Chuymatpach maynir wal munasiña sañ muni. Ukat khititï maynir munaski ukajja, arsutapampis, luratapampis munasiñ uñachtʼayapuniwa, chʼamäkchi ukasa.

Moisesajj Diosar munasitapjja qhanwa uñachtʼayäna. ¿Kunjamsa? Jupar taqe kunan istʼasa. Kunjamtï 1 Juan 5:3 jiskʼa tʼaqajj qhanañchki ukhama, ukanjj akham siwa: “Diosar munañajja mandamientonakar phoqhañawa” sasa. Ukhamajja, kunjjay Diosajj Moisesar luram sischïn ukjja, chʼamäkchïns janisa. ‘Ukhampun lurirïna’, amtañäni mä chʼama luräwejja, akänwa: Egipto marka apnaqeri ajjsarkay faraonaruw parlañapäna ukat yaqhasti, tujrupampikiw Wila lamar qotar aytʼañapäna ukajj janiw chʼamäkänti (Éxodo 40:16).

Moisesajj israelitanakar munasitapjja, qhanwa uñachtʼayäna. Ukat israelitanakajj Moisesar Jehová Diosajj irpaskatapjja, amuyapjjarakïnwa, ukatwa llakinakapsa yatiyapjjerïna. Bibliajj akham siwa: “Israelitanakajj Moisés nayraqatanjja alwat jaypʼukamaw saytʼat sayapjjäna” sasa (Éxodo 18:13-16). Amuyasmati, alwatat jaypʼukam jupanakar istʼaskañajj chʼamäpachänwa. Ukampis kusisitaw jupanakar munatap laykojj uk luräna.

Ukat Moisesajj jupanakar istʼasinjja, Diosatsa oración mayirapirakirïnwa. Jupat jan wal parlapkäna ukanakatakisa mayirakirïnwa. Amtañäni, María sat kullakapajj jupa contra parlkäna ukhajja, Jehová Diosajj lepra usumpiw castigäna. Uk uñjasajja, Moisesajj janiw kusiskänti, antisas akham sasaw Diosar achiktʼasïna: “Dios Tata, jumaruw rogtʼassma kʼumarachjjañamataki” sasa (Números 12:13). Uka mayisitapampejj munasitapwa uñachtʼayäna.

Jiwasajj ukhamarakiw Diosarojj wal munasiñasa ukat ukarakiw Diosan kamachinakapar ‘taqe chuyma’ istʼañatakejj yanaptʼistani (Romanos 6:17). Ukhamtï istʼañänejja, Diosajj wal kusisini (Proverbios 27:11). Jehová Diosar munasiñat serviñajj jiwasatakis wali askirakiwa, Jupan chuymapar purtʼkir lurtan ukhajja, kusisiraktanwa (Salmo 100:2).

Ukat yaqhanakar taqe chuyma munasiñatakiw chʼamachasiñasa. Ukat kunapachatï mä amigosa jan ukajj mä familiarasas llakinakap yatiyistani ukhajja, uka munasiñaw akanak lurañatak wiytistani: 1) taqe amuyumpi istʼañataki, 2) kunjamsa jikjjatasi uk amuyañataki ukat 3) jupar taqe chuyma khuyaptʼayañ munatas uñachtʼayañataki.

Jiwasajj Moisesjamarakiw khitinakarutï munasktan ukanakatak Diosat mayirapsna. Awisajja, janiw kunjamats yanaptʼirjamäksnati, ukhamäni ukhajja, inas akham sissna: “Janiw kunjamats yanaptʼirjamäksmati, ukampis Diosatwa mayirapïma” sasa. “Mä aski jaqen oracionapasti wali chʼamanirakiwa” sasaw Bibliajj qhanañchi uk amtañasapuniwa (Santiago 5:16). Cheqansa oracionasajj kuntï Jehová Diosajj jan lurañ amtkäna ukwa lurayaspa. ¿Kunsa mayninakan askipatakejj lursna? * Diosatwa oración mayirapsna.

Cheqansa Moisesatjj walja askinakwa yateqassna. Jupajj jiwasjam pantjasir jaqëkchïnsa, iyawsäwinïñansa, altʼat chuymanïñansa ukat munasiñansa, yateqaskayänwa. Ukhamajj jupat yateqasiñatak chʼamachasiñäni, ukat walja bendicionanakwa jiwasasa ukat jiwasampïpki ukanakas katoqapjjañäni (Romanos 15:4).