Judionakat mayni jiwjje ukhajja, jankʼakiw ukürpach imtʼanjjapjjerïna. ¿Kunatsa ukham lurapjjerïpachäna? Pä toqet amuytʼañäni: Nayraqatjja, khaysa juntʼu markanakanjj jiwatanakajj jankʼakiw thujstjje. Payïrinjja, jiwatar ukürpach jan imtʼañajja, jiwatarus ukat familiaparus phenqʼachaskaspas ukham uñjatänwa.

Mateo, Marcos, Lucas, Juan qellqatanakana ukat Hechos libronsa, pusi jiwatanakarojj ukürpachaw imtʼjjapjjäna sasaw qhanañchi (Mateo 27:57-60; Hechos 5:5-10; 7:60–8:2). Nayra tiemponjja, kunapachatï Jacobojj familiapampi viajasipkäna ukhaw munat Raquel warmipajj jiwjjäna. Ukat kawkhantï jiwat familiapajj imaski ukar kuttʼañat sipansa ‘Efrata siski uka thakiruw imtʼjjäna, mä arunjja, Belenar sarkasa’ (Génesis 35:19, 20, 27-29).

Ukat Bibliarjamajja, judionakajj jiwatanakap imtʼjjañatakejj wali sum wakichapjjerïtapwa amuyayistu. Familiaranakapa ukat amigonakapaw jiwatan jañchip jareqapjjerïna, qʼapkir qollanakampi ukat wali suma aceitempiw uchapjjerïna ukat telanakampiw llawuntapjjerïna (Juan 19:39, 40; Hechos 9:36-41). Vecinonakapasa ukat yaqha jaqenakasa jiwirin familiapar chuymachtʼiriw sarapjjerïna (Marcos 5:38, 39).

Walja judío familianakajja, putunakaru ukat jasa qarqanak (jaqhenak) pʼiysutaruw jiwatanakap imtʼjjapjjerïna, israelanjja walja cheqanakanwa ukham lurapjjerïna. Ukjja Abraham, Sara, Isaac, Jacob uka nayra awkinakapjamaw lurapjjäna, jupanakajj Macpela sat cheqan Hebrón marka jakʼan jiwatanakar imañatak utjkäna ukar imatäpjjäna (Génesis 23:19; 25:8, 9; 49:29-31; 50:13).

Jesusan jiwat cuerpopjj mä qarqar pʼiysut sepulturaruw imtʼasjjäna (Marcos 15:46). Ukan punkupajj jiskʼakïnwa ukat uka manqhanjja, walja pʼiyanak pʼiysupjjerïna, ukaruw jiwat familianakap imtʼjjapjjerïna. Ukat jiwatan jañchipajj ñusantjjäna ukhajja, wañsut chʼakhanakapjja, qalat lurat mä jiskʼa cajaruw uchapjjäna; ukhamat uka pachpa pʼiyar yaqha jiwatanakar imtʼjjapjjañapataki. Jesusajj aka oraqenkkäna ukhajja, uk lurasipkakïnwa.

Moisesan katoqat Leyinakarjamajja sabadojj samarañ urunwa, ukatwa jiwatanakar imtʼjjañatak jan wakisiñapäkanti. Ukat niyakejjay sabadotak kimsa horanak faltkipan Jesusajj jiwjjchïnjja, Arimatea markankir José chachaw Jesusan jiwat cuerpop janïr sum wakichtʼas imtʼjjäna (Lucas 23:50-56). Ukatwa uka uru pasatatjja, Jesusan arkirinakapat mä qhawqha warminakajj Jesusan jiwat jañchip wakichañ tukuyjjañatak sepulturar sarapjjäna (Marcos 16:1; Lucas 24:1).