sarnaqayapjjarakïna. Uka qellqatajj janiw Bibliarojj kʼari qellqatäkaspas ukham amuyaykiti antisas apóstol Pablon arunakap sum phoqhasitap amuyayistu, jupajj Hechos 20:29, 30 jiskʼa tʼaqanakanjja, akham sänwa: “Nayasti yattwa, naya sarjjä uka qhepatjja, [...]. Jumanaka taypitwa mayninakajj sartapjjani kʼarinak yatichasa, cheqäkaspas ukhama, iyawsirinakar jupanak toqer apaña munasa” sasa.