Mä warmejja, Diosajj janis jupat llakiskaspa ukhamwa amuyasïna ukat akham sarakïnwa: “Janipunis kunatakis walïkirista ukham amuyasta” sasa. ¿Jumajj ukham amuyarakirïtati? Ukhamächi ukhajj inas akham jisktʼasirakirïsta “¿Diosajj nayat llakispachati?” sasa. Jïsa llakisiwa, ukwa Jesusan arunakapan qhan amuyasi. (Juan 6:44 liytʼäta.)

Janiw khitis Diosan munañapsa ukat kunjamas Jupajj uk Jesusat sipansa jukʼamp uñtʼkaspati (Lucas 10:22). ¿Jupajj uka toqet kamsänsa? Akham sänwa: “Janiw khitis nayaru jutkaspati, janitejj khitankitu uka Awkejj apankaspa ukajja” sasa. Ukhamajj Jesusan arkiripäñasatakisa ukat Alajjpachankir Diosan serviripäñasatakisa, Jehová Diosaw jiwasanakar irpanistu, mä arunjja, ajllisistu (2 Tesalonicenses 2:13). Uka arunaktï sum amuyañänejja, Diosajj sapa maynit llakisitapjja qhan amuyarakiñäni.

Ukampis “apankaspa” siski uka arojj ¿kamsañs muni? Griego arut jaqokipatäki “apankaspa” uka arojja, qänanakamp chawllanak katusin apaniñatakiw apnaqasirïna (Juan 21:6, 11). Ukhamajj ¿Diosas munkir jan munkir Jupar serviñasatak qatatinkistaspa ukham sañt muni? Janiwa. Jupajj janiw munkir jan munkir Jupar yupaychaykistuti, jan ukasti jiwasaw Jupar serviñ ajlltanjja (Deuteronomio 30:19, 20). Oraqpachanjja walja millón millón jaqenakaw utji, ukat Jehová Diosajj khitinakatï suma chuymanïpki ukat Jupat yateqañs munapjjaraki ukanakaruw thaqe (1 Crónicas 28:9). Ukat kunapachatï mä suma chuyman jaqer jikjjatki ukhajja, jupar wal yanaptʼaraki.

Kunapachatï Jehová Diosajj mä suma chuyman jaqer jikjjatki ukhajja, jawsiwa, mä arunjja, Jupa toqeruw apani (Hechos 13:48). ¿Kunjamsa uk luri? Biblian suma yatiyäwinak toqnamaw uk luri, ukat uka toqnamarakiw taqenir yatichistu, ukat aruparjam sarnaqañatakisa ukat arupajj kamsañsa muni uk sum amuyañatakis qollan ajayupwa churarakistu (1 Corintios 2:11, 12). Janitï Jehová Diosajj ukham yanaptʼkistaspajja, janiw Jupan serviripäksnas ni Jesusan arkiripäskaraksnasa.

Ukhamajj kuna arunaktï Juan 6:44 qellqatan Jesusajj Jehová Diosat siskän ukajj ¿kuns yatichistu? Jehová Diosajj taqenin chuymapwa uñji ukat maynin chuymap uñjasin askinak jikjjatchi ukhajja, juparojj wal yanaptʼañ muni. Uka toqet sum amuytʼañaw qalltan parltʼaniwayktan uka warmir yanaptʼatayna. Jupajj akham siwa: “Diosar serviñajj taqe kunat sipansa wali askipuniwa. Jupar serviñajatakitï ajllischitojja Jupatak askïtajjwa uñachtʼayitu” sasa. Ukhamajj taqe ukanak yatkasinwa Diosatak suma chuymanïñamatak chʼamañchtʼapjjsma.